AKP បន្ទាយមានជ័យ ថ្ងៃទី០២ ខែមេសា ឆ្នាំ២០២៦ -- ក្នុងកាយវិការសប្បុរសធម៌ និងបង្ហាញពីសាមគ្គីភាពដ៏រឹងមាំរវាងរដ្ឋបាលខេត្ត និងខេត្ត កាលពីថ្ងៃទី០១ ខែមេសា ឆ្នាំ២០២៦ នេះ ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ បានទទួលស្វាគមន៍យ៉ាងកក់ក្តៅចំពោះប្រតិភូរដ្ឋបាលខេត្តស្វាយរៀង ក្នុងពិធីប្រគល់ និងទទួលថវិកាឧបត្ថម្ភ ដើម្បីគាំទ្រដល់សកម្មភាពមនុស្សធម៌ និងកិច្ចការពារសន្តិសុខតាមបន្ទាត់ព្រំដែន។

    
ក្នុងពិធីដែលបានរៀបចំឡើងនៅសាលាខេត្តបន្ទាយមានជ័យ លោក សុខ រស់ អភិបាលរងខេត្តស្វាយរៀង តំណាងដ៏ខ្ពង់ខ្ពស់ឯកឧត្តម ប៉េង ពោធិ៍សា អភិបាលខេត្តស្វាយរៀង បាននាំយកថវិកាចំនួន ១០,០០០ ដុល្លារ (មួយម៉ឺនដុល្លារអាមេរិក) ប្រគល់ជូនរដ្ឋបាលខេត្តបន្ទាយមានជ័យ។ ការឧបត្ថម្ភនេះ គឺជាការឆ្លើយតបយ៉ាងទាន់ពេលវេលា ដើម្បីជួយសម្រាលទុក្ខលំបាករបស់បងប្អូនប្រជាពលរដ្ឋដែលរងគ្រោះដោយសារភៀសសឹក និងដើម្បីគាំពារដល់កងកម្លាំងប្រដាប់អាវុធដែលកំពុងឈរជើងបំពេញភារកិច្ចការពារបូរណភាពទឹកដីយ៉ាងស្វិតស្វាញនៅតាមបន្ទាត់ព្រំដែន។

     
មានប្រសាសន៍ក្នុងឱកាសដ៏មានអត្ថន័យនោះ ឯកឧត្តម អ៊ុ រាត្រី បានសម្តែងនូវក្តីរំភើប និងការដឹងគុណយ៉ាងជ្រាលជ្រៅបំផុត ចំពោះទឹកចិត្តសប្បុរសធម៌របស់ថ្នាក់ដឹកនាំខេត្តស្វាយរៀង។ ឯកឧត្តមបានបញ្ជាក់ថា ក្នុងនាមរដ្ឋបាលខេត្ត និងក្នុងនាមខ្លួនខ្ញុំផ្ទាល់ ខ្ញុំសូមថ្លែងអំណរគុណយ៉ាងជ្រាលជ្រៅបំផុតជូនចំពោះ ឯកឧត្ដម ប៉េង ពោធិ៍សា អភិបាលខេត្តស្វាយរៀង ដែលបានគិតគូរ និងចែករំលែកធនធានដ៏មានតម្លៃនេះមកកាន់ខេត្តបន្ទាយមានជ័យ។ ថវិកានេះមិនត្រឹមតែជាជំនួយសម្ភារៈប៉ុណ្ណោះទេ ប៉ុន្តែវាគឺជាកម្លាំងចិត្តដ៏ធំធេងសម្រាប់បងប្អូនភៀសសឹក និងកងកម្លាំងជួរមុខរបស់យើងដែលកំពុងលះបង់ដើម្បីជាតិមាតុភូមិ។

     
ឯកឧត្តមអភិបាលខេត្ត ក៏បានសង្កត់ធ្ងន់ផងដែរថា រដ្ឋបាលខេត្តនឹងចាត់ចែងថវិកានេះដោយតម្លាភាព និងចំគោលដៅបំផុត ដើម្បីធានាថាជំនួយនេះបានទៅដល់ដៃបងប្អូនប្រជាពលរដ្ឋ និងកងកម្លាំងដែលកំពុងត្រូវការចាំបាច់នៅតាមភូមិសាស្ត្រព្រំដែនក្នុងខេត្តបន្ទាយមានជ័យ។

     
ជាមួយនោះ ឯកឧត្តម អ៊ុ រាត្រី ក៏បានប្រសិទ្ធពរជ័យសិរីសួស្តី ជ័យមង្គល ជូនចំពោះ ឯកឧត្តម ប៉េង ពោធិ៍សា និងលោកជំទាវ ព្រមទាំងក្រុមគ្រួសារ និងក្រុមការងារទាំងអស់ សូមជួបតែសេចក្តីសុខ សុភមង្គល និងប្រកបដោយពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

     
សកម្មភាពនេះបានសបញ្ជាក់ឱ្យឃើញថា ទោះបីស្ថិតក្នុងកាលៈទេសៈណាក៏ដោយ ស្មារតីជួយគ្នាទៅវិញទៅមករវាងថ្នាក់ដឹកនាំ និងមន្ត្រីរាជការ តែងតែជាសសរទ្រូងដ៏រឹងមាំក្នុងការថែរក្សាសុខុមាលភាពប្រជាជន និងការពារសន្តិសុខជាតិ៕

ដោយ ឈុន សារ៉ាត