AKP ភ្នំពេញ ថ្ងៃទី០១ ខែមីនា ឆ្នាំ២០២៦ -- ជនជាតិអ៊ីស្រាអែលពីរនាក់បានរងរបួសស្រាល បន្ទាប់ពីបំណែកយន្តហោះគ្មានមនុស្សបានធ្លាក់ចំបរិវេណស្ថានទូតអ៊ីស្រាអែលនៅទីក្រុងអាប៊ូដាប៊ី។ នេះបើយោងតាមការចុះផ្សាយរបស់កាសែតប្រចាំថ្ងៃអ៊ីស្រាអែល Yedioth Ahronoth នៅថ្ងៃអាទិត្យនេះ។

យោងតាមការរាយការណ៍ បានឱ្យដឹងថា ជនជាតិអ៊ីស្រាអែលពីរនាក់បានរងរបួសដោយសាររលកនៃការផ្ទុះ បន្ទាប់ពីផលប៉ះពាល់នៃបំណែកយន្តហោះគ្មានមនុស្សបើកធ្លាក់នៅក្នុងបរិវេណស្ថានទូត ជាកន្លែងដែលអ្នកតំណាងអ៊ីស្រាអែលស្នាក់នៅ។

កាលពីព្រឹកថ្ងៃអាទិត្យ ក្រសួងការពារជាតិអេមីរ៉ាត់អារ៉ាប់រួមបាននិយាយថា យន្តហោះគ្មានមនុស្សបើករបស់អ៊ីរ៉ង់ពីរគ្រឿងបានកំណត់គោលដៅលើឃ្លាំងមួយនៅមូលដ្ឋានទ័ពជើងទឹកអាល់-សាឡាម ក្នុងទីក្រុងអាប៊ូដាប៊ី ដែលនាំឱ្យមានអគ្គីភ័យឆាបឆេះកុងតឺន័រពីរដែលផ្ទុកសម្ភារៈទូទៅ៕

ដោយ៖ យា ចិន្ដាខន្ដី (ប្រភព៖ AA-AKP)