AKP ភ្នំពេញ ថ្ងៃទី៣១ ខែមីនា ឆ្នាំ២០២៦ -- ប្រធានាធិបតីសហរដ្ឋអាមេរិកលោក ដូណាល់ ត្រាំ (Donald Trump) កាលពីថ្ងៃចន្ទបាននិយាយថា កិច្ចចរចាជាមួយអ៊ីរ៉ង់ដើម្បីបញ្ចប់ការវាយប្រហាររួមគ្នារវាងសហរដ្ឋអាមេរិក និងអ៊ីស្រាអែល កំពុងដំណើរការទៅមុខ ប៉ុន្តែលោកបានព្រមានថាហេដ្ឋារចនាសម្ព័ន្ធថាមពលដ៏សំខាន់របស់ប្រទេសអ៊ីរ៉ង់នឹងត្រូវបានបំផ្លាញប្រសិនបើកិច្ចចរចាមិនទទួលបានផ្លែផ្កាក្នុងពេលឆាប់ៗនេះ។

លោក ត្រាំ បានបង្ហោះនៅលើផ្សព្វផ្សាយសង្គម Truth Social របស់លោកថា «ប្រសិនបើដោយហេតុផលណាមួយ កិច្ចព្រមព្រៀងមួយមិនត្រូវបានឈានដល់ក្នុងពេលឆាប់ៗនេះទេ ដែលវាទំនងជានឹងកើតឡើង ហើយប្រសិនបើច្រកសមុទ្រហ័រមុសមិនត្រូវបានបើកសម្រាប់អាជីវកម្មភ្លាមៗទេនោះ យើងនឹងបញ្ចប់ការស្នាក់នៅដ៏គួរឱ្យស្រឡាញ់របស់យើងនៅក្នុងប្រទេសអ៊ីរ៉ង់ ដោយការបំផ្ទុះ និងបំផ្លាញរោងចក្រផលិតអគ្គិសនីទាំងអស់អណ្តូងប្រេង និងកោះខាក (Kharg) (និងប្រហែលជារោងចក្របន្សាបជាតិប្រៃទាំងអស់ផងដែរ)»។

បើទោះបីជាមានការព្រមាននេះក៏ដោយ ក៏លោកបាននិយាយថា «កិច្ចពិភាក្សាដ៏សំខាន់» កំពុងបន្តជាមួយរបបអ៊ីរ៉ង់ប្រកបដោយហេតុផលថ្មី និងសមហេតុផលជាងមុន។

អ៊ីរ៉ង់បាននិយាយកាលពីថ្ងៃចន្ទថា ខ្លួនមិនបានធ្វើការចរចាដោយផ្ទាល់ជាមួយសហរដ្ឋអាមេរិកទេ ដោយនិយាយថា ទំនាក់ទំនងថ្មីៗនេះត្រូវបានកំណត់ចំពោះសារដែលបានបញ្ជូនតាមរយៈអន្តរការី។ បណ្តាប្រទេសក្នុងតំបន់បានស្វែងរកការសម្របសម្រួលកិច្ចព្រមព្រៀងរវាងភាគីទាំងពីរ ដោយរដ្ឋមន្ត្រីការបរទេសប៉ាគីស្ថាន លោក អ៊ីស្សាក ដារ (Ishaq Dar) ដោយបានបង្ហាញថា ទីក្រុងអ៊ីស្លាម៉ាបាដនឹងមានឆន្ទៈក្នុងការធ្វើជាម្ចាស់ផ្ទះនៃកិច្ចចរចា។

កាលពីថ្ងៃអាទិត្យ លោក ត្រាំ បានលើកទឹកចិត្តដល់កិច្ចខិតខំប្រឹងប្រែងផ្នែកការទូត ដោយមានអន្តរការីរួមមាន ប៉ាគីស្ថាន តួកគី និងអេហ្ស៊ីប ចូលរួមក្នុងទំនាក់ទំនងដោយប្រយោលរវាងទីក្រុងវ៉ាស៊ីនតោន និងទីក្រុងតេអេរ៉ង់។លោកបាននិយាយថា កិច្ចចរចាដោយប្រយោលតាមរយៈ «អ្នកតំណាង»ប៉ាគីស្ថាន កំពុងដំណើរការទៅមុខ ដោយកិច្ចព្រមព្រៀងមួយអាចត្រូវបានធ្វើឡើងយ៉ាងឆាប់រហ័ស។

មន្ត្រីជាន់ខ្ពស់អ៊ីរ៉ង់ជាច្រើននាក់ស្ថិតក្នុងចំណោមមនុស្សទាំង១.៣៤០នាក់ដែលត្រូវបានសម្លាប់នៅក្នុងការវាយប្រហារតាមអាកាសដែលសហរដ្ឋអាមេរិក និងអ៊ីស្រាអែលបានធ្វើឡើងប្រឆាំងនឹងអ៊ីរ៉ង់តាំងពីថ្ងៃទី២៨ខែកុម្ភៈ រួមទាំងមេដឹកនាំកំពូលអ៊ីរ៉ង់ លោក អាយ៉ាតូឡាហ៍ អាលី ខាមេណី(Ayatollah Ali Khamenei) ផងដែរ។

ទីក្រុងតេអេរ៉ង់បានសងសឹកវិញដោយការវាយប្រហារដោយយន្តហោះគ្មានមនុស្សបើក និងមីស៊ីលដែលកំណត់គោលដៅលើអ៊ីស្រាអែល ហ្ស៊កដានី អ៊ីរ៉ាក់ និងប្រទេសឈូងសមុទ្រដែលមានទ្រព្យសម្បត្តិយោធាអាម៉េរិក ដែលបណ្តាលឱ្យមានអ្នកស្លាប់ និងខូចខាតហេដ្ឋារចនាសម្ព័ន្ធ ខណៈដែលរំខានដល់ទីផ្សារ និងអាកាសចរណ៍សកលលោក៕

ដោយ៖ យា ចិន្ដាខន្ដី (ប្រភព៖ AA-AKP)