AKP ភ្នំពេញ ថ្ងៃទី២៦ ខែមីនា ឆ្នាំ២០២៦ -- ប្រទេសឡាវ និងទីភ្នាក់ងារថាមពលបរមាណូអន្តរជាតិ (IAEA) បានចុះហត្ថលេខាលើក្របខ័ណ្ឌកម្មវិធីប្រទេសលើកទីបី (CPF) សម្រាប់ឆ្នាំ២០២៦-២០៣៣ ដោយពង្រឹងកិច្ចសហប្រតិបត្តិការ ដើម្បីគាំទ្រដល់វឌ្ឍនភាពរបស់ប្រទេសឆ្ពោះទៅរកការសម្រេចបាននូវគោលដៅអភិវឌ្ឍន៍ប្រកបដោយចីរភាព (SDGs)។

នៅក្នុងពិធីចុះហត្ថលេខានៅទីក្រុងវីយែន លោក Hua Liu អនុប្រធានទីភ្នាក់ងារ IAEA បានសង្កត់ធ្ងន់ទៅលើតួនាទីរបស់ទីភ្នាក់ងារក្នុងការសហការជាមួយរដ្ឋជាសមាជិក ដើម្បីលើកកម្ពស់ការអនុវត្តបច្ចេកវិទ្យានុយក្លេអ៊ែរដោយសន្តិវិធីសម្រាប់ការអភិវឌ្ឍ ជាពិសេសតាមរយៈគំនិតផ្តួចផ្តើមសហប្រតិបត្តិការបច្ចេកទេស។ លោកបានបញ្ជាក់ពីសារៈសំខាន់នៃការតម្រឹមការអនុវត្ត CPF ជាមួយនឹងអាទិភាពសេដ្ឋកិច្ចសង្គមជាតិ ខណៈដែលធានាសុវត្ថិភាពវិទ្យុសកម្ម និងពង្រីកកម្មវិធីនុយក្លេអ៊ែរក្នុងវិស័យកសិកម្មការថែទាំសុខភាព អាហារូបត្ថម្ភ ការគ្រប់គ្រងទឹក និងបរិស្ថាន។

លោក Hua Liu បានបញ្ជាក់សារជាថ្មីនូវការប្តេជ្ញាចិត្តរបស់ទីភ្នាក់ងារIAEA ក្នុងការបន្តកិច្ចសហប្រតិបត្តិការយ៉ាងជិតស្និទ្ធជាមួយប្រទេសឡាវក្នុងការជំរុញរបៀបវារៈអភិវឌ្ឍន៍របស់ខ្លួន។

ក្នុងរយៈពេលប៉ុន្មានឆ្នាំចុងក្រោយនេះ ទីភ្នាក់ងារ IAEA បានជួយប្រទេសឡាវតាមរយៈការគាំទ្របច្ចេកទេស និងកម្មវិធីកសាងសមត្ថភាពដែលមានគោលបំណងពង្រឹងជំនាញក្នុងការប្រើប្រាស់បច្ចេកវិទ្យានុយក្លេអ៊ែរដោយសន្តិវិធី។ ភាគីទាំងពីរពីមុនបានអនុវត្តវដ្តសហប្រតិបត្តិការCPF សម្រាប់ឆ្នាំ២០១៤-២០១៨ និងសម្រាប់ឆ្នាំ២០២០-២០២៥។

ក្រោមក្របខណ្ឌដែលទើបចុះហត្ថលេខាថ្មី កិច្ចសហប្រតិបត្តិការសម្រាប់ឆ្នាំ២០២៦-២០៣៣ នឹងផ្តោតសំខាន់ទៅលើការគាំទ្រផ្នែកបច្ចេកទេស និងវិជ្ជាជីវៈក្នុងវិស័យទាក់ទងនឹងវិទ្យុសកម្ម និងនុយក្លេអ៊ែរ រួមទាំងការអភិវឌ្ឍធនធានមនុស្ស សមត្ថភាពសុវត្ថិភាពវិទ្យុសកម្មប្រសើរឡើងនិងការអនុវត្តនៅទូទាំងវិស័យឧស្សាហកម្ម ថាមពល កសិកម្ម អាហារូបត្ថម្ភធនធានទឹក ការការពារបរិស្ថាន ការអប់រំ ការស្រាវជ្រាវ និងការធ្វើសមាហរណកម្មអន្តរជាតិ។

ក្របខណ្ឌនេះត្រូវបានគេរំពឹងថានឹងរួមចំណែកដល់ការសម្រេចគោលដៅអភិវឌ្ឍន៍ប្រកបដោយចីរភាពរបស់ប្រទេសឡាវ រួមទាំងការអនុវត្តផែនការអភិវឌ្ឍន៍សេដ្ឋកិច្ចសង្គមជាតិលើកទី១០ របស់ខ្លួនសម្រាប់ឆ្នាំ២០២៦-២០៣០៕

ដោយ៖ យា ចិន្ដាខន្ដី (ប្រភព៖ VNA)