AKP ព្រះសីហនុ ថ្ងៃ០១ ខែមេសា ឆ្នាំ២០២៦ -- គណៈប្រតិភូខេត្តអានហ្សាង របស់ប្រទេសវៀតណាម ដឹកនាំដោយលោក ឡេ វ៉ាន់ ផឿក អនុប្រធានគណៈកម្មាធិការប្រជាជនខេត្តអានហ្សាង អញ្ជើញជូនពរថ្នាក់ដឹកនាំខេត្តព្រះសីហនុ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ កាលពីរសៀលថ្ងៃទី០១ ខែមេសា ឆ្នាំ២០២៦ នេះ។
លោក ឯម ភាព អភិបាលរងខេត្តព្រះសីហនុ  ជំនួសឱ្យឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ សូមស្វាគមន៍ចំពោះវត្តមានគណៈប្រតិភូខេត្តអានហ្សាង របស់ប្រទេសវៀតណាម ដែលបានមកទស្សនកិច្ច សួរសុខទុក្ខ និងជូនពរថ្នាក់ដឹកនាំខេត្តព្រះសីហនុ ក្នុងឱកាសពិធីបុណ្យចូលឆ្នាំថ្មី ប្រពៃណីជាតិ ឆ្នាំមមី អដ្ឋស័ក ព.ស.២៥៧៩ គ.ស.២០២៦ ត្រូវនឹងថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៦។

លោកអភិបាលរងខេត្តព្រះសីហនុ បានបញ្ជាក់ថា  ខេត្តព្រះសីហនុ និងខេត្តអានហ្សាង មានទំនាក់ទំនងសម្ព័ន្ធមេត្រីភាពយ៉ាងជិតស្និទ្ធ និងរឹងមាំជាយូរមកហើយ ដោយក្នុងនោះ ប្រតិភូខេត្តទាំងពីរតែងតែបានផ្លាស់ប្ដូរទស្សនកិច្ច និងជូនពរថ្នាក់ដឹកនាំនៃខេត្តទាំងពីរជារៀងរាល់ឆ្នាំ ហើយជំនួប និងជូនពរទៅវិញទៅមកនេះ មិនត្រឹមតែបង្កើនការយល់ដឹង និងការគាំទ្រគ្នាប៉ុណ្ណោះទេ ប៉ុន្តែថែមទាំងជួយបង្កើតនូវភាពស្និទ្ធស្នាលផងដែរ។ យើងតែងតែស្វាគមន៍គ្នាដោយក្តីរីករាយប្រកបដោយភាពកក់ក្ដៅ គោរពរាប់អាន និងសាមគ្គីភាព និងកិច្ចសហប្រតិបត្តិការរវាងប្រទេសទាំងពីរកាន់តែជិតស្និត។

លោកអភិបាលរងខេត្តព្រះសីហនុ បានបន្តថា ខេត្តព្រះសីហនុជាខេត្តមួយក្នុងចំណោមខេត្តទាំង៤ នៃតំបន់ឆ្នេរសមុទ្ររបស់កម្ពុជា ដែលមានសក្តានុពលខ្ពស់ក្នុងវិស័យឧស្សាហកម្ម ទេសចរណ៍ ពាណិជ្ជកម្ម និងភស្តុភារកម្ម មានកំពង់ផែសមុទ្រទឹកជ្រៅ អាកាសយាន្តដ្ឋានអន្តរជាតិ ផ្លូវល្បឿនលឿន ផ្លូវដែក និងតំបន់សេដ្ឋកិច្ចពិសេសជាច្រើន។ រាជរដ្ឋាភិបាលនីតិកាលទី៧ នៃរដ្ឋសភា ដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា កាលពីថ្ងៃទី៣១ ខែមករា ឆ្នាំ២០២៤ បានអញ្ជើញជាអធិបតីដ៏ខ្ពង់ខ្ពស់បំផុតក្នុងពិធីប្រកាសដាក់ឱ្យអនុវត្តជាផ្លូវការនូវ «កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ២០២៤» ក្នុងគោលបំណងដាក់ចេញនូវវិធានការ និងយន្តការដែលមានលក្ខណៈជាកញ្ចប់ ប្រទាក់ក្រឡា មុតស្រួច និងសាមញ្ញ ហើយកម្មវិធីពិសេសនេះ ត្រូវបានរាជរដ្ឋាភិបាលសម្រេចបន្តអនុវត្តរហូតដល់ដំណាច់ឆ្នាំ២០២៧ ដោយរក្សាវិធានការទាំងឡាយដែលមានស្រាប់ ដើម្បីជំរុញការអភិវឌ្ឍខេត្តព្រះសីហនុ និងឆ្លើយតបនឹងគោលបំណងរបស់រាជរដ្ឋាភិបាល។ ការប្រកាសដាក់ចេញនូវ «កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ២០២៤» របស់រាជរដ្ឋាភិបាលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងការសម្រេចបន្តផ្តល់ «អត្ថប្រយោជន៍ពិសេស» ក្រោមវិសាលភាពនៃកម្មវិធីពិសេសនេះរហូតដល់ដំណាច់ឆ្នាំ២០២៧ ជាលទ្ធផល ក្រុមការងារពិសេសជំរុញការវិនិយោគទទួលបានសំណើសុំលើកទឹកចិត្តចំនួន ៤គម្រោង ក្នុងនោះគម្រោងដែលទទួលបានលិខិតអនុញ្ញាតជាគោលការណ៍ចំនួន ៤៦៧គម្រោងមានទុនវិនិយោគសរុបប្រមាណ ៨,១៨លានដុល្លារអាម៉េរិក និងប៉ាន់ស្មានអាចបង្កើតឱកាសការងារចំនួន ៥៥.១២៤កន្លែង។

ជាមួយគ្នានោះដែរ លោក ឡេ វ៉ាន់ ផឿក អនុប្រធានគណៈកម្មាធិការប្រជាជនខេត្តអានហ្សាង បានថ្លែងអំណគុណថ្នាក់ដឹកនាំខេត្តព្រះសីហនុ ដែលបានទទួលស្វាគមន៍ប្រតិភូខេត្តអានហ្សាងរបស់ប្រទេសវៀតណាមនាពេលនេះ ហើយនេះជាការជូនពរដល់ថ្នាក់ដឹកនាំខេត្ត មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋខេត្តព្រះសីហនុទទួលបានសេរីសួស្តី ជ័យមង្គលក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ ដែលនឹងឈានចូលមកដល់នាពេលខាងមុខនេះ ជាពិសេសការរិតចំណងសាមគ្គីភាព មិត្តភាព កិច្ចសហប្រតិបត្តិការ និងការផ្លាស់ប្តូរពាណិជ្ជកម្ម ឧស្សាហកម្ម និងទេសចរណ៍រវាងប្រទេសទាំងពីរវៀតណាម និងខេត្តព្រះសីហនុឱ្យកាន់តែស្និតស្នាលបន្ថែមទៀត ព្រោះវៀតណាម និងកម្ពុជាជាប្រទេសដែលមានភូមិផងរបងជាមួយគ្នា ប្រកបដោយភាពរីកចម្រើន៕

ដោយ៖ ងូ សុមុនី