AKP ភ្នំពេញ ថ្ងៃទី២៦ ខែមីនា ឆ្នាំ២០២៦ -- យោងតាមរបាយការណ៍ព័ត៌មានបេឡារុស្សមួយបានចុះផ្សាយកាលពីថ្ងៃពុធថា ប្រធានាធិបតីបេឡារុស្ស លោក អាឡិចសាន់ឌឺ លូកាសេនកូ បានចាប់ផ្តើមដំណើរទស្សនកិច្ចជាផ្លូវការទៅកាន់ប្រទេសកូរ៉េខាងជើង ដើម្បីពិភាក្សាអំពីកិច្ចសហប្រតិបត្តិការក្នុងវិស័យផ្សេងៗ។

យោងតាមរបាយការណ៍របស់ទីភ្នាក់ងារសារព័ត៌មានបេឡារុស្សBelta បានឱ្យដឹងថា មេដឹកនាំបេឡារុស្សរូបនេះកំពុងបំពេញទស្សនកិច្ចចាប់ពីថ្ងៃពុធដល់ថ្ងៃព្រហស្បតិ៍ តាមការអញ្ជើញរបស់មេដឹកនាំកូរ៉េខាងជើងលោក គីម ជុងអ៊ុន (Kim Jong-un) សម្រាប់ការចរចាទ្វេភាគី។

របាយការណ៍នេះបាននិយាយថា «មានផែនការជាច្រើនត្រូវបានធ្វើឡើងដើម្បីពិភាក្សាអំពីវិសាលភាពទាំងមូលនៃមធ្យោបាយសម្រាប់ការជំរុញកិច្ចសហប្រតិបត្តិការរវាងសាធារណរដ្ឋបេឡារុស្ស និងសាធារណរដ្ឋប្រជាធិបតេយ្យប្រជាមានិតកូរ៉េ»។

ទីភ្នាក់ងារ Belta បានរាយការណ៍ថា លោក គីម បានរៀបចំពិធីស្វាគមន៍ជាផ្លូវការសម្រាប់លោក លូកាសេនកូ នៅវិមាន គីម អ៊ីលស៊ុង ដែលមានក្បួនដង្ហែរយោធា និងការសម្តែងភ្លេងជាតិរបស់ប្រទេសទាំងពីរក្នុងចំណោមរបស់ផ្សេងទៀត។

បន្ទាប់ពីពិធីនេះ មេដឹកនាំទាំងពីរបានទៅទស្សនាវិមានរំដោះជាកន្លែងដែលលោក លូកាសេនកូ បានដាក់កម្រងផ្កាជាកិត្តិយសដល់ទាហានសូវៀតដែលបានដួលរលំ ក្នុងអំឡុងពេលរំដោះកូរ៉េពីការគ្រប់គ្រងអាណានិគមរបស់ជប៉ុនក្នុងអំឡុងសង្គ្រាមលោកលើកទីពីរ៕

ដោយ៖ មូល មិនា (ប្រភព៖ យ៉ុនហាប់)