AKP ភ្នំពេញ ថ្ងៃទី០៣ ខែមេសា ឆ្នាំ២០២៦ -- ប្រធានាធិបតីឥណ្ឌូណេស៊ីលោក ប្រាបូវ៉ូ ស៊ូប៊ីយ៉ាន់តូ (Prabowo Subianto) និងសមភាគីកូរ៉េខាងត្បូងលោក លី ជេម្យុង (Lee Jae Myung) បានព្រមព្រៀងគ្នាក្នុងការពង្រឹងកិច្ចសហប្រតិបត្តិការក្នុងវិស័យថាមពល និងពង្រឹងខ្សែសង្វាក់ផ្គត់ផ្គង់ធនធាននៅក្នុងអំឡុងពេលនៃកិច្ចប្រជុំកំពូលមួយនៅទីក្រុងសេអ៊ូលកាលពីពេលថ្មីៗនេះ ខណៈដែលអស្ថិរភាពកាន់តែកើនឡើងខ្លាំងនៅតំបន់មជ្ឈិមបូព៌ាដែលបង្កើនការព្រួយបារម្ភអំពីការផ្គត់ផ្គង់ប្រេង និងឧស្ម័នសកលលោក។

នៅក្នុងកិច្ចប្រជុំនោះ លោក លី បានកត់សម្គាល់ថា ជម្លោះដែលអូសបន្លាយនៅមជ្ឈិមបូព៌ាអាចបង្កើនការព្រួយបារម្ភយ៉ាងខ្លាំងអំពីផលប៉ះពាល់ដ៏សំខាន់របស់វាទៅលើការផ្គត់ផ្គង់ថាមពលសម្រាប់ប្រទេសទាំងពីរ ដោយលោកបានស្នើឱ្យភាគីទាំងពីរពង្រីកកិច្ចសហប្រតិបត្តិការលើសន្តិសុខធនធាន ដើម្បីកាត់បន្ថយផលប៉ះពាល់នៃវិបត្តិនេះ។

លោក លី បានសង្កត់ធ្ងន់ទៅលើតួនាទីរបស់ប្រទេសឥណ្ឌូណេស៊ីជាអ្នកផ្គត់ផ្គង់ដ៏សំខាន់នៃធនធានថាមពលសំខាន់ៗ ដូចជាឧស្ម័នធម្មជាតិរាវ(LNG) និងធ្យូងថ្មទៅកាន់កូរ៉េខាងត្បូង ក៏ដូចជាកិច្ចសហប្រតិបត្តិការយ៉ាងជិតស្និទ្ធរវាងប្រទេសទាំងពីរក្នុងឧស្សាហកម្មការពារជាតិ។ លោកក៏បានកត់សម្គាល់ផងដែរថា ប្រទេសឥណ្ឌូណេស៊ី គឺជាគោលដៅក្រៅប្រទេសដំបូងគេសម្រាប់ក្រុមហ៊ុនកូរ៉េខាងត្បូង ហើយនៅតែជាដៃគូសំខាន់មួយនៅក្នុងវិស័យការពារជាតិរបស់ខ្លួន។

លោក លី បានបន្ថែមថា កូរ៉េខាងត្បូងមានគម្រោងចុះហត្ថលេខាលើផែនការដើម្បីចុះហត្ថលេខាលើកិច្ចព្រមព្រៀងមួយដើម្បីនាំចេញយន្តហោះចម្បាំង KF-21 ចំនួន ១៦គ្រឿងទៅកាន់ប្រទេសឥណ្ឌូណេស៊ីក្រោមកម្មវិធីអភិវឌ្ឍន៍រួមគ្នារវាងប្រទេសទាំងពីរ ដែលនឹងសម្គាល់ពីការលក់យន្តហោះចម្បាំងក្នុងស្រុកជាលើកដំបូងរបស់ប្រទេសនៅក្រៅប្រទេស។

លើសពីនេះទៀត ក្រុមហ៊ុនកូរ៉េខាងត្បូងចូលរួមយ៉ាងសកម្មនៅក្នុងទីផ្សារផលិតរថយន្តអគ្គិសនីរបស់ប្រទេសឥណ្ឌូណេស៊ី។ លោក លី បានសម្តែងក្តីសង្ឃឹមសម្រាប់ការពង្រីកកិច្ចសហប្រតិបត្តិការនៅក្នុងគម្រោងនាពេលអនាគតនៅទូទាំងឧស្សាហកម្មជឿនលឿន៕

ដោយ៖ យា ចិន្ដាខន្ដី (ប្រភព៖ VNA)