AKP ភ្នំពេញ ថ្ងៃទី២៣ ខែមីនា ឆ្នាំ២០២៦ -- រដ្ឋមន្ត្រីការបរទេសអ៊ីរ៉ង់ លោកអាបាស់ អារ៉ាកឈី (Abbas Araghchi) បាននិយាយនៅក្នុងបទសម្ភាសន៍មួយជាមួយទីភ្នាក់ងារសារព័ត៌មានក្យូដូរបស់ជប៉ុនថា ទីក្រុងតេអេរ៉ង់«ត្រៀមខ្លួនរួចជាស្រេចដើម្បីអនុញ្ញាត» ឱ្យនាវាដែលភ្ជាប់ជាមួយប្រទេសជប៉ុនឆ្លងកាត់ច្រកសមុទ្រហ័រមុស បន្ទាប់ពីកិច្ចពិគ្រោះយោបល់សមស្របមួយជាមួយទីក្រុងតូក្យូ។

លោកបាននិយាយថា «យើងមិនទាន់បានបិទច្រកសមុទ្រនេះទេ។ វានៅតែបើកចំហ»។ លោក អារ៉ាឈី បានកត់សម្គាល់ថា កិច្ចពិគ្រោះយោបល់ជាមួយទីក្រុងតូក្យូទាក់ទងនឹងការឆ្លងកាត់នាវាដែលភ្ជាប់ជាមួយប្រទេសជប៉ុនឆ្លងកាត់ច្រកសមុទ្រហ័រមុស បានចាប់ផ្តើមរួចហើយ។

មន្ត្រីអ៊ីរ៉ង់បាននិយាយពីមុនថា ពួកគេនឹងមិនអនុញ្ញាតឱ្យទំនិញប្រេងណាមួយដែលទាក់ទងនឹងសហរដ្ឋអាមេរិក និងសម្ព័ន្ធមិត្តរបស់ខ្លួនឆ្លងកាត់ច្រកសមុទ្រហ័រមុសឡើយ។

ទីក្រុងតូក្យូជាប្រពៃណីបានរក្សាទំនាក់ទំនងមិត្តភាពជាមួយទីក្រុងតេអេរ៉ង់។ ទោះជាយ៉ាងណាក៏ដោយ អាជ្ញាធរជប៉ុនតែងតែចៀសវាងការវាយតម្លៃដោយផ្ទាល់ចំពោះការវាយប្រហាររបស់សហរដ្ឋអាមេរិក និងអ៊ីស្រាអែលលើអ៊ីរ៉ង់។ ជាផ្លូវការ ពួកគេគ្រាន់តែបង្ហាញពីគោលជំហររបស់ពួកគេទៅលើភាពមិនអាចទទួលយកបាននៃសាធារណរដ្ឋអ៊ីស្លាមដែលកំពុងអភិវឌ្ឍន៍អាវុធនុយក្លេអ៊ែរ និងបានអំពាវនាវឱ្យមានដំណោះស្រាយការទូត។ដោយនិយាយដូច្នេះ មេដឹកនាំជប៉ុនបានរិះគន់អ៊ីរ៉ង់ចំពោះការវាយប្រហារសងសឹករបស់ខ្លួនលើរដ្ឋឈូងសមុទ្រពែរ្ស។

ប្រទេសជប៉ុនទទួលបានប្រេងប្រហែល ៩៥% របស់ខ្លួនពីបណ្តាប្រទេសនៅមជ្ឈិមបូព៌ា ដោយការផ្គត់ផ្គង់ភាគច្រើនឆ្លងកាត់ច្រកសមុទ្រហ័រមុស៕
ដោយ៖ យា ចិន្ដាខន្ដី (ប្រភព៖ តាសស៍)