AKP ព្រះវិហារ ថ្ងៃទី០៣ ខែមេសា ឆ្នាំ២០២៦--ឯកឧត្តម គីម រិទ្ធី អភិបាលខេត្តព្រះវិហារ បានទទួលស្វាគមន៍យ៉ាងកក់ក្តៅចំពោះវត្តមាន ឯកឧត្តម ប៉េង ពោធិ៍សា អភិបាលខេត្តស្វាយរៀង ដែលបានដឹកនាំគណៈប្រតិភូខេត្តស្វាយរៀង ចុះសួរសុខទុក្ខ និងនាំយកអំណោយមាន ម៉ូតូ គ្រឿងឧបភោគបរិភោគ ស្បៀងអាហារ និងថវិកាមួយចំនួនជូនដល់កងទ័ពសមរភូមិមុខ និងប្រជាពលរដ្ឋជនភៀសសឹក ដែលកំពុងស្នាក់នៅបណ្ដោះអាសន្នក្នុងមណ្ឌលសុវត្ថិភាពវត្តបាក់កាំ ស្រុកត្បែងមានជ័យ និងមណ្ឌលវត្តកំពង់សង្កែ ស្រុកឆែប ខេត្តព្រះវិហារ កាលពីថ្ងៃទី០២ ខែមេសា ឆ្នាំ២០២៦។

ឯកឧត្តម គីម រិទ្ធី បានសម្ដែងនូវក្ដីរីករាយ និងថ្លែងអំណរគុណយ៉ាងជ្រាលជ្រៅចំពោះ ឯកឧត្តម ប៉េង ពោធិ៍សា អភិបាលខេត្តស្វាយរៀង និងប្រតិភូខេត្តស្វាយរៀង ដែលមានចិត្តសប្បុរសក្នុងការនាំយកអំណោយមកជូនដល់កងទ័ពជួរមុខ និងបងប្អូនប្រជាពលរដ្ឋភៀសសឹកក្នុងគ្រាដ៏លំបាកនេះ។ 

ឯកឧត្តម ប៉េង ពោធិ៍សា ក៏បានពាំនាំនូវប្រសាសន៍សាកសួរសុខទុក្ខ និងការគិតគូរយ៉ាងជ្រាលជ្រៅពីសំណាក់សម្ដេចធិបតី នាយករដ្ឋមន្ត្រី ចំពោះសុខទុក្ខ និងការរស់នៅរបស់បងប្អូនប្រជាពលរដ្ឋក្នុងមណ្ឌលសុវត្ថិភាព ក្នុងស្មារតី សាមគ្គីភាព និងការចែករំលែក ដើម្បីជួយសម្រាលការលំបាកក្នុងកាលៈទេសៈលំបាកនេះ។ ឯកឧត្ដម សូមឱ្យបងប្អូនប្រជាពលរដ្ឋក្នុងមណ្ឌលសុវត្ថិភាពទាំងអស់ ចូលថែរក្សាសុខភាព ដោយរស់នៅស្អាតនិងមានអនាម័យល្អ ។ 

ឯកឧត្តម ក៏បានថ្លែងពាំនាំនូវប្រសាសន៍ផ្តាំផ្ញើសាកសួរសុខទុក្ខពីសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ផ្ញើជូននាយទាហាន នាយទាហានរង និងពលទាហាន ទាំងអស់ដោយសម្តេចតែងនឹករលឹកកងកម្លាំងរបស់យើងគ្រប់ពេលវេលា។ ក្នុងឱកាសឆ្នាំថ្មីនេះសម្តេចបានជូនពរ សូមទេវតាឆ្នាំថ្មី ប្រសិទ្ធពរជ័យជូនកងកម្លាំងកងយោធពលខេមរភូមិន្តយើងទាំងអស់ សូមមានសុខភាពល្អបរិបូណ៌ ជួបតែសេចក្តីសុខ ជោគជ័យក្នុងបេសកកម្មការពារអធិបតេយ្យភាព បូរណភាពទឹកដីពីចោរឈ្លានពាន ៕

ដោយ ទិត ស្រ៊