AKP ភ្នំពេញ ថ្ងៃទី១១ ខែមីនា ឆ្នាំ២០២៦ -- ប្រទេសចិនបានបរិច្ចាគទឹកប្រាក់ចំនួន ២លានដុល្លារអាម៉េរិក ដើម្បីជួយសហគមន៍ដែលរងផលប៉ះពាល់ដោយគ្រោះរាំងស្ងួតដែលកំពុងបន្តកើតមាននៅទូទាំងប្រទេសសូម៉ាលី ជាកន្លែងដែលមនុស្សជិត ៦,៥លាននាក់ត្រូវបានគេព្យាករថានឹងប្រឈមមុខនឹងអសន្តិសុខស្បៀងអាហារធ្ងន់ធ្ងរ។ លោក វ៉ាង យូ (Wang Yu) ឯកអគ្គរដ្ឋទូតចិនប្រចាំប្រទេសសូម៉ាលី ដែលបានប្រគល់អំណោយដល់ទីភ្នាក់ងារគ្រប់គ្រងគ្រោះមហន្តរាយសូម៉ាលី (SoDMA) បានសន្យាគាំទ្រដល់កិច្ចខិតខំប្រឹងប្រែងឆ្លើយតបនឹងគ្រោះរាំងស្ងួតរបស់រដ្ឋាភិបាលសូម៉ាលី។ លោក វ៉ាង បានមានប្រសាសន៍ថា «បេះដូងរបស់យើងគឺនៅជាមួយប្រជាជនសូម៉ាលី។ នៅក្នុងខែធ្នូ ឆ្នាំ២០២៥ រដ្ឋាភិបាលចិនបានផ្តល់ជំនួយជាសាច់ប្រាក់ចំនួន ១លានដុល្លារអាម៉េរិកសម្រាប់ការសង្គ្រោះគ្រោះរាំងស្ងួតនៅតំបន់ Awdal។ នៅពេលនោះ ប្រទេសចិនគឺជាប្រទេសធំដំបូងគេដែលផ្តល់ជំនួយសង្គ្រោះដល់ប្រទេសសូម៉ាលី»។ «ថ្ងៃនេះ ខ្ញុំចង់ប្រកាសថា រដ្ឋាភិបាលចិននឹងផ្តល់ជំនួយមនុស្សធម៌ថ្មីមួយ ជាជំនួយជាសាច់ប្រាក់ចំនួន ២លានដុល្លារអាម៉េរិក ដើម្បីគាំទ្រដល់ការផ្គត់ផ្គង់ទឹក មណ្ឌលសុខភាព និងគម្រោងផ្តល់ជំនួយមនុស្សធម៌នៅក្នុងតំបន់ដែលរងផលប៉ះពាល់ដោយគ្រោះមហន្តរាយមួយចំនួន»។ ឯកអគ្គរដ្ឋទូតរូបនេះបាននិយាយថា ទីក្រុងប៉េកាំងនឹងបន្តគាំទ្រប្រជាជនសូម៉ាលី ជាពិសេសនៅក្នុងកិច្ចខិតខំប្រឹងប្រែងឆ្លើយតបនឹងគ្រោះរាំងស្ងួត និងគំនិតផ្តួចផ្តើមបង្ការគ្រោះមហន្តរាយ។ លោកក៏បានសង្កត់ធ្ងន់លើសារៈសំខាន់នៃការពង្រឹងកិច្ចសហប្រតិបត្តិការរវាងប្រទេសទាំងពីរ ជាពិសេសនៅក្នុងជំនួយមនុស្សធម៌ និងការអភិវឌ្ឍសង្គម។ លោក ម៉ូហាមូដ ម៉ូអាល់លីម អាប់ឌុលឡេ (Mohamud Moallim Abdulle) ស្នងការទីភ្នាក់ងារ SoDMA បានថ្លែងអំណរគុណដល់ប្រទេសចិនចំពោះការគាំទ្រនេះ ដោយលោកបាននិយាយថា ជំនួយហិរញ្ញវត្ថុនេះនឹងជួយជួយដល់សហគមន៍ដែលរងផលប៉ះពាល់ដោយគ្រោះរាំងស្ងួតនៅទូទាំងស្រុកចំនួន ៧២ រួមទាំងស្រុកចំនួន ៤៥ ដែលប្រឈមមុខនឹងស្ថានភាពអាសន្នធ្ងន់ធ្ងរ ដោយអាទិភាពត្រូវបានផ្តល់ទៅឱ្យកុមារ ស្ត្រី និងគ្រួសារងាយរងគ្រោះ៕ ដោយ៖ មូល មិនា (ប្រភព៖ ភីបផលដេលី)