AKP ព្រះសីហនុ ថ្ងៃទី០១ ខែមេសា ឆ្នាំ២០២៦-- ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ បានអញ្ជើញដឹកនាំកិច្ចប្រជុំពិនិត្យ និងពិភាក្សាលើករណីការសិក្សាបណ្តាញលូរំដោះទឹកភ្លៀង និងទឹកកខ្វក់ក្នុងបុរី POLO ស្ថិតនៅក្នុងភូមិ៥ សង្កាត់លេខ៤ ក្រុងព្រះសីហនុ និងការកាយស្តាអូរប្រឡាយធម្មជាតិក្នុងក្រុងព្រះសីហនុ នារសៀលថ្ងៃពុធ ទី០១ ខែមេសា ឆ្នាំ២០២៦ ដោយមានការចូលរួមពីអភិបាលរងខេត្ត នាយករដ្ឋបាលសាលាខេត្ត អភិបាលក្រុង អភិបាលរងក្រុង ប្រធានមន្ទីរពាក់ព័ន្ធ។

លោក ជ្រាវ ថាវុធ អនុប្រធានមន្ទីរសាធារណការ និងដឹកជញ្ជូនខេត្តព្រះសីហនុ បានធ្វើបទបង្ហាញស្តីអំពីបណ្តាញលូរំដោះទឹកភ្លៀង និងលូទឹកកខ្វក់ក្នុងបុរី POLO ដូចជា៖ ១. ការសិក្សាបណ្តាញលូរំដោះទឹកភ្លៀង និងលូទឹកកខ្វក់ក្នុងបុរី POLO ២. ស្ថានភាពដីកកលើស្ពាន តាមបណ្តោយវិថីសែនជ័យ (ផ្លូវលេខ៤៩) ៣. ការជន់លិចផ្លូវលេខ ៨៣៥ (ផ្លូវ៤០ម) ៤. ទឹកកខ្វក់ក្នុងព្រែកសែនត្រជាក់ចិត្ត ៥. ការជន់លិចទឹកកខ្វក់ហូរចូលឆ្នេរអូរឈើទាល ៦. ការជន់លិចតំបន់ស្រែត្រកូន ៧. ការរៀបចំសណ្តាប់ធ្នាប់ចិញ្ចើមវិថីមិត្តភាព (ផ្លូវលេខ ៨០០) និង៨. ស្ថិតិផ្លូវថ្នល់ក្នុងភូមិសាស្ត្រខេត្តព្រះសីហនុ។

ឯកឧត្ដម ម៉ាង ស៊ីណេត អភិបាលខេត្តព្រះសីហនុ បានបញ្ជាក់ថា លូទឹកកខ្វក់ជារឿងសំខាន់ដែលទាមទារឱ្យយើងទាំងអស់គ្នាចូលរួមគ្នាដោះស្រាយ ដូច្នេះយើងត្រូវកៀរគរអតិថិជនចូលរួម ដើម្បីឱ្យដំណើរការសាងសង់លូទឹកកខ្វក់របស់យើងដំណើរការបានរលូនតាមការគ្រោងទុក។

ក្នុងឱកាសនោះ ឯកឧត្តមអភិបាលខេត្តក៏បានធ្វើការណែនាំឱ្យមន្ទីរសាធារណការ និងដឹកជញ្ជូនខេត្តព្រះសីហនុ សិក្សាពីតម្លៃលូ និងដាក់លូទឹកកខ្វក់ដែលមានទំហំ០,៣០ម៉ែត្រ ដើម្បីរំដោះទឹកស្អុយហូរចូលទៅប្រឡាយមេ ឬទៅអាងច្រោះ១៦ហិកតា។ ទន្ទឹមនោះ មន្ទីរសាធារណការ និងដឹកជញ្ជូនខេត្ត សហការជាមួយមន្ទីរធនធានទឹក និងឧតុនិយមខេត្ត ចុះសិក្សាពិនិត្យអូរធម្មជាតិ ដើម្បីកាយស្តារឡើងវិញឱ្យបានធំទូលាយ ជាពិសេសការកាយបើកមុខទឹកហូរបានលឿន ដើម្បីរំដោះជំនន់ទឹកភ្លៀងនៅរដូវវស្សាកុំឱ្យមានការជន់លិចផ្ទះប្រជាពលរដ្ឋក្នុងក្រុងព្រះសីហនុ ដូច្នេះយើងត្រូវសិក្សា រៀបចំផែនការត្រៀមរៀបចំទុកជាមុន ព្រោះរដូវវស្សានឹងឈានមកដល់នៅពេលខាងមុខ៕

ដោយ ងូ សុមុនី