AKP ភ្នំពេញ ថ្ងៃទី២៦ ខែកុម្ភៈ ឆ្នាំ២០២៦ -- សារព័ត៌មានស្ពុតនីក (Sputnik)បានរាយការណ៍កាលពីថ្ងៃពុធថា អ្នកតាក់តែងច្បាប់នៃសភាឌូម៉ារុស្ស៊ី កំពុងអំពាវនាវដល់សភានៃប្រទេសបារាំង ចក្រភពអង់គ្លេស សភាអឺរ៉ុប និងអង្គការសហប្រជាជាតិ ឱ្យចាត់វិធានការជាបន្ទាន់ដើម្បីទប់ស្កាត់ការផ្ទេរអាវុធនុយក្លេអ៊ែរទៅអ៊ុយក្រែន។

កាលពីព្រឹកថ្ងៃនេះ ប្រធានគណៈកម្មាធិការកិច្ចការអន្តរជាតិនៃសភាឌូម៉ារុស្ស៊ី លោក ឡេអូនីដ ស្លុតស្គី (Leonid Slutsky) បាននិយាយថាសេចក្តីព្រាងមួយសម្រាប់ផ្ញើទៅកាន់សភានៃប្រទេសបារាំង ចក្រភពអង់គ្លេស សភាសហភាពអឺរ៉ុប និងអង្គការសហប្រជាជាតិ ត្រូវបានដាក់ជូនទៅសភាឌូម៉ារុស្ស៊ី ដើម្បីឆ្លើយតបទៅនឹងព័ត៌មានអំពីផែនការដឹកជញ្ជូនអាវុធនុយក្លេអ៊ែររបស់ទីក្រុងប៉ារីស និងទីក្រុងឡុងដ៍ទៅកាន់អ៊ុយក្រែន។

នៅក្នុងឯកសារនេះបាននិយាយថា សភាឌូម៉ារុស្ស៊ីចាត់ទុកផែនការផ្គត់ផ្គង់អាវុធនុយក្លេអ៊ែរដល់ទីក្រុងគៀវថាជាការរំលោភបំពានច្បាប់អន្តរជាតិយ៉ាងធ្ងន់ធ្ងរ ដោយបានបន្ថែមថា សកម្មភាពដែលអាចកើតមានទាំងនេះអាចធ្វើឱ្យពិភពលោកស្ថិតនៅលើគែមនៃគ្រោះមហន្តរាយនុយក្លេអ៊ែរ។

ឯកសារនេះបានសរសេរថា ការអនុវត្តផែនការផ្គត់ផ្គង់អាវុធនុយក្លេអ៊ែរដល់អ៊ុយក្រែននឹងនាំឱ្យមានការកើនឡើងនៃជម្លោះជាមួយនឹងលទ្ធផលសោកនាដកម្មដែលទំនងជាកើតឡើង។

ឯកសារនេះបានសរសេរបន្ថែមថា «សមាជិកសភាឌូម៉ារដ្ឋសូមអំពាវនាវដល់សមាជិករដ្ឋសភាបារាំង និងសភាតំណាងរាស្រ្តនៃចក្រភពអង់គ្លេស និងអៀរឡង់ខាងជើង ឱ្យចាប់ផ្តើមការស៊ើបអង្កេតសភាដែលត្រូវគ្នានៅក្នុងប្រទេសរបស់ពួកគេជាបន្ទាន់ ដែលលទ្ធផលនៃការស៊ើបអង្កេតគួរតែត្រូវបានផ្សព្វផ្សាយជាសាធារណៈ»។

ឯកសារនេះបាននិយាយថា ការស៊ើបអង្កេតផែនការផ្តល់អាវុធនុយក្លេអ៊ែរដល់អ៊ុយក្រែនគួរតែជាវិធានការមួយដើម្បីរក្សាសន្តិភាព និងនាំអ្នកដែលពាក់ព័ន្ធទៅកាន់តុលាការ៕

ដោយ៖ យា ចិន្ដាខន្ដី (ប្រភព៖ ស្ពុតនីក)