AKP ភ្នំពេញ ថ្ងៃទី០១ ខែមីនា ឆ្នាំ២០២៦ -- រដ្ឋមន្ត្រីក្រសួងការពារជាតិសហរដ្ឋអាមេរិក លោក ភែត ហេកសេត (Pete Hegseth) បានគូសបញ្ជាក់សារជាថ្មីពីការប្តេជ្ញាចិត្តរបស់សហរដ្ឋអាមេរិកក្នុងការទប់ទល់នឹងការគំរាមកំហែងរបស់អ៊ីរ៉ង់ និងការពារពលរដ្ឋអាម៉េរិកនៅបរទេស។

លោក ហេកសេត បាននិយាយថា «ពេញមួយយប់ តាមបញ្ជារបស់លោកប្រធានាធិបតី (ដូណាល់ ត្រាំ) ក្រសួងសង្គ្រាមបានចាប់ផ្តើមប្រតិបត្តិការ Epic Fury — ប្រតិបត្តិការផ្លូវអាកាសដ៏សាហាវបំផុត ស្មុគស្មាញបំផុត និងមានភាពជាក់លាក់បំផុតក្នុងប្រវត្តិសាស្ត្រ»។

លោក ហេកសេត បានសរសេរនៅលើប្រព័ន្ធផ្សព្វផ្សាយសង្គមអ៊ិចថា «របបអ៊ីរ៉ង់មានឱកាស ប៉ុន្តែបានបដិសេធមិនធ្វើកិច្ចព្រមព្រៀង — ហើយឥឡូវនេះពួកគេកំពុងរងផលវិបាក»។

សហរដ្ឋអាមេរិក និងអ៊ីស្រាអែលបានចាប់ផ្តើមប្រតិបត្តិការយោធាដ៏សំខាន់មួយប្រឆាំងនឹងអ៊ីរ៉ង់កាលពីថ្ងៃសៅរ៍ ដែលលោក ត្រាំ បាននិយាយថា មានបំណងធ្វើឱ្យខូចខាតដល់សមត្ថភាពយោធារបស់ទីក្រុងតេអេរ៉ង់ និងបន្សាបការគំរាមកំហែងនុយក្លេអ៊ែរ។ លោកបានជំរុញឱ្យប្រជាជនអ៊ីរ៉ង់ «គ្រប់គ្រងរដ្ឋាភិបាលរបស់អ្នក» នៅពេលដែលការវាយប្រហារបានបញ្ចប់។

ជាការសងសឹក អ៊ីរ៉ង់បានបាញ់យន្តហោះគ្មានមនុស្សបើក និងមីស៊ីលទៅកាន់អ៊ីស្រាអែល និងវាយប្រហារមូលដ្ឋានយោធាអាម៉េរិកនៅបារ៉ែន គុយវ៉ែត និងកាតា។

លោក ហេកសេត បានអះអាងថា អស់រយៈពេលជិត ៥០ឆ្នាំមកហើយ អ៊ីរ៉ង់បានកំណត់គោលដៅ និងសម្លាប់ជនជាតិអាម៉េរិក ព្រមទាំងតែងតែស្វែងរកអាវុធដ៏មានឥទ្ធិពលបំផុតរបស់ពិភពលោកដើម្បីជំរុញបុព្វហេតុរ៉ាឌីកាល់របស់ពួកគេ។

លោកបានបន្ថែមថា «យើងនឹងមិនអត់ឱនចំពោះមីស៊ីលដ៏មានឥទ្ធិពលដែលកំណត់គោលដៅលើប្រជាជនអាម៉េរិកនោះទេ។ មីស៊ីលទាំងនោះនឹងត្រូវបំផ្លាញចោល រួមជាមួយនឹងការផលិតមីស៊ីលរបស់អ៊ីរ៉ង់។ កងទ័ពជើងទឹកអ៊ីរ៉ង់នឹងត្រូវបំផ្លាញចោល»។

ដូចលោក ដូណាល់ ត្រាំ ដែរ លោក ហេកសេត បាននិយាយថា អ៊ីរ៉ង់នឹងមិនដែលមានអាវុធនុយក្លេអ៊ែរឡើយ។

លោកបានបន្ថែមថា «សហរដ្ឋអាមេរិកមិនបានចាប់ផ្តើមជម្លោះនេះទេ ប៉ុន្តែយើងនឹងបញ្ចប់វា។ ប្រសិនបើអ្នកសម្លាប់ ឬគំរាមកំហែងជនជាតិអាម៉េរិកនៅគ្រប់ទីកន្លែងក្នុងពិភពលោក — ដូចដែលអ៊ីរ៉ង់បានធ្វើ — នោះយើងនឹងតាមប្រមាញ់អ្នក ហើយយើងនឹងសម្លាប់អ្នក»៕

ដោយ៖ យា ចិន្ដាខន្ដី (ប្រភព៖ AA-AKP)