AKP ភ្នំពេញ ថ្ងៃទី១៩ ខែមីនា ឆ្នាំ២០២៦ -- កងកម្លាំងការពារជាតិអ៊ីស្រាអែល (IDF) បាននិយាយនៅក្នុងសេចក្តីថ្លែងការណ៍មួយថា រដ្ឋមន្ត្រីក្រសួងស៊ើបការណ៍សម្ងាត់អ៊ីរ៉ង់ លោក អេសស្មែល ខាទីប (Esmaeil Khatib) ត្រូវបានសម្លាប់នៅក្នុងការវាយប្រហារគោលដៅមួយនៅក្នុងទីក្រុងតេអេរ៉ង់កាលពីយប់ម្សិលមិញ។

សេចក្តីថ្លែងការណ៍នេះបានសរសេរថា «ពេញមួយយប់ (ថ្ងៃពុធ) កងទ័ពអាកាសអ៊ីស្រាអែលដែលធ្វើសកម្មភាពលើចារកម្មរបស់ IDF បានកម្ចាត់រដ្ឋមន្ត្រីក្រសួងស៊ើបការណ៍សម្ងាត់អ៊ីរ៉ង់ លោក អេសស្មែល ខាទីប នៅក្នុងការវាយប្រហារគោលដៅមួយនៅទីក្រុងតេអេរ៉ង់»។

យោងតាមយោធាអ៊ីស្រាអែល បានឱ្យដឹងថា «ក្រសួងស៊ើបការណ៍សម្ងាត់អ៊ីរ៉ង់មានសមត្ថភាពស៊ើបការណ៍សម្ងាត់កម្រិតខ្ពស់ ដោយត្រួតពិនិត្យការឃ្លាំមើល ចារកម្ម និងការអនុវត្តប្រតិបត្តិការសម្ងាត់ទូទាំងពិភពលោក ជាពិសេសប្រឆាំងនឹងរដ្ឋអ៊ីស្រាអែល»៕

ដោយ៖ យា ចិន្ដាខន្ដី (ប្រភព៖ តាសស៍)