AKP ភ្នំពេញ ថ្ងៃទី០២ ខែមេសា ឆ្នាំ២០២៦ -- អ្នកនាំពាក្យប្រធានាធិបតីហ្វីលីពីន បាននិយាយកាលពីថ្ងៃពុធថា ប្រទេសហ្វីលីពីនបានស្វែងរកផ្លូវឆ្លងកាត់ដែលមានសុវត្ថិភាពសម្រាប់ការដឹកជញ្ជូនប្រេងដែលត្រូវការជាចាំបាច់ នៅក្នុងកិច្ចប្រជុំមួយជាមួយប្រទេសអ៊ីរ៉ង់ ខណៈដែលប្រទេសកោះមួយនេះពឹងផ្អែកទៅលើការនាំចូលដែកកំពុងប្រកួតប្រជែងជាមួយប្រទេសផ្សេងទៀតក្នុងតំបន់សម្រាប់ប្រេងឥន្ធនៈ។

តម្លៃប្រេងឥន្ធនៈបានឡើងដល់កម្រិតខ្ពស់បំផុតជាប្រវត្តិសាស្ត្រនៅក្នុងប្រទេសហ្វីលីពីនចាប់តាំងពីសម្ព័ន្ធមិត្តសន្ធិសញ្ញាសហរដ្ឋអាមេរិក និងអ៊ីស្រាអែលបានបើកការវាយប្រហារលើប្រទេសអ៊ីរ៉ង់នៅថ្ងៃទី២៨ ខែកុម្ភៈឆ្នាំ២០២៦ ដោយទីក្រុងតេអេរ៉ង់បានបិទច្រកសមុទ្រហ័រមុសដ៏សំខាន់សម្រាប់ចរាចរណ៍ចាប់តាំងពីពេលនោះមក។

ប្រធានាធិបតីហ្វីលីពីន លោក ហ្វឺឌីនែនដ៍ ម៉ាកូស (Ferdinand Marcos) បានប្រកាសពីភាពអាសន្នថាមពលជាតិកាលពីសប្តាហ៍មុន ដោយក្រោយមកបាននិយាយថា «គ្មានអ្វីក្រៅពីតុចរចាទេ» ខណៈដែលប្រទេសដែលមានប្រជាជន ១១៦លាននាក់មួយនេះបានព្យាយាមបំពេញតម្រូវការប្រេងឥន្ធនៈរបស់ខ្លួន។

កាលពីថ្ងៃពុធ រដ្ឋមន្ត្រីការបរទេសហ្វីលីពីន លោកស្រី ថេរ៉េសា ឡាហ្សារ៉ូ (Theresa Lazaro) បាននិយាយថា លោកស្រីបានស្វែងយល់ពីមធ្យោបាយសំខាន់ៗសម្រាប់កិច្ចសហប្រតិបត្តិការ នៅក្នុងកិច្ចប្រជុំជាមួយឯកអគ្គរដ្ឋទូតអ៊ីរ៉ង់ លោក យូសេហ្វ អេស្មែលហ្សាដេហ៍ (Yousef Esmaeilzadeh) ដែលរួមមានរដ្ឋមន្ត្រីថាមពលហ្វីលីពីនចូលរួមផងដែរ។

លោកស្រីបាននិយាយនៅក្នុងការបង្ហោះមួយនៅលើប្រព័ន្ធផ្សព្វផ្សាយសង្គមអ៊ិចថា «ដោយឈរលើសន្ទុះនៃការពិគ្រោះយោបល់នយោបាយរបស់យើងកាលពីខែវិច្ឆិកា ឆ្នាំ២០២៥ យើងប្តេជ្ញាពង្រឹងកិច្ចសហប្រតិបត្តិការរបស់យើងលើគ្រប់វិស័យ ជាពិសេសកិច្ចសហប្រតិបត្តិការលើវិស័យថាមពល»។

អ្នកនាំពាក្យប្រធានាធិបតី លោក ឃ្លែរ កាស្ត្រូ (Claire Castro)ក្រោយមកបានប្រាប់អ្នកសារព័ត៌មានថា លោកស្រី ឡាហ្សារ៉ូ បានស្វែងរកការឆ្លងកាត់ដោយសុវត្ថិភាពតាមរយៈច្រកសមុទ្រសម្រាប់ការដឹកជញ្ជូនប្រេងទៅកាន់ប្រទេសហ្វីលីពីន៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)