AKP ភ្នំពេញ ថ្ងៃទី១៩ ខែមីនា ឆ្នាំ២០២៦ -- ការវាយប្រហារតាមអាកាសរបស់អ៊ីស្រាអែលបានសម្លាប់មនុស្សយ៉ាងហោចណាស់ ៣៥នាក់ និងរបួស ៦១នាក់ផ្សេងទៀតនៅទូទាំងប្រទេសលីបង់ចាប់តាំងពីព្រឹកថ្ងៃពុធ ខណៈដែលអ៊ីស្រាអែលបន្តពង្រីកការវាយលុករបស់ខ្លួននៅក្នុងប្រទេសអារ៉ាប់មួយនេះ។ នេះបើយោងតាមក្រុមគ្រូពេទ្យ និងប្រព័ន្ធផ្សព្វផ្សាយក្នុងស្រុក។

ទីភ្នាក់ងារសារព័ត៌មានរដ្ឋ NNA បានរាយការណ៍ថា មនុស្ស ០៦នាក់បានស្លាប់ នៅពេលដែលយន្តហោះចម្បាំងបានវាយប្រហារ និងបំផ្លាញផ្ទះចំនួន ៥ខ្នងនៅក្នុងទីក្រុងសូម៉ូ ភាគខាងលិចទីក្រុងបេកា។

យោងតាមក្រសួងសុខាភិបាល បានឱ្យដឹងថា នៅក្នុងទីក្រុងបាល់បេក មនុស្ស ០៤នាក់បានស្លាប់ និង ០៧នាក់រងរបួសនៅក្នុងការវាយប្រហារមួយផ្សេងទៀតរបស់អ៊ីស្រាអែល។

ក្រសួងបានបន្ថែមថា ជនជាតិស៊ីរី ០៤នាក់ក៏បានស្លាប់នៅក្នុងការវាយប្រហារមួយផ្សេងទៀតនៅក្នុងតំបន់ជីបឈីត ក្នុងទីក្រុងណាបាទីផងដែរ។

នាយកដ្ឋានការពារជនស៊ីវិលបាននិយាយថា បុគ្គលិកការពារជនស៊ីវិលចំនួន ១១នាក់បានរងរបួស នៅពេលដែលការវាយប្រហារមួយបានធ្វើឡើងនៅជិតមជ្ឈមណ្ឌលរបស់ពួកគេនៅក្នុងទីក្រុងណាបាទី។

ក្រសួងសុខាភិបាលបាននិយាយថា មនុស្ស ០៣នាក់បានស្លាប់ និងម្នាក់ទៀតរងរបួសនៅក្នុងទីក្រុងហាប់ប៊ូស្ស នៅភាគខាងត្បូងប្រទេសលីបង់ ដោយក្រុមជួយសង្គ្រោះនៅតែស្វែងរកមនុស្ស ០៨នាក់ដែលបានបាត់ខ្លួន។

ក្រសួងបានបន្ថែមថា ការវាយប្រហាររបស់អ៊ីស្រាអែលទៅលើយានយន្តមួយតាមបណ្តោយផ្លូវឆ្នេរសមុទ្ររបស់ទីក្រុងស៊ីដូន បានសម្លាប់មនុស្សពីរនាក់ផ្សេងទៀត រួមទាំងគ្រូពេទ្យសង្គ្រោះបន្ទាន់ម្នាក់ និងម្នាក់ទៀតរងរបួស។

យោងតាមប្រព័ន្ធផ្សព្វផ្សាយរដ្ឋ បានឱ្យដឹងថា ការវាយប្រហារបន្ថែមបានសម្លាប់មនុស្សម្នាក់នៅបូច កាល់ឡាវីយ៉ា និងបីនាក់ផ្សេងទៀតនៅកាណារីត។

ក្រសួងសុខាភិបាលបាននិយាយថា នៅរដ្ឋធានីបេរូត យ៉ាងហោចណាស់មនុស្ស ១២នាក់បានស្លាប់ និង ៤១នាក់រងរបួសក្នុងការវាយប្រហារចំនួនបីលើកដែលផ្តោតទៅលើតំបន់បាស្តា និងតំបន់ហ្សូកាក អាល់-ប្លាត។

អាជ្ញាធរលីបង់បាននិយាយថា អ៊ីស្រាអែលបានចេញការព្រមានជម្លៀសសម្រាប់តំបន់ជាច្រើននៅក្នុងប្រទេសលីបង់ ដែលបង្កឱ្យមានការភ័យស្លន់ស្លោក្នុងចំណោមជនស៊ីវិល រួមទាំងជនភៀសខ្លួននៅទីក្រុងស៊ូដូនផងដែរ។

យោងតាមអាជ្ញាធរលីបង់ បាន​ឱ្យដឹងថា យ៉ាងហោចណាស់មនុស្ស ៩១២នាក់ត្រូវបានសម្លាប់ និង ២.២២១នាក់រងរបួសក្នុងការវាយប្រហាររបស់អ៊ីស្រាអែលនៅទូទាំងប្រទេសលីបង់ចាប់តាំងពីថ្ងៃទី០២ ខែមីនា ឆ្នាំ២០២៦ មក។

ការកើនឡើងនាពេលបច្ចុប្បន្ននេះបានកើតឡើងបន្ទាប់ពីការវាយលុករួមគ្នារវាងសហរដ្ឋអាមេរិក និងអ៊ីស្រាអែលទៅលើប្រទេសអ៊ីរ៉ង់ ដែលបានសម្លាប់មនុស្សប្រហែល ១.៣០០នាក់ចាប់តាំងពីថ្ងៃទី២៨ ខែកុម្ភៈ ឆ្នាំ២០២៦។ ទីក្រុងតេអេរ៉ង់បានសងសឹកវិញដោយការវាយប្រហារដោយយន្តហោះគ្មានមនុស្សបើក និងមីស៊ីលដែលផ្តោតទៅលើប្រទេសអ៊ីស្រាអែល រួមជាមួយប្រទេសហ្ស៊កដានី អ៊ីរ៉ាក់ និងប្រទេសនៅឈូងសមុទ្រ ដែលខ្លួនបាននិយាយថា ខ្លួនកំពុងកំណត់គោលដៅលើទ្រព្យសម្បត្តិយោធាអាម៉េរិក៕

ដោយ៖ យា ចិន្ដាខន្ដី (ប្រភព៖ AA-AKP)