AKP ភ្នំពេញ ថ្ងៃទី០២ ខែមីនា ឆ្នាំ២០២៦--ឯកឧត្តមបណ្ឌិត ជ័យ ចាប ប្រធានសមាគមតេក្វាន់ដូរាជធានីភ្នំពេញបានគូសបញ្ជាក់ថា សមិទ្ធផលនៃការប្រកួតកីឡាតេក្វាន់ដូជ្រើសរើសជើងឯក ស.ស.យ.ក. លើកទី២ ឆ្នាំ២០២៦ពិតជាមានសារសំខាន់ខ្លាំងបំផុត សម្រាប់កុមារា កុមារី យុវជន យុវតី និងសង្គមជាតិទាំងមូល នាពេលអនាគត ហើយសូមចូលរួមគាំទ្រសកម្មភាពនេះឱ្យមានរៀងរាល់ឆ្នាំជានិរន្តតទៅ។

ការលើកឡើងរបស់ឯកឧត្តមបណ្ឌិត ជ័យ ចាប បានធ្វើឡើងនៅក្នុងឱកាសបិទការប្រកួតកីឡាតេក្វាន់ដូ ជើងឯក ស.ស.យ.ក. លើកទី២ ឆ្នាំ២០២៦ ដើម្បីអបអរសាទរទិវាអន្តរជាតិនារី ៨មីនា ខួបលើកទី១១៥ ក្រោមប្រធានបទ «កីឡារួមគ្នា ដើម្បីស្មារតីសន្តិភាពនៅកម្ពុជា» កាលពីល្ងាចថ្ងៃទី០១ ខែមីនា ឆ្នាំ២០២៦ នៅអគារខេមរានីនៃស.ស.យ.ក. រាជធានីភ្នំពេញ។

ប្រធានសមាគមមានប្រសាសន៍ថា ការប្រកួតតេក្វាន់ដូជើងឯកស.ស.យ.ក.ឆ្នាំ២០២៦បានបញ្ចប់ដោយជោគជ័យជាផ្លែផ្កានាពេលនេះ គឺក៏អាស្រ័យដោយគណៈកម្មការបច្ចេកទេសដែលបានរៀបចំប្រកបដោយមនសិកាវិជ្ជាជីវៈ ស្របតាមក្រមបទដ្ឋានបច្ចេកទេសនៃលក្ខន្តិកៈការប្រកួត ដោយឈរលើស្មារតី សន្តិភាព សមធម៌ សមភាព យុត្តិធម៌ អព្យាក្រឹត្យ និងតម្លាភាព។ លទ្ធផលមួយនេះក៏មានការចូលរួមចំណែក ពីសំណាក់លោកគ្រូ អ្នកគ្រូ មាតាបិតាអាណាព្យាបាលសិស្សគុន ក្លឹបកីឡាតេក្វាន់ដូទាំងអស់ដែលបានបញ្ជូនចៅៗកីឡាករ កីឡាការិនី មកចូលរួម។ ព្រឹត្តិការណ៍នាឱកាសនេះ ពោរពេញទៅដោយស្មារតីតស៊ូ និងសាមគ្គីភាព ហើយឯកឧត្តមបណ្ឌិតពិតជាមានមោទនភាពយ៉ាងខ្លាំងដែលបានឃើញនូវការរីកចម្រើន និងសមត្ថភាពដ៏អស្ចារ្យរបស់កីឡាករ កីឡាការិនីវ័យក្មេងគ្រប់ៗរូប។

ឯកឧត្តមបណ្ឌិត ជ័យ ចាប សង្កត់ធ្ងន់ថា ប្រធានបទថ្ងៃនេះ ក៏បានរំលេចឱ្យឃើញយ៉ាងច្បាស់ថា កីឡាមិនមែនត្រឹមតែជាការហាត់ប្រាណប៉ុណ្ណោះទេ ប៉ុន្តែកីឡាបានផ្សារភ្ជាប់បេះដូងមនុស្សគ្រប់រូបឱ្យមកជួបជុំគ្នា រស់នៅក្នុងសុខសន្តិភាព និងការយោគយល់គ្នា។ បើគ្មានសន្តិភាពពេញលេញដូចសព្វថ្ងៃនេះទេ យើងក៏គ្មានឱកាសបានមកជួបជុំគ្នា រៀបចំព្រឹត្តិការណ៍កីឡាដ៏អធិកអធមបែបនេះដែរ។ ការប្រកួតនៅថ្ងៃនេះ គឺជាវេទិកាមួយសម្រាប់សិស្សគុនក្មេងៗបង្ហាញសមត្ថភាពដែលបានមកពីការហ្វឹកហាត់យ៉ាងស្វិតស្វាញ ដោយអ្នកទាំងអស់គ្នាត្រូវចងចាំថា ជ័យជម្នះដ៏ពិតប្រាកដគឺ «ការឈ្នះលើចិត្តខ្លួនឯង និងការទទួលបាននូវមិត្តភាព និងបទពិសោធន៍ថ្មីៗ»។

កីឡាតេក្វាន់ដូ មិនត្រឹមតែជាការប្រកួតប្រជែងដើម្បីស្វែងរកជ័យជម្នះលើសង្វៀនប៉ុណ្ណោះទេ ប៉ុន្តែវាគឺជាការឆ្លុះបញ្ចាំងពីតម្លៃនៃ «វិន័យ សីលធម៌ និងការអត់ធ្មត់»។ ការលើកកម្ពស់វិស័យកីឡា គឺជាផ្នែកមួយមិនអាចខ្វះបាននៃយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដែលបានកំណត់យក «ការអភិវឌ្ឍមូលធនមនុស្ស» ជាអាទិភាពគន្លឹះទី១។

ជាមួយគ្នានេះ ឯកឧត្តម ឈួរ សុបញ្ញា ប្រធានគណៈកម្មការរៀបចំការប្រកួត និងជាអនុប្រធានសមាគមកីឡាតេក្វាន់ដូរាជធានីភ្នំពេញបានបានថ្លែងអំណរគុណចំពោះឯកឧត្តម សាយ សំអាល់ ប្រធានសហភាពសហព័ន្ធយុវជនកម្ពុជារាជធានីភ្នំពេញបានផ្ដល់ទីតាំង និងកិច្ចសហការយ៉ាងល្អប្រសើរជំរុញឱ្យការប្រកួតនេះទទួលបានជោគជ័យគួរជាទីមោទនៈ។ ជាមួយគ្នានេះឯកឧត្តមអរគុណថ្នាក់ដឹកនាំ ប្រធានក្លឹប សប្បុរសជន មាតាបិតាសិស្សគុនទាំងអស់ ដែលបានគាំទ្រទាំងស្មារតី ទាំងថវិកា ឧបករណ៍បច្ចេកទេសសម្រាប់ការប្រកួតនេះ ប្រកបដោយទឹកចិត្តសប្បុរសដែលមិនអាចកាត់ថ្លៃបាន។

ជាមួយគ្នានេះ លោក សំ សុខយី អគ្គលេខាធិការសមាគមបានបញ្ជាក់ថា ព្រឹត្តិការណ៍ប្រកួតឆ្នាំនេះមានក្លឹបចូលរួមសរុបចំនួន៧ មានប្រតិភូ គ្រូបង្វឹក កីឡាករ កីឡាការិនី សរុប ២១០នាក់ ក្នុងនោះកីឡាការិនី ៨៦នាក់ ដោយប្រកួតលើ ៥៧វិញ្ញាសា។ ឆ្លងកាត់ការប្រកួតយ៉ាងស្វិតស្វាញរយៈពេល២ថ្ងៃរបស់កីឡាករ កីឡារិនី ក្រោមការផ្តល់ពិន្ទុយ៉ាងយុត្តិធម៌ពីសំណាក់គណៈកម្មការបច្ចេកទេស អាជ្ញាកណ្តាល ចៅក្រម និងសហការីគ្រប់ផ្នែក យើងទទួលបានលទ្ធផលបច្ចេកទេសល្អប្រសើរជាផ្លែផ្កាគួរជាទីមោទនៈលើគ្រប់វិញ្ញាសាទាំងអស់ផងដែរ៕

ដោយ ហេង ណាលីន