AKP ភ្នំពេញ ថ្ងៃទី១៨ ខែមីនា ឆ្នាំ២០២៦ -- រដ្ឋមន្ត្រីការបរទេសអ៊ីរ៉ង់លោក សេយេដ អាប់បាស់ អារ៉ាកជី (Seyed Abbas Araghchi) បានបដិសេធយ៉ាងដាច់អហង្ការថា លោកមានទំនាក់ទំនងថ្មីជាមួយបេសកជនពិសេសរបស់ប្រធានាធិបតីសហរដ្ឋអាមេរិក លោក ស្ទេវ វីតកូហ្វ (Steve Witkoff) ។

លោកបានធ្វើការកត់សម្គាល់នេះនៅក្នុងការបង្ហោះមួយនៅលើវេទិកាប្រព័ន្ធផ្សព្វផ្សាយសង្គមអ៊ិច កាលពីព្រឹកថ្ងៃអង្គារ នៅពេលពេលដែលលោកកំពុងឆ្លើយតបទៅនឹងរបាយការណ៍មួយដោយប្រព័ន្ធផ្សព្វផ្សាយអាម៉េរិកAxios បានអះអាងដូច្នេះ ខណៈពេលដែលយុទ្ធនាការយោធាដែលបានចាប់ផ្តើមដោយសហរដ្ឋអាមេរិក និងអ៊ីស្រាអែលប្រឆាំងនឹងអ៊ីរ៉ង់បានចូលដល់ថ្ងៃទី១៨ ។

លោក អារ៉ាកជី បាននិយាយថា «ទំនាក់ទំនងចុងក្រោយរបស់លោកជាមួយលោក វីតកូហ្វគឺមុនពេលការសម្រេចចិត្តពីនិយោជករបស់លោកក្នុងការសម្លាប់ការទូតជាមួយនឹងការវាយប្រហារយោធាខុសច្បាប់មួយផ្សេងទៀតលើអ៊ីរ៉ង់»។ លោកបានបន្ថែមថា «ការអះអាងណាមួយដែលផ្ទុយពីនេះហាក់ដូចជាមានបំណងបំភាន់ពាណិជ្ជករប្រេង និងសាធារណជន»។

នៅថ្ងៃទី២៨ ខែកុម្ភៈ អ៊ីស្រាអែល និងសហរដ្ឋអាមេរិកបានបើកការវាយប្រហាររួមគ្នាលើទីក្រុងតេអេរ៉ង់ និងប្រទេសអ៊ីរ៉ង់ ដោយបានសម្លាប់មេដឹកនាំកំពូល លោក អាលី ខាមីណី (Ali Khamenei) មេបញ្ជាការយោធាជាន់ខ្ពស់ និងជនស៊ីវិល។ អ៊ីរ៉ង់បានឆ្លើយតបតាមរយៈការវាយប្រហារដោយមីស៊ីល និងយន្តហោះគ្មានមនុស្សបើកជាច្រើនលើក ដែលកំណត់គោលដៅលើទ្រព្យសម្បត្តិ និងមូលដ្ឋានទ័ពរបស់អ៊ីស្រាអែល និងសហរដ្ឋអាមេរិកនៅតំបន់មជ្ឈិមបូព៌ា។

ថ្លែងនៅក្នុងសន្និសីទសារព័ត៌មានមួយនៅទីក្រុងតេអេរ៉ង់កាលពីថ្ងៃចន្ទលោក អារ៉ាកជី បានសង្កត់ធ្ងន់ថា អ៊ីរ៉ង់មិនបានផ្ញើសារណាមួយទៅកាន់សហរដ្ឋអាមេរិកដើម្បីស្នើសុំបទឈប់បាញ់នោះទេ ដោយលោកបានកត់សម្គាល់ថា សង្គ្រាមត្រូវតែបញ្ចប់តាមរបៀបមួយដែលវានឹងមិនកើតឡើងម្តងទៀតនាពេលអនាគត៕

ដោយ៖ មូល មិនា (ប្រភព៖ ស៊ីនហួ)