AKP ប៉េកាំង ថ្ងៃទី០៥ ខែមីនា ឆ្នាំ២០២៦ -- ស្របតាមអនុសាសន៍របស់គណៈកម្មាធិការកណ្តាលនៃបក្សកុម្មុយនិស្តចិន សម្រាប់ការបង្កើតផែនការប្រាំឆ្នាំលើកទី១៥ សម្រាប់ការអភិវឌ្ឍសេដ្ឋកិច្ច និងសង្គមជាតិក្រុមប្រឹក្សារដ្ឋបានរៀបចំសេចក្តីព្រាងផែនការប្រាំឆ្នាំលើកទី១៥ សម្រាប់ការអភិវឌ្ឍសេដ្ឋកិច្ច និងសង្គមជាតិនៃសាធារណរដ្ឋប្រជាមានិតចិន(ឆ្នាំ២០២៦-២០៣០) ដែលត្រូវបានដាក់ជូនសម័យប្រជុំលើកទី៤ នៃសភាតំណាងប្រជាជនទូទាំងប្រទេសចិនលើកទី១៤ ដែលកំពុងប្រព្រឹត្តទៅនៅទីក្រុងប៉េកាំងនាព្រឹកថ្ងៃព្រហស្បតិ៍ ទី០៥ ខែមីនា ឆ្នាំ២០២៦ នេះ សម្រាប់ការពិនិត្យមើល ហើយដើម្បីសម្រេចគោលបំណងសំខាន់ៗ ដែលបានដាក់ចេញនៅក្នុងអនុសាសន៍របស់គណៈកម្មាធិការកណ្តាលបក្ស សេចក្តីព្រាងផែនការនេះបានបញ្ជាក់ពីសូចនាករសំខាន់ៗ ដែលគ្របដណ្តប់លើវិស័យជាយុទ្ធសាស្រ្តចម្បងមួយចំនួន។

នៅក្នុងវិស័យអភិវឌ្ឍន៍សេដ្ឋកិច្ច សូចនាករចំនួនបីត្រូវបានស្នើឡើងទាក់ទងនឹងកំណើន រចនាសម្ព័ន្ធ និងប្រសិទ្ធភាព។ ដោយពិចារណាទៅលើការវិវឌ្ឍដែលកំពុងវិវត្តទាំងនៅក្នុងស្រុក និងក្រៅប្រទេស និងកត្តាពាក់ព័ន្ធផ្សេងទៀត ហើយដោយគិតគូរពីអ្វីដែលជាតម្រូវការ និងអ្វីដែលអាចធ្វើទៅបាន ដោយវាត្រូវបានស្នើឡើងថា ផលិតផលក្នុងស្រុកសរុប (GDP) គួរតែបន្តកើនឡើងក្នុងចន្លោះសមស្រប ដោយអត្រាកំណើនប្រចាំឆ្នាំត្រូវបានកំណត់ដោយផ្អែកលើលក្ខខណ្ឌជាក់ស្តែង ដែលវានឹងដាក់ចេញជាគ្រឹះរឹងមាំសម្រាប់សម្រេចគោលដៅនៃការបង្កើនទ្វេដងនៃផលិតផលក្នុងស្រុកសរុប(GDP) ក្នុងមនុស្សម្នាក់ៗរបស់ប្រទេសចិនកាលពីក្នុងឆ្នាំ២០២០ នៅត្រឹមឆ្នាំ២០៣៥ ដើម្បីឈានដល់កម្រិតប្រទេសដែលមានការអភិវឌ្ឍមធ្យម។

នៅក្នុងវិស័យនវានុវត្តន៍ សូចនាករចំនួនបីត្រូវបានស្នើឡើងទាក់ទងនឹងការវិនិយោគ និងលទ្ធផល។ ដោយផ្អែកលើការវាយតម្លៃដ៏ទូលំទូលាយនៃគន្លងកំណើនចំណាយលើការស្រាវជ្រាវ និងអភិវឌ្ឍន៍ និងសមត្ថភាពវិនិយោគរបស់សហគ្រាស សេចក្តីព្រាងផែនការបានព្យាករថានឹងមានការកើនឡើងជាមធ្យមប្រចាំឆ្នាំយ៉ាងហោចណាស់ ៧% នៃការចំណាយលើការស្រាវជ្រាវ និងអភិវឌ្ឍន៍ទូទាំងប្រទេស ដូចគ្នានឹងគោលដៅនៅក្នុងផែនការប្រាំឆ្នាំលើកទី១៤ ដែរ ដែលវានឹងធានាថា ការចំណាយលើការស្រាវជ្រាវ និងអភិវឌ្ឍន៍បន្តកើនឡើងក្នុងល្បឿនស្ថិរភាព។

នៅក្នុងវិស័យសុខុមាលភាពសាធារណៈ សូចនាករចំនួនប្រាំពីរត្រូវបានស្នើឡើង ដែលគ្របដណ្តប់លើការងារ ប្រាក់ចំណូល ការអប់រំ ការថែទាំសុខភាព សុខភាព ការថែទាំមនុស្សចាស់ និងការថែទាំកុមារ ដោយមានគោលបំណងដោះស្រាយការលំបាក និងបញ្ហាបន្ទាន់ដែលធ្វើឱ្យប្រជាជនមានការព្រួយបារម្ភបំផុត។

នៅក្នុងវិស័យអភិវឌ្ឍន៍បៃតង និងកាបូនទាប សូចនាករចំនួនប្រាំត្រូវបានដាក់ចេញ ដែលគ្របដណ្តប់លើការកាត់បន្ថយការបំភាយឧស្ម័នកាបូននិងការបំពុល ក៏ដូចជាការអភិរក្សអេកូឡូស៊ី និងការការពារបរិស្ថាន។ស្របតាមការចូលរួមចំណែកកំណត់ជាតិរបស់ប្រទេសចិន សេចក្តីព្រាងគ្រោងនេះមើលឃើញពីការកាត់បន្ថយសរុបចំនួន ១៧% នៃការបំភាយឧស្ម័នកាបូនឌីអុកស៊ីតក្នុងមួយឯកតានៃផលិតផលក្នុងស្រុកសរុប ដើម្បីលើកកម្ពស់ការផ្លាស់ប្តូរបៃតង និងកាបូនទាបនៅទូទាំងវិស័យសំខាន់ៗ។

នៅក្នុងវិស័យសន្តិសុខ សូចនាករពីរទាក់ទងនឹងសមត្ថភាពផលិតអាហារ និងថាមពលត្រូវបានស្នើឡើង ដោយមានគោលបំណងពង្រឹងមូលដ្ឋានគ្រឹះដែលគាំទ្រដល់សន្តិសុខជាតិរបស់ប្រទេសចិន៕

ដោយ៖ យា ចិន្ដាខន្ដី (រូបភាព៖ ក្រសួងការបរទេសចិន)