AKP ភ្នំពេញ ថ្ងៃទី២៥ ខែមីនា ឆ្នាំ២០២៦ -- ប្រទេសចិនបានប្រគល់អង្ករចំនួន ៥.០០០តោនទៅឱ្យប្រទេសហ្ស៊ីមបាវ៉េ ដើម្បីជំរុញសន្តិសុខស្បៀងអាហាររបស់ប្រទេសអាហ្វ្រិកខាងត្បូង។

ក្នុងពិធីបរិច្ចាគដែលបានធ្វើឡើងកាលពីថ្ងៃចន្ទ នៅទីក្រុងហារ៉ារ៉េ រដ្ឋធានីនៃប្រទេសនេះ លោក អេដហ្គារ ម៉ូយ៉ូ (Edgar Moyo) រដ្ឋមន្ត្រីក្រសួងសេវាសាធារណៈ ការងារ និងសុខុមាលភាពសង្គមហ្ស៊ីមបាវ៉េ បានមានប្រសាសន៍ថា ការបរិច្ចាគចុងក្រោយនេះនឹងបង្កើនកិច្ចខិតខំប្រឹងប្រែងរបស់រដ្ឋាភិបាលយ៉ាងខ្លាំងក្នុងការកាត់បន្ថយអសន្តិសុខស្បៀងអាហារ និងកាត់បន្ថយផលប៉ះពាល់នៃវិបត្តិអាកាសធាតុ។

លោក ម៉ូយ៉ូ បានមានប្រសាសន៍ថា «កាយវិការនេះមិនមែនគ្រាន់តែជាទង្វើនៃសុច្ឆន្ទៈនោះទេ វាគឺជាសក្ខីភាពដ៏ជ្រាលជ្រៅចំពោះទំនាក់ទំនងយូរអង្វែង និងផ្តល់ផលប្រយោជន៍ទៅវិញទៅមក ដែលបន្តរីកចម្រើនរវាងរដ្ឋាភិបាលហ្ស៊ីមបាវ៉េ និងរដ្ឋាភិបាលចិន។ ភាពជាដៃគូរបស់យើង ដែលមានមូលដ្ឋានលើសាមគ្គីភាព និងសេចក្តីប្រាថ្នាអភិវឌ្ឍន៍រួមគ្នា បានផ្តល់អត្ថប្រយោជន៍ជាក់ស្តែងជាប់លាប់ ជាពិសេសនៅក្នុងគ្រាលំបាក»។

លោកបានមានប្រសាសន៍ថា អាទិភាពនឹងត្រូវបានផ្តល់ដល់គ្រួសារងាយរងគ្រោះ រួមទាំងមនុស្សចាស់ ជំងឺរ៉ាំរ៉ៃ ជនពិការ និងគ្រួសារដែលមានកូនជាមេគ្រួសារ។

លើសពីនេះ រដ្ឋមន្ត្រីបានមានប្រសាសន៍ថា ការគាំទ្រក៏នឹងពង្រីកដល់ជនរងគ្រោះនៃទឹកជំនន់ និងគ្រោះមហន្តរាយធម្មជាតិផ្សេងទៀត ក៏ដូចជាស្ថាប័នបានចុះបញ្ជីដែលផ្តល់ការថែទាំសម្រាប់កុមារងាយរងគ្រោះ មនុស្សចាស់ និងជនពិការ។

ចំណែកលោក ហ្សូ ឌីង (Zhou Ding) ឯកអគ្គរដ្ឋទូតចិនប្រចាំប្រទេសហ្ស៊ីមបាវ៉េ បានមានប្រសាសន៍ថា ជំនួយស្បៀងអាហារនេះបង្ហាញពីមិត្តភាពដ៏កក់ក្តៅរបស់ប្រជាជនចិន និងការប្តេជ្ញាចិត្តដ៏រឹងមាំរបស់ប្រទេសចិនចំពោះសន្តិសុខស្បៀងអាហាររបស់ប្រទេសហ្ស៊ីមបាវ៉េ។

លោក ហ្សូ បានបន្ថែមថា «ប្រទេសចិននៅតែប្តេជ្ញាគាំទ្រដល់កិច្ចខិតខំប្រឹងប្រែងរបស់ប្រទេសហ្ស៊ីមបាវ៉េ ដើម្បីពង្រឹងសន្តិសុខស្បៀងអាហារ និងកសាងភាពធន់ផ្នែកកសិកម្ម មិនត្រឹមតែតាមរយៈជំនួយសង្គ្រោះបន្ទាន់នៅពេលដែលត្រូវការប៉ុណ្ណោះទេ ប៉ុន្តែថែមទាំងតាមរយៈការគាំទ្ររយៈពេលវែងដែលជួយបង្កើនសមត្ថភាពរបស់ខ្លួនសម្រាប់ការអភិវឌ្ឍដោយខ្លួនឯង និងឯករាជ្យភាព»៕

ដោយ៖ មូល មិនា (ប្រភព៖ ភីបផលដេលី)