AKP ភ្នំពេញ ថ្ងៃទី១៧ ខែមីនា ឆ្នាំ២០២៦ -- លោក អ៊ែរឡាងហ្កា ហាតាតូ (Airlangga Hartarto) រដ្ឋមន្ត្រីក្រសួងសម្របសម្រួលកិច្ចការសេដ្ឋកិច្ចរបស់ប្រទេសឥណ្ឌូណេស៊ី បាននិយាយថា ប្រទេសឥណ្ឌូណេស៊ីមានសក្តានុពលក្លាយជាប្រទេសមួយក្នុងចំណោមប្រទេសដែលមានសេដ្ឋកិច្ចធំជាងគេទាំងប្រាំរបស់ពិភពលោកនៅត្រឹមឆ្នាំ២០៥០ ប្រសិនបើប្រទេសនេះរក្សាបាននូវសន្ទុះកំណើនបច្ចុប្បន្ន និងកំណែទម្រង់រចនាសម្ព័ន្ធរបស់ខ្លួន។

លោក អ៊ែរឡាងហ្កា បានសម្តែងសុទិដ្ឋិនិយមអំពីការរំពឹងទុករយៈពេលខ្លី ដោយបានបង្ហាញថា កំណើនសេដ្ឋកិច្ចរបស់ប្រទេសឥណ្ឌូណេស៊ីនៅក្នុងឆ្នាំ២០២៦ អាចឈានដល់ប្រហែល ៥,៤%។ យោងតាមលោក បានឱ្យដឹងថាមូលដ្ឋានគ្រឹះនៃសេដ្ឋកិច្ចក្នុងស្រុកនៅតែមានស្ថេរភាព ដែលបានបង្ហាញដោយអតិរេកពាណិជ្ជកម្មរយៈពេល ៦៩ខែជាប់ៗគ្នា កម្រិតសុវត្ថិភាពនៃទុនបម្រុងប្តូរប្រាក់បរទេស និងអតិផរណាត្រូវបានគ្រប់គ្រងក្នុងចន្លោះគោលដៅ។

រដ្ឋាភិបាលឥណ្ឌូណេស៊ីកំពុងពន្លឿនយុទ្ធសាស្ត្រមួយដើម្បីពង្រឹងការសម្របសម្រួលរវាងវិស័យសាធារណៈ និងឯកជន ដោយលើកកម្ពស់ឧស្សាហូបនីយកម្ម ការផ្លាស់ប្តូរឌីជីថល និងការអភិវឌ្ឍសេដ្ឋកិច្ចបៃតង។ ការផ្តោតសំខាន់ទៅលើគោលនយោបាយរួមមាន ហេដ្ឋារចនាសម្ព័ន្ធយុទ្ធសាស្ត្រ ធនធានរ៉ែនៅខ្សែសង្វាក់ផ្គត់ផ្គង់ ការអភិវឌ្ឍយានយន្តអគ្គិសនីថាមពលកកើតឡើងវិញ និងការពង្រឹងខ្សែសង្វាក់ផ្គត់ផ្គង់ក្នុងស្រុក។

លោក អ៊ែរឡាងហ្កា បានសង្កត់ធ្ងន់ថា ប្រទេសឥណ្ឌូណេស៊ីត្រៀមខ្លួនរួចជាស្រេចដើម្បីពង្រីកកិច្ចសហប្រតិបត្តិការជាមួយដៃគូក្នុងតំបន់ជាពិសេសនៅក្នុងក្របខ័ណ្ឌរបស់អាស៊ាន និងកិច្ចព្រមព្រៀងពាណិជ្ជកម្មសេរី ដើម្បីបង្កើនភាពធន់នៃសេដ្ឋកិច្ចពិភពលោកក្នុងចំណោមការប្រែប្រួលភូមិសាស្ត្រនយោបាយ។

លោក​បាន​និយាយ​ថា តំបន់អាស៊ី​មាន​សក្តានុពល​ក្នុង​ការ​ក្លាយ​ជា​មហាអំណាច​សេដ្ឋកិច្ច​ចម្បង​របស់​ពិភពលោក ប្រសិនបើ​វា​នៅ​តែ​ប្តេជ្ញា​ចិត្ត​ចំពោះ​កិច្ច​សហប្រតិបត្តិការ​ក្នុង​តំបន់​ដែល​បើកចំហ និង​បរិយាប័ន្ន។ តំបន់​នេះ​ត្រូវ​បាន​ព្យាករ​ថា​នឹង​រួមចំណែក​ប្រហែល ៥២% នៃផលិតផលក្នុងស្រុកសុប (GDP) របស់សកលលោក​នៅត្រឹម​ឆ្នាំ២០៥០។

ដោយ​លើក​ឡើង​ពី​ការ​ព្យាករណ៍​រយៈពេល​វែង លោក​បាននិយាយ​ថានៅត្រឹម​ឆ្នាំ២០៥០ ប្រទេសចិន​អាច​សម្រេច​បាន GDP តម្លៃ ៥៨ទ្រី​លាន​ដុល្លារអាម៉េរិក ឥណ្ឌា ៤៤ទ្រី​លាន​ដុល្លារអាម៉េរិក ខណៈ​ដែល​ឥណ្ឌូណេស៊ី​ត្រូវ​បាន​គេ​រំពឹង​ថា​នឹង​សម្រេច​បានពី ១០-១១ទ្រី​លាន​ដុល្លារអាម៉េរិក ដែល​ជាប់​ចំណាត់​ថ្នាក់​លេខ​បី​នៅក្នុងតំបន់​អាស៊ី និង​ក្នុង​ចំណោម​ប្រទេស​មាន​សេដ្ឋកិច្ច​ធំ​បំផុត​ទាំង​ប្រាំ​នៅ​ទូទាំង​ពិភពលោក។

ដើម្បី​សម្រេច​បានគោលដៅ​នេះ ឥណ្ឌូណេស៊ី​ត្រូវ​បាន​ណែនាំ​ឱ្យ​រក្សា​កំណើន​ប្រកប​ដោយ​ចីរភាព​លើស​ពី ៥% ក្នុង​មួយ​ឆ្នាំ ពន្លឿន​កំណែទម្រង់​ស្ថាប័ន បង្កើន​គុណភាព​ធនធាន​មនុស្ស​របស់​ខ្លួន និង​បង្កើន​ផលិតភាព​ការងារ។ គុណសម្បត្តិ​របស់​ខ្លួន​នៃ​ប្រជាជន​វ័យក្មេង ទីផ្សារ​ក្នុង​ស្រុក​ដ៏​ធំ និង​ធនធាន​ដ៏​សម្បូរបែប​ត្រូវ​បាន​ចាត់​ទុក​ថា​ជា​កត្តា​ជំរុញ​ដ៏​សំខាន់​សម្រាប់​មហិច្ឆតា​រយៈពេល​វែង​របស់​ប្រទេសសេដ្ឋកិច្ច​ធំ​បំផុត​របស់តំបន់​អាស៊ីអាគ្នេយ៍មួយនេះ៕
ដោយ៖ យា ចិន្ដាខន្ដី (ប្រភព៖ VNA)