AKP ភ្នំពេញ ថ្ងៃទី២៥ ខែមីនា ឆ្នាំ២០២៦ -- ទីក្រុងស៊ិនជិនរបស់ប្រទេសចិន កំពុងរៀបចំផែនការសាកល្បងមួយដើម្បីដាក់ឱ្យដំណើរការផ្លូវដឹកជញ្ជូនទំនិញដោយយន្តហោះគ្មានមនុស្សបើក (ដ្រូន) ឆ្លងកាត់ព្រំដែន ដែលមានរយៈកម្ពស់ទាបជាលើកដំបូងទៅកាន់ទីក្រុងហុងកុងក្នុងរយៈពេលមួយឆ្នាំ។ គំនិតផ្តួចផ្តើមនេះ ជាផ្នែកមួយនៃផែនការប្រាំឆ្នាំលើកទី១៥ (ឆ្នាំ២០២៦-២០៣០) របស់ទីក្រុងនេះ ដែលមានគោលបំណងដោះស្រាយឧបសគ្គដឹកជញ្ជូនបែបប្រពៃណី ដូចជាការកកស្ទះ និងការចំណាយខ្ពស់។ ការធ្វើតេស្តដំបូងនឹងផ្តោតទៅលើផ្លូវជាក់លាក់ចំនួនបី ដែលត្រូវបានរចនាឡើងដើម្បីដឹកជញ្ជូនទំនិញដែលងាយនឹងបង្កជាបញ្ហាពេលវេលា ដូចជាឯកសារ កញ្ចប់ពាណិជ្ជកម្មអេឡិចត្រូនិក និងសម្ភារៈវិទ្យាសាស្ត្រជាដើម ក្នុងរយៈពេលតិចជាង ៣០នាទី។

គម្រោងនេះបង្ហាញពីយុទ្ធសាស្ត្រទូលំទូលាយមួយ ដើម្បីធ្វើឱ្យសេដ្ឋកិច្ចជុំវិញច្រកព្រំដែនមានភាពរស់រវើកឡើងវិញ។ ការធ្វើឱ្យប្រសើរឡើងនូវហេដ្ឋារចនាសម្ព័ន្ធសំខាន់ៗកំពុងដំណើរការរួចហើយ រួមទាំងការជួសជុលកំពង់ផែ Huanggang និងការពង្រីកកន្លែងដឹកជញ្ជូនទំនិញនៅអាកាសយានដ្ឋានស៊ិនជិន។ តាមរយៈការរួមបញ្ចូលមជ្ឈមណ្ឌលទាំងនេះជាមួយទីក្រុងភាគខាងជើងរបស់ទីក្រុងហុងកុង មន្ត្រីនានាសង្ឃឹមថានឹងបង្កើតគំរូដឹកជញ្ជូនដែលមានប្រសិទ្ធភាពខ្ពស់ដែលគាំទ្រដល់ការអភិវឌ្ឍដែលមានគុណភាពខ្ពស់នៅទូទាំងតំបន់ឈូងសមុទ្រធំ។

ដោយសម្លឹងមើលទៅមុខ ទីក្រុងស៊ិនជិនមានគម្រោងអនុម័តយុទ្ធសាស្ត្រអភិវឌ្ឍន៍ដែលមានលក្ខណៈខុសប្លែកគ្នាសម្រាប់កំពង់ផែដីគោករបស់ខ្លួន ដោយផ្តោតសំខាន់ទៅលើសេវាកម្មទំនើប ការផ្លាស់ប្តូរបច្ចេកវិទ្យា និងការប្រើប្រាស់ឆ្លងដែន។ ដោយទទួលបានការបំផុសគំនិតពីគំរូអភិវឌ្ឍន៍ទន្លេអឺរ៉ុប ទីក្រុងនេះមានគោលបំណងជំរុញកិច្ចសហប្រតិបត្តិការឧស្សាហកម្មកាន់តែស៊ីជម្រៅជាមួយទីក្រុងហុងកុង។ កិច្ចខិតខំប្រឹងប្រែងទាំងនេះត្រូវបានគេរំពឹងថានឹងប្រែក្លាយតំបន់កំពង់ផែទៅជាក្បាលម៉ាស៊ីនចម្បងសម្រាប់កំណើនសេដ្ឋកិច្ចក្នុងតំបន់ក្នុងរយៈពេលប្រាំឆ្នាំខាងមុខ៕

ដោយ៖ យា ចិន្ដាខន្ដី (ប្រភព៖ ឆាយណាដេលី)