AKP ភ្នំពេញ ថ្ងៃទី៣១ ខែមីនា ឆ្នាំ២០២៦ -- លោក អេនតូនីញ៉ូ ហ្គូតេរេស (Antonio Guterres) អគ្គលេខាធិការអង្គការសហប្រជាជាតិ បានថ្កោលទោសយ៉ាងខ្លាំងចំពោះការសម្លាប់កងកម្លាំងរក្សាសន្តិភាពឥណ្ឌូណេស៊ីម្នាក់នៃកងកម្លាំងបណ្តោះអាសន្នរបស់អង្គការសហប្រជាជាតិនៅក្នុងប្រទេសលីបង់ (UNIFIL) ក្នុងអំឡុងពេលមានអរិភាពកាលពីយប់ថ្ងៃអាទិត្យចុងសប្តាហ៍មុនរវាងអ៊ីស្រាអែល និងក្រុមហេសបូឡា។

លោកបាននិយាយនៅលើវេទិកាប្រព័ន្ធផ្សព្វផ្សាយសង្គមអ៊ិចថា «នេះគ្រាន់តែជាឧប្បត្តិហេតុមួយក្នុងចំណោមឧប្បត្តិហេតុថ្មីៗមួយចំនួន ដែលបានធ្វើឱ្យប៉ះពាល់ដល់សុវត្ថិភាព និងសន្តិសុខរបស់កងកម្លាំងរក្សាសន្តិភាពប៉ុណ្ណោះ»។

លោក ហ្គូតេរេស បានអំពាវនាវដល់គ្រប់ភាគីទាំងអស់ឱ្យគោរពកាតព្វកិច្ចរបស់ពួកគេក្រោមច្បាប់អន្តរជាតិ និងធានាសុវត្ថិភាព និងសន្តិសុខរបស់បុគ្គលិក និងទ្រព្យសម្បត្តិរបស់អង្គការសហប្រជាជាតិ។

នៅពេលមុននេះ កងកម្លាំង UNIFIL បាននិយាយនៅក្នុងសេចក្តីថ្លែងការណ៍មួយថា កងកម្លាំងរក្សាសន្តិភាពម្នាក់ត្រូវបានសម្លាប់យ៉ាងសោកសៅនៅថ្ងៃអាទិត្យ នៅពេលដែលគ្រាប់ផ្លោងមួយបានផ្ទុះនៅទីតាំងរបស់កងកម្លាំង UNIFIL នៅជិតភូមិអាដឈីដ អាល់-គូស៊ី នៅភាគខាងត្បូងប្រទេសលីបង់ ហើយកងកម្លាំងម្នាក់ទៀតបានរងរបួសយ៉ាងធ្ងន់ធ្ងរ។

កងកម្លាំង​ UNIFIL បាននិយាយថា ខ្លួនមិនដឹងពីប្រភពដើមនៃគ្រាប់ផ្លោងនោះទេ។

សេចក្តីថ្លែងការណ៍នោះបាននិយាយថា «យើងបានចាប់ផ្តើមការស៊ើបអង្កេតដើម្បីកំណត់កាលៈទេសៈទាំងអស់»។

អ៊ីស្រាអែលបានវាយប្រហារតាមអាកាសលើប្រទេសលីបង់ និងបានបើកការវាយលុកលើដីគោកនៅភាគខាងត្បូងប្រទេសលីបង់ចាប់តាំងពីការវាយប្រហារឆ្លងកាត់ព្រំដែនដោយក្រុមហេសបូឡានៅថ្ងៃទី០២ ខែមីនា​ ឆ្នាំ២០២៦ មក។

តំបន់នេះស្ថិតក្នុងស្ថានភាពប្រុងប្រយ័ត្នចាប់តាំងពីសហរដ្ឋអាមេរិក និងអ៊ីស្រាអែលបានបើកការវាយលុកតាមអាកាសលើប្រទេសអ៊ីរ៉ង់នៅថ្ងៃទី២៨ខែកុម្ភៈ ឆ្នាំ២០២៦ ដែលបានសម្លាប់មនុស្សជាង ១.៣៤០នាក់រហូតមកដល់ពេលនេះ រួមទាំងមេដឹកនាំកំពូលអ៊ីរ៉ង់ លោក អាយ៉ាតូឡាហ៍ អាលី ខាមេណី(Ayatollah Ali Khamenei) ផងដែរ។

អ៊ីរ៉ង់បានសងសឹកវិញដោយការវាយប្រហារដោយយន្តហោះគ្មានមនុស្សបើក និងមីស៊ីលដែលកំណត់គោលដៅលើប្រទេសអ៊ីស្រាអែល រួមជាមួយប្រទេសហ្ស៊កដានី អ៊ីរ៉ាក់ និងប្រទេសឈូងសមុទ្រដែលកាន់កាប់ទ្រព្យសម្បត្តិយោធាអាម៉េរិក ដែលបណ្តាលឱ្យមានអ្នកស្លាប់ និងខូចខាតដល់ហេដ្ឋារចនាសម្ព័ន្ធ ខណៈដែលរំខានដល់ទីផ្សារ និងអាកាសចរណ៍សកលលោក៕

ដោយ៖ យា ចិន្ដាខន្ដី (ប្រភព៖ AA-AKP)