AKP ភ្នំពេញ ថ្ងៃទី០១ ខែមីនា ឆ្នាំ២០២៦ -- អាជ្ញាធរអាកាសយានដ្ឋានអាប៊ូដាប៊ី បាននិយាយនៅថ្ងៃអាទិត្យនេះថា ជនជាតិអាស៊ីម្នាក់បានស្លាប់ និងប្រាំពីរនាក់ផ្សេងទៀតរងរបួសនៅអាកាសយានដ្ឋានអន្តរជាតិហ្សាយ៉េដ ក្នុងទីក្រុងអាប៊ូដាប៊ី បន្ទាប់ពីយន្តហោះគ្មានមនុស្សបើកមួយត្រូវបានស្ទាក់ចាប់។

នៅទីក្រុងឌូបៃ អាជ្ញាធរបាននិយាយថា យន្តហោះគ្មានមនុស្សបើកមួយគ្រឿងត្រូវបានស្ទាក់ចាប់នៅពីលើទីក្រុង ដោយមានកំទេចកំទីធ្លាក់មកបញ្ឆេះជាភ្លើងឆេះតិចតួចនៅលើផ្នែកខាងមុខនៅខាងក្រៅនៃសណ្ឋាគារប្រណីត Burj Al Arab ដ៏ល្បីល្បាញមួយ។

នៅក្នុងសេចក្តីថ្លែងការណ៍មួយដែលបានចេញផ្សាយនៅលើគណនីផ្លូវការរបស់ខ្លួននៅលើប្រព័ន្ធផ្សព្វផ្សាយសង្គមអ៊ិច ការិយាល័យប្រព័ន្ធផ្សព្វផ្សាយឌូបៃបាននិយាយថា ក្រុមការពារជនស៊ីវិលបានឆ្លើយតបភ្លាមៗ និងបានគ្រប់គ្រងស្ថានការណ៍នោះ។

មិនមានអ្នករងរបួសត្រូវបានរាយការណ៍នៅក្នុងឧប្បត្តិហេតុ Burj Al Arab ទេ។

ដោយឡែកពីគ្នា អាជ្ញាធរឌូបៃបានបញ្ជាក់ថា កំទេចកំទីពីការស្ទាក់ចាប់តាមអាកាសក៏បានបង្កឱ្យមានអគ្គីភ័យនៅចំណតមួយនៅកំពង់ផែ Jebel Ali ផងដែរ។

ក្រុមការពារជនស៊ីវិលឌូបៃបានឆ្លើយតបភ្លាមៗ ហើយកំពុងបន្តកិច្ចខិតខំប្រឹងប្រែងដើម្បីពន្លត់អគ្គីភ័យ៕

ដោយ៖ យា ចិន្ដាខន្ដី (ប្រភព៖ AA-AKP)