AKP ភ្នំពេញ ថ្ងៃទី១១ ខែមីនា ឆ្នាំ២០២៦ -- រដ្ឋមន្ត្រីការបរទេសអ៊ីរ៉ង់ លោកសេយេដ​ អាប់បាស់ អារ៉ាកជី (Seyed Abbas Araghchi) និងសមភាគីអេហ្ស៊ីប លោក បាដឺ អាប់ដេលឡាតទី (Badr Abdelatty) បាននិយាយកាលពីថ្ងៃអង្គារអំពីការវិវត្តចុងក្រោយបំផុតនៅតំបន់អាស៊ីខាងលិច ដោយសង្កត់ធ្ងន់លើទាំងក្តីបារម្ភផ្នែកសន្តិសុខ និងកិច្ចខិតខំប្រឹងប្រែងផ្នែកការទូត។

យោងតាមសេចក្តីថ្លែងការណ៍មួយពីក្រសួងការបរទេសអ៊ីរ៉ង់ បានឱ្យដឹងថា នៅក្នុងការសន្ទនាតាមទូរស័ព្ទ លោក អារ៉ាកជី បានគូសបញ្ជាក់ពីការត្រៀមខ្លួនរបស់អ៊ីរ៉ង់ក្នុងការអនុវត្ត        «សិទ្ធិស្របច្បាប់ក្នុងការការពារខ្លួន»និងផ្តល់ការឆ្លើយតប «យ៉ាងម៉ឺងម៉ាត់» ចំពោះ «ការឈ្លានពាន និងឧក្រិដ្ឋកម្ម» របស់សហរដ្ឋអាមេរិក និងអ៊ីស្រាអែល។ លោកបាននិយាយថាការវាយប្រហាររបស់អ៊ីរ៉ង់លើមូលដ្ឋាន និងទ្រព្យសម្បត្តិរបស់សហរដ្ឋអាមេរិកនៅក្នុងតំបន់នេះ ស្ថិតនៅក្រោមសិទ្ធិរបស់ប្រទេសក្នុងការការពារខ្លួន និងទប់ទល់នឹងការវាយប្រហារ។

លោក អារ៉ាកជី ក៏បាននិយាយផងដែរថា អ៊ីរ៉ង់ស្វែងរកការរក្សាទំនាក់ទំនង «ជាមិត្តភាព និងជាបងប្អូន» ជាមួយប្រទេសក្នុងតំបន់ និងលើកកម្ពស់កិច្ចសហប្រតិបត្តិការ ដើម្បីធានាស្ថិរភាព និងសន្តិសុខដោយគ្មានការជ្រៀតជ្រែកពីបរទេស។

សេចក្តីថ្លែងការណ៍របស់អ៊ីរ៉ង់បាននិយាយថា លោក អាប់ដេលឡាតទីបានសម្តែងការព្រួយបារម្ភអំពីការកើនឡើងនៃភាពតានតឹង និងបានគូសបញ្ជាក់ពីកិច្ចខិតខំប្រឹងប្រែងផ្នែកការទូតរបស់អេហ្ស៊ីប ដើម្បីកាត់បន្ថយអរិភាពក្នុងតំបន់។

ការផ្លាស់ប្ដូរ​យោបល់​គ្នា​នេះ​កើតឡើង​ចំពេល​ជម្លោះ​ដែល​កំពុង​បន្ត​កើតមាន​ដែល​បាន​ចាប់ផ្ដើម​កាលពី​ថ្ងៃទី២៨ ខែកុម្ភៈ នៅពេលដែល​អ៊ីស្រាអែល និង​សហរដ្ឋអាមេរិក​បាន​បើក​ការវាយប្រហារ​រួមគ្នា​លើ​ទីក្រុង​តេអេរ៉ង់ និង​ប្រទេស​អ៊ីរ៉ង់​ ដោយ​បាន​សម្លាប់​អតីត​មេដឹកនាំ​កំពូល​លោក អាលី ខាមេណី (Ali Khamenei) មេបញ្ជាការ​យោធា​ជាន់ខ្ពស់ និង​ជនស៊ីវិល។អ៊ីរ៉ង់​បាន​សងសឹក​ដោយ​ការវាយប្រហារ​ដោយ​មីស៊ីល និង​យន្តហោះ​គ្មាន​មនុស្ស​បើក​ដែល​កំណត់​គោលដៅ​លើ​ទ្រព្យសម្បត្តិ​របស់​អ៊ីស្រាអែល និង​សហរដ្ឋអាមេរិក​ទូទាំង​តំបន់មជ្ឈិមបូព៌ា៕

ដោយ៖ មូល មិនា (ប្រភព៖ ស៊ីនហួ)