AKP ប៉េកាំង ថ្ងៃទី០៣ ខែមីនា ឆ្នាំ២០២៦ -- សន្និសីទសារព័ត៌មានសម្រាប់សម័យប្រជុំលើកទីបួននៃគណៈកម្មាធិការជាតិលើកទី១៤ នៃសន្និសីទប្រឹក្សានយោបាយប្រជាជនចិន (CPPCC) ត្រូវបានធ្វើឡើងនៅថ្ងៃទី០៣ ខែមីនា ឆ្នាំ២០២៦ នេះ នៅសាលធំប្រជាជនក្នុងទីក្រុងប៉េកាំង ដោយមានការចូលរួមពីប្រព័ន្ធផ្សព្វផ្សាយ និងអ្នកសារព័ត៌មានជាតិ និងអន្តរជាតិជាច្រើន។

សន្និសីទដែលដឹកនាំដោយលោក លុយ ជីយិ (Lui Jieyi)អគ្គលេខាធិការរង និងជាអ្នកនាំពាក្យ CPPCC បានចាប់ផ្តើមដោយការស្វាគមន៍អ្នកសារព័ត៌មានចិន និងអ្នកសារព័ត៌មានបរទេស និងបានបង្ហាញអំពីទិដ្ឋភាពទូទៅនៃការរៀបចំសម័យប្រជុំពីរ ដោយលោកបានសង្កត់ធ្ងន់ថាCPPCC គឺជាស្ថាប័នប្រឹក្សានយោបាយខ្ពស់បំផុតនៅក្នុងប្រទេសចិន។

អ្នកនាំពាក្យរូបនេះបានពន្យល់ថា សម័យប្រជុំឆ្នាំនេះមានសារៈសំខាន់ជាពិសេស ព្រោះវាស្ថិតនៅក្នុងឆ្នាំចុងក្រោយនៃផែនការប្រាំឆ្នាំលើកទី១៤ហើយក៏ជាឆ្នាំដ៏សំខាន់សម្រាប់ការធ្វើឱ្យកំណែទម្រង់ដ៏ទូលំទូលាយកាន់តែស៊ីជម្រៅ។ លោកបានបញ្ជាក់ថា ការងាររបស់ CPPCC នឹងផ្តោតសំខាន់ទៅលើការផ្តល់អនុសាសន៍គោលនយោបាយសំខាន់ៗទាក់ទងនឹងការបង្កើតផែនការប្រាំឆ្នាំលើកទី១៥ និងលើកកម្ពស់ការអភិវឌ្ឍដែលមានគុណភាពខ្ពស់។

ដោយសម្លឹងមើលទៅឆ្នាំ២០២៦ ដែលនឹងជាការប្រកាសដាក់ឱ្យដំណើរការផែនការប្រាំឆ្នាំលើកទី១៥ នេះ លោក លុយ ជីយិ បានសង្កត់ធ្ងន់ថា គណៈកម្មាធិការជាតិ CPPCC នឹងបន្តផ្តោតការយកចិត្តទុកដាក់ទៅលើភារកិច្ចស្នូលរបស់បក្ស និងរដ្ឋ ពាក់ព័ន្ធនឹងការធ្វើការពិគ្រោះយោបល់ស៊ីជម្រៅលើបញ្ហាសំខាន់ៗ ការអនុវត្តការត្រួតពិនិត្យតាមបែបប្រជាធិបតេយ្យ និងការប្រមូលផ្ដុំការយល់ដឹង និងជំនាញ ដើម្បីធានាបាននូវការចាប់ផ្តើមដ៏រឹងមាំសម្រាប់ផែនការថ្មី និងជំរុញការធ្វើទំនើបកម្ម។

ទាក់ទងនឹងព័ត៌មានលម្អិតជាក់លាក់នៃសម័យប្រជុំ CPPCC លោកលុយ ជីយិ បានថ្លែងថា កិច្ចប្រជុំត្រៀមរៀបចំរបស់គណៈកម្មាធិការអចិន្ត្រៃយ៍បានពិភាក្សា និងអនុម័តសេចក្តីព្រាងរបៀបវារៈ ដោយបញ្ជាក់ថាការរៀបចំផ្នែកភស្តុភារ និងនយោបាយទាំងអស់ដើម្បីទទួលសមាជិកត្រូវបានបញ្ចប់រួចរាល់អស់ហើយ។

សម័យប្រជុំនេះគ្រោងនឹងបើកជាផ្លូវការនៅថ្ងៃស្អែក ថ្ងៃពុធ ទី០៤ខែមីនា ឆ្នាំ២០២៦ នៅសាលប្រជុំធំប្រជាជន ហើយនឹងមានរយៈពេលប្រាំពីរថ្ងៃ។

របៀបវារៈសំខាន់ៗរួមមាន ការស្តាប់ និងពិភាក្សារបាយការណ៍ពីគណៈកម្មាធិការអចិន្ត្រៃយ៍ និងរបាយការណ៍ស្តីពីការងារទាក់ទងនឹងសំណើ។សមាជិកនៃកិច្ចប្រជុំក៏នឹងធ្វើការពិភាក្សារួមគ្នាទៅលើរបាយការណ៍ការងាររបស់រដ្ឋាភិបាល និងថវិកា ក៏ដូចជាពិភាក្សាទៅលើសេចក្តីព្រាងផែនការប្រាំឆ្នាំលើកទី១៥ ផងដែរ។ កិច្ចពិភាក្សាទាំងនោះនឹងត្រូវបានបន្តដោយសម័យប្រជុំបិទទ្វារដើម្បីបោះឆ្នោតទៅលើសេចក្តីសម្រេចចុងក្រោយ៕

ដោយ៖ យា ចិន្ដាខន្ដី (រូបភាព៖ ក្រសួងការបរទេសចិន)