AKP ភ្នំពេញ ថ្ងៃទី០៣ ខែមីនា ឆ្នាំ២០២៦ -- លោក វ៉ាង យី (Wang Yi)សមាជិកការិយាល័យនយោបាយនៃគណៈកម្មាធិការកណ្តាល CPC និងជារដ្ឋមន្ត្រីការបរទេសចិន បានសន្ទនាតាមទូរស័ព្ទជាមួយរដ្ឋមន្ត្រីការបរទេសអ៊ីរ៉ង់ លោក អាបាស អារ៉ាឈី (Abbas Araqchi) កាលពីថ្ងៃទី០២ ខែមីនា ឆ្នាំ២០២៦ ម្សិលមិញ​ ស្តីពីស្ថានភាពនៅតំបន់មជ្ឈឹមបូព៌ា ដោយលោក វ៉ាងបាននិយាយថា ប្រទេសចិនបានជំរុញឱ្យសហរដ្ឋអាមេរិក និងអ៊ីស្រាអែលបញ្ឈប់សកម្មភាពយោធារបស់ពួកគេជាបន្ទាន់ ដើម្បីជៀសវាងការកើនឡើងនៃភាពតានតឹងបន្ថែមទៀត និងការពារការប្រយុទ្ធពីការរីករាលដាលដល់តំបន់មជ្ឈិមបូព៌ាទាំងមូល។

នៅក្នុងកិច្ចសន្ទនាតាមទូរសព្ទនោះ លោក អារ៉ាកឈី បានធ្វើបច្ចុប្បន្នភាពអំពីស្ថានភាពនៅក្នុងតំបន់ ដោយបាននិយាយថាសហរដ្ឋអាមេរិកបានចាប់ផ្តើមសង្គ្រាមប្រឆាំងនឹងអ៊ីរ៉ង់ជាលើកទីពីរក្នុងអំឡុងពេលនៃកិច្ចចរចាអ៊ីរ៉ង់-សហរដ្ឋអាមេរិក។ ភាគីទាំងពីរទទួលបានទទួលវឌ្ឍនភាពវិជ្ជមាននៅក្នុងកិច្ចចរចានោះ ប៉ុន្តែសកម្មភាពរបស់សហរដ្ឋអាមេរិកជាការរំលោភបំពានលើច្បាប់អន្តរជាតិទាំងអស់ និងឈានហួសខ្សែបន្ទាត់ក្រហមរបស់អ៊ីរ៉ង់។ ភាគីអ៊ីរ៉ង់គ្មានជម្រើសអ្វីក្រៅតែពីការពារខ្លួនយ៉ាងពេញលេញនោះទេ។ ប្រទេសចិនបានបង្ហាញជាសាធារណៈនូវគោលជំហរដ៏យុត្តិធម៌ និងស្មើភាពរបស់ខ្លួន ហើយសង្ឃឹមថានឹងបន្តដើរតួនាទីវិជ្ជមានក្នុងការទប់ស្កាត់ការកើនឡើងនៃភាពតានតឹងក្នុងតំបន់។

នៅក្នុងនោះដែរ លោក វ៉ាង យី បានបញ្ជាក់សារជាថ្មីនូវជំហរគោលការណ៍របស់ប្រទេសចិនទៅលើស្ថានភាពបច្ចុប្បន្ននៅក្នុងប្រទេសអ៊ីរ៉ង់ ដោយបាននិយាយថា ប្រទេសចិនឱ្យតម្លៃចំពោះមិត្តភាពជាប្រពៃណីរវាងចិន និងអ៊ីរ៉ង់ គាំទ្រអ៊ីរ៉ង់ក្នុងការការពារអធិបតេយ្យភាពសន្តិសុខ បូរណភាពទឹកដី និងសេចក្តីថ្លៃថ្នូរជាតិរបស់ខ្លួន និងគាំទ្រអ៊ីរ៉ង់ក្នុងការការពារសិទ្ធិ និងផលប្រយោជន៍ស្របច្បាប់របស់ខ្លួន។

លោកបានបន្ថែមថា យើងជឿជាក់ថា ក្រោមស្ថានភាពធ្ងន់ធ្ងរ និងស្មុគស្មាញបច្ចុប្បន្ន ភាគីអ៊ីរ៉ង់អាចរក្សាស្ថិរភាពសង្គមជាតិ យកចិត្តទុកដាក់ចំពោះកង្វល់ស្របច្បាប់របស់ប្រទេសជិតខាង និងការពារសន្តិសុខរបស់ពលរដ្ឋ និងស្ថាប័នចិននៅក្នុងប្រទេសអ៊ីរ៉ង់។ លោក អារ៉ាកឈី បាននិយាយថា អ៊ីរ៉ង់បានត្រៀមខ្លួនរួចជាស្រេចដើម្បីខិតខំប្រឹងប្រែងគ្រប់បែបយ៉ាងក្នុងការធានាសុវត្ថិភាពរបស់បុគ្គលិក និងស្ថាប័នចិន៕

ដោយ៖ យា ចិន្ដាខន្ដី (រូបភាព៖ ក្រសួងការបរទេសចិន)