AKP បន្ទាយមានជ័យ ថ្ងៃទី២ ខែមេសា ឆ្នាំ២០២៦ -- ក្នុងស្មារតី "រួមសុខរួមទុក្ខ" និងដើម្បីលើកទឹកចិត្តដល់ឆ្អឹងខ្នងនៃវិស័យអប់រំដែលកំពុងជួបការលំបាក ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអញ្ជើញចុះជួបសំណេះសំណាលផ្ទាល់ និងនាំយកថវិកាឧបត្ថម្ភពី «មូលនិធិសាមគ្គីគ្រួសារអប់រំ» ជូនដល់លោកគ្រូ អ្នកគ្រូ ដែលបានបាត់បង់ផ្ទះសម្បែង និងទ្រព្យសម្បត្តិ ក្នុងហេតុការណ៍ជម្លោះព្រំដែននាពេលកន្លងទៅ។

    
ពិធីសំណេះសំណាលនេះបានប្រារព្ធឡើង នារសៀលថ្ងៃទី១ ខែមេសា  ឆ្នាំ២០២៦ នេះ នៅមន្ទីរអប់រំយុវជននិងកីឡា មិនត្រឹមតែជាការផ្តល់ជំនួយហិរញ្ញវត្ថុប៉ុណ្ណោះទេ ប៉ុន្តែគឺជាការបំពេញសន្យារបស់ឯកឧត្តមឧបនាយករដ្ឋមន្ត្រី ដែលបានសន្យាកាលពីខែមុនថា នឹងវិលត្រឡប់មកជួយគាំទ្រដល់អ្នកអប់រំនៅសមរភូមិក្រោយនេះឱ្យខាងតែបាន។
ឯកឧត្តមបណ្ឌិតសភាចារ្យ បានមានប្រសាសន៍សង្កត់ធ្ងន់ថា«ថវិកាដែលប្រគល់ជូននាពេលនេះ គឺជាសក្ខីភាពបញ្ជាក់ពីស្មារតីសាមគ្គីភាព និងការជួយគ្នាទៅវិញទៅមកក្នុងគ្រាមានអាសន្ន។ យើងមិនបោះបង់លោកគ្រូ អ្នកគ្រូឱ្យនៅឯកោឡើយ»។ ឯកឧត្តមបានបន្ថែមថា ការលះបង់របស់លោកគ្រូ អ្នកគ្រូ ដែលនៅតែបន្តឈរជើងបង្រៀនសិស្សានុសិស្ស ទោះបីជាខ្លួនឯងកំពុងជួបទុក្ខលំបាកផ្នែកជីវភាព និងជម្រក គឺជាមនសិការវិជ្ជាជីវៈដ៏ខ្ពង់ខ្ពស់បំផុតក្នុងកិច្ចការពារនិរន្តរភាពនៃការសិក្សារបស់ទំពាំងស្នងឫស្សីជាតិ។

  
ដើម្បីធានាបាននូវតម្លាភាព និងចំគោលដៅ មូលនិធិសាមគ្គីគ្រួសារអប់រំ បានបែងចែកការឧបត្ថម្ភជា ៣ ក្រុមគោលដៅ រួមមាន៖
ក្រុមគ្រួសារជាស្វាមី-ភរិយា (៦ គ្រួសារ)បាន ៥ លានរៀល ក្នុងមួយគ្រួសារ។បុគ្គលិកអប់រំរងគ្រោះផ្ទះផ្ទាល់ខ្លួន (៣៦ នាក់) ទទួលបាន ៤ លានរៀល ក្នុងម្នាក់។បុគ្គលិកអប់រំរងគ្រោះផ្ទះជួល (៥ នាក់)ទទួលបាន ៣ លានរៀល ក្នុងម្នាក់។

     
ក្រៅពីការផ្តល់កម្លាំងចិត្ត ឯកឧត្តមឧបនាយករដ្ឋមន្ត្រី ក៏បានឆ្លៀតឱកាសអំពាវនាវដល់បុគ្គលិកអប់រំ និងប្រជាពលរដ្ឋទាំងអស់ ឱ្យបន្តជឿជាក់លើការដឹកនាំរបស់រាជរដ្ឋាភិបាល ក្រោមការដឹកនាំរបស់ សម្តេចតេជោ ហ៊ុន សែននិង សម្តេចធិបតី ហ៊ុន ម៉ាណែត។

ឯកឧត្តមបានបញ្ជាក់ពីជំហរច្បាស់លាស់របស់កម្ពុជា ក្នុងការដោះស្រាយវិវាទព្រំដែនតាមផ្លូវច្បាប់អន្តរជាតិ និងសន្តិវិធី ដោយប្រកាន់ខ្ជាប់នូវការគោរពអធិបតេយ្យភាពប្រទេសជិតខាង ប៉ុន្តែដាច់ខាតមិនអនុញ្ញាតឱ្យមានការរំលោភឈ្លានពានណាមួយមកលើទឹកដីកម្ពុជាបានឡើយ។

អន្តរាគមន៍នាពេលនេះ មិនត្រឹមតែជួយសម្រាលបន្ទុកជីវភាពភ្លាមៗប៉ុណ្ណោះទេ ប៉ុន្តែគឺជាការចាក់ចាក់បញ្ចូលនូវកម្លាំងចិត្តយ៉ាងមុតមាំ ដល់មន្ត្រីអប់រំនៅតាមខ្សែបន្ទាត់ព្រំដែន ឱ្យបន្តបេសកកម្មបណ្តុះបណ្តាលធនធានមនុស្ស ដើម្បីអនាគតដ៏រុងរឿងរបស់កម្ពុជា៕

ដោយ ឈុន សារ៉ាត