AKP ភ្នំពេញ ថ្ងៃទី០៥ ខែមីនា ឆ្នាំ២០២៦ -- រដ្ឋមន្ត្រីការបរទេសអ៊ីរ៉ង់លោក សេយេដ អាប់បាស់ អារ៉ាកជី (Seyed Abbas Araghchi) កាលពីថ្ងៃពុធ បានចោទប្រកាន់ប្រធានាធិបតីអាមេរិក លោក ដូណាល់ ត្រាំ (Donald Trump) ថាក្បត់ទាំងការទូត និងប្រជាជនអាមេរិក ដោយការទម្លាក់គ្រាប់បែកលើតុចរចា ក្នុងអំឡុងពេលចរចានុយក្លេអ៊ែរ។

លោក អារ៉ាកជី បាននិយាយនៅក្នុងការបង្ហោះមួយនៅលើវេទិកាប្រព័ន្ធផ្សព្វផ្សាយសង្គម អ៊ិចថា «នៅពេលដែលការចរចានុយក្លេអ៊ែរដ៏ស្មុគស្មាញត្រូវបានចាត់ទុកដូចជាប្រតិបត្តិការអចលនទ្រព្យ ហើយនៅពេលដែលការកុហកធំៗធ្វើឱ្យការពិតមានភាពស្រពិចស្រពិល ការរំពឹងទុកមិនប្រាកដនិយមមិនអាចសម្រេចបានឡើយ»។

លោកបានបន្ថែមថា «លទ្ធផលនៃការទម្លាក់គ្រាប់បែកលើតុចរចាដោយសារការស្អប់ខ្ពើម។ លោក ត្រាំ បានក្បត់ការទូត និងជនជាតិអាម៉េរិកដែលបានជ្រើសរើសរូបលោក»។

ការកត់សម្គាល់របស់លោកធ្វើឡើងបន្ទាប់ពីការវាយប្រហាររួមគ្នារវាងសហរដ្ឋអាមេរិក និងអ៊ីស្រាអែលលើទីក្រុងតេអេរ៉ង់ និងប្រទេសអ៊ីរ៉ង់ ដែលចាប់ផ្តើមកាលពីព្រឹកថ្ងៃសៅរ៍ នាំឱ្យមានការស្លាប់មេដឹកនាំកំពូលអ៊ីរ៉ង់ លោកអាលី ខាមីនី (Ali Khamenei) សមាជិកគ្រួសារមួយចំនួនរបស់លោកមេបញ្ជាការយោធាកំពូល និងជនស៊ីវិល។ អ៊ីរ៉ង់បានឆ្លើយតបតាមរយៈការវាយប្រហារដោយមីស៊ីល និងយន្តហោះគ្មានមនុស្សបើកជាច្រើនលើកដែលកំណត់គោលដៅលើទ្រព្យសម្បត្តិរបស់អ៊ីស្រាអែល និងសហរដ្ឋអាមេរិកនៅក្នុងតំបន់។

ការវាយប្រហារទាំងនេះបានកើតឡើងបន្ទាប់ពីការចរចានុយក្លេអ៊ែរដោយប្រយោលចំនួនបីជុំរវាងអ៊ីរ៉ង់ និងសហរដ្ឋអាមេរិក ដោយមានជុំទីបួនត្រូវបានគ្រោងទុក៕

ដោយ៖ មូល មិនា (ប្រភព៖ ស៊ីនហួ)