AKP ប៉េកាំង ថ្ងៃទី០៧ ខែមីនា ឆ្នាំ២០២៦ -- ជាមួយនឹងការគាំទ្រផ្នែកតម្រូវការ ប្រទេសចិននឹងបង្កើនកិច្ចខិតខំប្រឹងប្រែងដើម្បីគាំទ្រដល់ឧស្សាហកម្មថ្មីៗ និងអភិវឌ្ឍកម្លាំងផលិតភាពដែលមានគុណភាពថ្មីនៅឆ្នាំនេះ។ នេះបើយោងតាមការឱ្យដឹងពីបណ្តាមន្រ្តីជាន់ខ្ពស់ចិនបាននិយាយនៅក្នុងសន្និសីទសារព័ត៌មានមួយកាលពីថ្ងៃសុក្រម្សិលមិញនេះនៅទីក្រុងប៉េកាំង។

រដ្ឋមន្ត្រីក្រសួងហិរញ្ញវត្ថុ លោក ឡាន ហ្វូអាន (Lan Fo'an) បាននិយាយនៅក្នុងសន្និសីទសាព័ត៌មាននោះថា ថវិកាសារពើពន្ធប្រមាណជិត១,៣ទ្រីលានយន់នឹងត្រូវបានបែងចែកនៅក្នុងឆ្នាំនេះ ដើម្បីគាំទ្រដល់ការអភិវឌ្ឍវិទ្យាសាស្ត្រ និងបច្ចេកវិទ្យា ដែលកើនឡើង ៧,១% ពីឆ្នាំមុន។

នៅក្នុងនោះដែរ លោក ចេង ស្សានជី (Zheng Shanjie) ប្រធានគណៈកម្មការអភិវឌ្ឍន៍ និងកំណែទម្រង់ជាតិ បាននិយាយថា ប្រទេសចិននឹងពង្រឹងចលនារបស់ខ្លួនដើម្បីធ្វើទំនើបកម្មប្រព័ន្ធឧស្សាហកម្ម ដោយលើកកម្ពស់ការធ្វើសមាហរណកម្មកាន់តែស៊ីជម្រៅនៃនវានុវត្តន៍បច្ចេកវិទ្យានិងឧស្សាហកម្ម ព្រមទាំងការផលិតកម្រិតខ្ពស់ និងសេវាកម្មទំនើបៗ ក្នុងកិច្ចខិតខំប្រឹងប្រែងដើម្បីពន្លឿនការធ្វើឱ្យប្រសើរឡើងនូវម៉ាស៊ីនសេដ្ឋកិច្ចចាស់ៗ និងលើកកម្ពស់កម្លាំងជំរុញថ្មីៗ។

បញ្ញាសិប្បនិម្មិត (AI) ក៏ត្រូវបានគេរំពឹងថានឹងដើរតួនាទីយ៉ាងសំខាន់ផងដែរ ខណៈដែលបច្ចេកវិទ្យា AI កំពុងរីករាលដាលយ៉ាងឆាប់រហ័សនៅទូទាំងឧស្សាហកម្មផ្សេងៗនៅក្នុងប្រទេសចិន។ លោក ចេង បាននិយាយថារដ្ឋាភិបាលនឹងបន្តជំរុញគំនិតផ្តួចផ្តើម «AI Plus» របស់ខ្លួន ដោយបានព្យាករណ៍ថា ឧស្សាហកម្មដែលទាក់ទងនឹង AI នឹងមានតម្លៃជាង ១០ទ្រីលានយន់ នៅចុងបញ្ចប់នៃរយៈពេលនៃផែនការប្រាំឆ្នាំលើកទី១៥(ឆ្នាំ២០២៦-២០៣០)។

ប្រទេសចិនក៏នឹងផ្លាស់ប្តូរដើម្បីជំរុញឧស្សាហកម្មសសរស្តម្ភចំនួនប្រាំមួយនៅក្នុងឆ្នាំនេះដែរ ដែលរួមទាំងសៀគ្វីរួមបញ្ចូលគ្នា សេដ្ឋកិច្ចរយៈកម្ពស់ទាប និងមនុស្សយន្តឆ្លាតវៃ។ លោក ចេង បាននិយាយថា វិស័យដែលមានតម្លៃសរុបប្រមាណជិត ៦ទ្រីលានយន់កាលពីឆ្នាំមុនទាំងនេះ ត្រូវបានគេរំពឹងថានឹងលើសពី ១០ទ្រីលានយន់នៅត្រឹមឆ្នាំ២០៣០។

លោក ចេង បានបន្ថែមថា ការផលិតបច្ចេកវិទ្យាខ្ពស់បានរួមចំណែក២៦% នៃកំណើនឧស្សាហកម្មរបស់ប្រទេសចិនកាលពីឆ្នាំមុន ហើយវិស័យដែលមានកំណើនខ្ពស់ជាច្រើនទៀតត្រូវបានគេរំពឹងថានឹងលេចចេញជារូបរាងនៅក្នុងប៉ុន្មានឆ្នាំខាងមុខ ដោយទីផ្សារកម្រិតពាន់ពាន់លានយន់ជាច្រើនកំពុងត្រៀមខ្លួនរួចជាស្រេចដើម្បីលេចចេញជារូបរាងនាពេលអនាគត ដើម្បីបង្កើតម៉ាស៊ីនថ្មីសម្រាប់ការអភិវឌ្ឍដែលមានគុណភាពខ្ពស់៕

ដោយ៖ យា ចិន្ដាខន្ដី (រូបភាព៖ ស៊ីនហួ)