AKP ភ្នំពេញ ថ្ងៃទី២០ ខែមីនា ឆ្នាំ២០២៦ -- មន្ត្រីអូស្ត្រាលីម្នាក់បាននិយាយកាលពីពេលថ្មីៗនេះថា ប្រទេសហ្វីលីពីន គឺជាប្រទេសមួយក្នុងចំណោមប្រទេសដែលមានសេដ្ឋកិច្ចទទួលបានការគាំទ្រពីសមាជិកនៃកិច្ចព្រមព្រៀងគ្រប់ជ្រុងជ្រោយ និងជឿនលឿនសម្រាប់ភាពជាដៃគូអន្តរប៉ាស៊ីហ្វិក (CPTPP) ខណៈដែលខ្លួនកំពុងស្វែងរកការចូលរួមជាមួយប្លុកពាណិជ្ជកម្មពហុជាតិសាសន៍មួយនេះ។

ថ្លែងនៅក្នុងសន្និសីទសារព័ត៌មានមួយនៅទីក្រុងប៉ាសាយរបស់ប្រទេសហ្វីលីពីន ឧបការីរដ្ឋមន្ត្រីការបរទេស និងពាណិជ្ជកម្មអូស្ត្រាលី និងអន្តោប្រវេសន៍ លោក ម៉ាត់ ធីសថ្លេតវែធេ (Matt Thistlethwaite) បាននិយាយថា កិច្ចព្រមព្រៀង CPTPP គឺជាកិច្ចព្រមព្រៀងពាណិជ្ជកម្មដែលមានគុណភាពខ្ពស់ដែលកំណត់ស្តង់ដារខ្ពស់ ហើយប្រទេសហ្វីលីពីនកំពុងស្ថិតនៅលើផ្លូវឆ្ពោះទៅរកការសម្រេចបាននូវគោលដៅនោះ។

កិច្ចព្រមព្រៀង CPTPP ឥឡូវនេះមានប្រទេសចំនួន១២ ចូលរួម ដែលរួមមានប្រទេសអូស្ត្រាលី កាណាដា ជប៉ុន ម៉ិកស៊ិកូ នូវែលសេឡង់ សិង្ហបុរីវៀតណាម ប៉េរូ ម៉ាឡេស៊ី ឈីលី ប្រ៊ុយណេ និងចក្រភពអង់គ្លេស។ ប្លុកនេះតំណាងឱ្យប្រជាជនចំនួន ៥៩០លាននាក់ និងមានចំនួនជិត ១៥% នៃសេដ្ឋកិច្ចពិភពលោក។

ទាក់ទងនឹងវិស័យទ្វេភាគី លោក ធីសថ្លេតវែធេ បាននិយាយថា ទីក្រុងកង់បេរ៉ា និងទីក្រុងម៉ានីល មានចំណាប់អារម្មណ៍ទៅវិញទៅមកក្នុងការគាំទ្រពាណិជ្ជកម្មសេរី និងបើកចំហរដោយយុត្តិធម៌នៅក្នុងតំបន់ ហើយអូស្ត្រាលីចង់ពង្រីកទំនាក់ទំនងសេដ្ឋកិច្ចរបស់ខ្លួនជាមួយប្រទេសនេះ។

ពាណិជ្ជកម្មទ្វេភាគីបានកើនឡើងក្នុងរយៈពេលថ្មីៗនេះ និងឈានដល់តម្លៃ ១២ប៊ីលានដុល្លារអាម៉េរិក ហើយជាប្រពៃណីវាផ្តោតសំខាន់ទៅលើវិស័សធនធាន ការអប់រំ និងវិស័យផ្សេងៗទៀត៕

ដោយ៖ យា ចិន្ដាខន្ដី (ប្រភព៖ VNA)