AKP ភ្នំពេញ ថ្ងៃទី២៦ ខែមីនា ឆ្នាំ២០២៦ -- ក្រសួងការបរទេសកូរ៉េខាងត្បូងបាននិយាយថា ប្រទេសកូរ៉េខាងត្បូង និងចិន កាលពីថ្ងៃពុធបានពិភាក្សាអំពីកិច្ចខិតខំប្រឹងប្រែងដើម្បីដោះស្រាយបញ្ហាប្រែប្រួលអាកាសធាតុ រួមទាំងផែនការ និងគោលនយោបាយដើម្បីកាត់បន្ថយការបំភាយឧស្ម័នផ្ទះកញ្ចក់ ក៏ដូចជាវិធីដើម្បីកែលម្អគុណភាពខ្យល់។

ក្រសួងការបរទេសបាននិយាយថា លោក យ៊ុន ជុងហូ (Kyun Jong-ho) ឯកអគ្គរដ្ឋទូតកូរ៉េខាងត្បូងទទួលបន្ទុកការប្រែប្រួលអាកាសធាតុ បានជួបពិភាក្សាជាមួយ លោកស្រី សៀ យីងស៊ាន (Xia Yingxian) អគ្គនាយកទទួលបន្ទុកការប្រែប្រួលអាកាសធាតុនៅក្រសួងអេកូឡូស៊ី និងបរិស្ថានចិនក្នុងអំឡុងពេលនៃគណៈកម្មការរួមគ្នារបស់ពួកគេស្តីពីការប្រែប្រួលអាកាសធាតុនៅទីក្រុងប៉េកាំង។

ភាគីទាំងពីរបានផ្លាស់ប្តូរព័ត៌មានលម្អិតអំពីស្ថានភាពរបស់ពួកគេទាក់ទងនឹងផែនការសកម្មភាពដើម្បីកាត់បន្ថយការបំភាយឧស្ម័នផ្ទះកញ្ចក់ដែលត្រូវបានគេស្គាល់ថាជាការចូលរួមចំណែកជាតិក្រោមកិច្ចព្រមព្រៀងទីក្រុងប៉ារីសស្តីពីការប្រែប្រួលអាកាសធាតុ។

លោក យ៊ុន បានគូសបញ្ជាក់ពីកិច្ចខិតខំប្រឹងប្រែងរបស់ប្រទេសកូរ៉េខាងត្បូងឆ្ពោះទៅរកការផ្លាស់ប្តូរថាមពលកកើតឡើងវិញ ដើម្បីបំពេញតាមការប្តេជ្ញាចិត្តកាត់បន្ថយការបំភាយឧស្ម័នរបស់ខ្លួន ដោយលោកបាននិយាយថា ប្រទេសនេះមានគម្រោងបង្កើតយុទ្ធសាស្ត្រកាត់បន្ថយកាបូនលម្អិតនៅទូទាំងវិស័យឧស្សាហកម្ម សេដ្ឋកិច្ច និងសង្គមរបស់ខ្លួន។

យោងតាមក្រសួងបានឱ្យដឹងថា លោកស្រី សៀ បានណែនាំអំពីគោលបំណង និងគោលនយោបាយពាក់ព័ន្ធរបស់ប្រទេសចិន ក្រោមផែនការប្រែប្រួលអាកាសធាតុរយៈពេលប្រាំឆ្នាំដែលបានប្រកាសថ្មីៗនេះនិងបានបង្ហាញចំណាប់អារម្មណ៍លើគោលនយោបាយទីផ្សារកាបូនរបស់ប្រទេសកូរ៉េខាងត្បូង។

នៅក្នុងកិច្ចពិភាក្សានោះ លោក យ៊ុន ក៏បានស្នើឱ្យប្រទេសទាំងពីរបង្កើនកិច្ចខិតខំប្រឹងប្រែងដើម្បីកែលម្អគុណភាពខ្យល់ ដែលរងផលប៉ះពាល់ដោយផ្ទាល់ពីបញ្ហាការប្រែប្រួលអាកាសធាតុ។ នេះបើយោងតាមក្រសួង៕

ដោយ៖ មូល មិនា (ប្រភព៖ យ៉ុនហាប់)