AKP ភ្នំពេញ ថ្ងៃទី២៦ ខែកុម្ភៈ ឆ្នាំ២០២៦ -- យោងតាមសេចក្តីថ្លែងការណ៍ផ្លូវការដែលចេញផ្សាយកាលពីថ្ងៃអង្គារដោយប្រទេសទាំងពីរ បានឱ្យដឹងថាភាពតានតឹងបានលេចឡើងតាមបណ្តោយព្រំដែនរវាងប្រទេសហ្គីណេ និងសៀរ៉ាឡេអូន បន្ទាប់ពីការឃុំខ្លួនមន្ដ្រីសន្តិសុខសៀរ៉ាឡេអូនចំនួន ១៦នាក់ដោយកងកម្លាំងហ្គីណេ។

អគ្គសេនាធិការនៃកងកម្លាំងប្រដាប់អាវុធហ្គីណេកាលពីថ្ងៃអង្គារបានបញ្ជាក់ពីការចាប់ខ្លួនទាហានសៀរ៉ាឡេអូនចំនួន ១៦នាក់នៅតំបន់ព្រំដែនជាមួយប្រទេសសៀរ៉ាឡេអូន។

សេចក្តីថ្លែងការណ៍នេះបាននិយាយថា ទាហានទាំងនោះត្រូវបានចាប់ខ្លួនកាលពីថ្ងៃអាទិត្យ បន្ទាប់ពីបានចូលទៅក្នុងទឹកដីហ្គីណេនៅក្នុងស្រុកគូដាយ៉ា ខេត្តហ្វារ៉ាណាហ៍ ដោយសេចក្តីថ្លែងការណ៍បានបន្ថែមថា ពួកគេស្ថិតនៅចម្ងាយប្រហែល ១,៤គីឡូម៉ែត្រនៅខាងក្នុងទឹកដីហ្គីណេដោយគ្មានការអនុញ្ញាតជាមុន។

លោក អានស៊ូម៉ានេ ទូម៉ានី កាម៉ារ៉ា (Ansoumane Toumany Camara) នាយកព័ត៌មាន និងទំនាក់ទំនងសាធារណៈនៃកងកម្លាំងប្រដាប់អាវុធ និងជាអ្នកនាំពាក្យក្រសួងការពារជាតិហ្គីណេ បាននិយាយថា «ពួកគេបានដំឡើងតង់ និងលើកទង់ជាតិរបស់ពួកគេ»។ កងកម្លាំងហ្គីណេដែលដាក់ពង្រាយនៅកន្លែងកើតហេតុបានចាប់ខ្លួនមន្ដ្រីទាំង ១៦នាក់ និងឧបករណ៍របស់ពួកគេ ដោយប្រគល់ពួកគេទៅឱ្យប៉ូលីសយុត្តិធម៌សម្រាប់ការស៊ើបអង្កេត។

ផ្ទុយពីសេចក្តីថ្លែងការណ៍របស់ប្រទេសហ្គីណេ ក្រសួងព័ត៌មាន និងអប់រំស៊ីវិលរបស់ប្រទេសសៀរ៉ាឡេអូនបាននិយាយកាលពីថ្ងៃអង្គារថាកងកម្លាំងហ្គីណេបានឆ្លងកាត់ចូលទៅក្នុងតំបន់ព្រំដែន Kalieyereh របស់ប្រទេសសៀរ៉ាឡេអូនក្នុងស្រុកហ្វាឡាបា កាលពីថ្ងៃចន្ទ។

រដ្ឋាភិបាលសៀរ៉ាឡេអូនបាននិយាយថា មន្ដ្រីរបស់ខ្លួនកំពុងរៀបឥដ្ឋសម្រាប់សាងសង់ប៉ុស្តិ៍ព្រំដែនថ្មីមួយនៅក្នុងទឹកដីសៀរ៉ាឡេអូនដែលត្រូវបានទទួលស្គាល់ នៅពេលដែលពួកគេត្រូវបានចាប់ខ្លួន។ សេចក្តីថ្លែងការណ៍នេះបាននិយាយថា «ទង់ជាតិសៀរ៉ាឡេអូនត្រូវបានលើកនៅក្នុងទឹកដីដែលត្រូវបានទទួលស្គាល់ថាជារបស់ប្រទេសសៀរ៉ាឡេអូន»។

ជម្លោះព្រំដែនរវាងប្រទេសសៀរ៉ាឡេអូន និងហ្គីណេ មានតាំងពីព្រំដែនមិនច្បាស់លាស់ដែលគូសដោយចក្រភពអង់គ្លេស និងបារាំងក្នុងអំឡុងសម័យអាណានិគម។ បន្ទាប់ពីទទួលបានឯករាជ្យ កង្វះព្រំដែនដែលបានកំណត់យ៉ាងច្បាស់លាស់ និងវត្តមាននៃសហគមន៍រួមគ្នាតាមបណ្តោយព្រំដែន បាននាំឱ្យមានភាពតានតឹងកើតឡើងវិញ។ បញ្ហានេះនៅតែបន្តកើតមានក្នុងកម្រិតទាប ជាមួយនឹងឧប្បត្តិហេតុម្តងម្កាល ទោះបីជាអង្គការក្នុងតំបន់ដូចជាសហគមន៍សេដ្ឋកិច្ចនៃរដ្ឋអាហ្វ្រិកខាងលិច ពេលខ្លះបានចូលមកសម្របសម្រួលក៏ដោយ៕

ដោយ៖ មូល មិនា (ប្រភព៖ ស៊ីនហួ)