AKP ភ្នំពេញ ថ្ងៃទី២៦ ខែកុម្ភៈ ឆ្នាំ២០២៦ -- ប្រទេសឥណ្ឌូណេស៊ីបានអំពាវនាវឱ្យសហភាពអឺរ៉ុបអនុវត្តសេចក្តីសម្រេចរបស់គណៈកម្មការដោះស្រាយវិវាទរបស់អង្គការពាណិជ្ជកម្មពិភពលោក (WTO) នៅក្នុងសំណុំរឿងប្រេងដូង (DS593: EU-Palm Oil) ឱ្យបានឆាប់រហ័សដូចដែលត្រូវបានរាយការណ៍ដោយទីភ្នាក់ងារសារព័ត៌មានជាតិ Antara។

នៅក្នុងសេចក្តីថ្លែងការណ៍ផ្លូវការមួយ រដ្ឋមន្ត្រីក្រសួងពាណិជ្ជកម្មឥណ្ឌូណេស៊ី លោក ប៊ូឌី សាន់តូសូ (Budi Santoso) បាននិយាយថាថ្ងៃទី២៤ ខែកុម្ភៈ គឺជាចុងបញ្ចប់នៃរយៈពេលសមហេតុផល ១២ខែដែលបានផ្តល់ឱ្យសហភាពអឺរ៉ុប ដើម្បីកែសម្រួលគោលនយោបាយ និងបទប្បញ្ញត្តិដែលត្រូវបានរកឃើញថាមិនស៊ីសង្វាក់គ្នានឹងបទប្បញ្ញត្តិរបស់អង្គការWTO។

លោកបាននិយាយថា រដ្ឋាភិបាលឥណ្ឌូណេស៊ីនឹងបន្តតាមដាន និងវាយតម្លៃការកែសម្រួលគោលនយោបាយរបស់សហភាពអឺរ៉ុប ជាពិសេសការកែសម្រួលគោលនយោបាយទាក់ទងនឹងគោលនយោបាយផ្លាស់ប្តូរការប្រើប្រាស់ដីធ្លីដោយប្រយោល ក្រោមសេចក្តីណែនាំ (EU) 2018/2001 ដែលត្រូវបានគេស្គាល់ថាជាសេចក្តីណែនាំថាមពលកកើតឡើងវិញ II និងបទប្បញ្ញត្តិអនុវត្តរបស់ខ្លួន។

លោក សាន់តូសូ បាននិយាយថា «យើងជំរុញឱ្យសហភាពអឺរ៉ុបអនុវត្តតាមសេចក្តីសម្រេចរបស់គណៈកម្មការអង្គការ WTO ជាបន្ទាន់ ដើម្បីឱ្យការចូលទីផ្សារសម្រាប់ផលិតផលប្រេងដូងឥណ្ឌូណេស៊ីនៅក្នុងសហភាពអឺរ៉ុបអាចត្រូវបានស្តារឡើងវិញយ៉ាងឆាប់រហ័ស»។

បន្ទាប់ពីបញ្ចប់រយៈពេលអនុវត្ត រដ្ឋាភិបាលឥណ្ឌូណេស៊ីនឹងធ្វើការវាយតម្លៃដ៏ទូលំទូលាយមួយ ដែលគ្របដណ្តប់លើទិដ្ឋភាពបទប្បញ្ញត្តិ វិធីសាស្រ្ត និងផលប៉ះពាល់ពាណិជ្ជកម្ម ដើម្បីធានាថា សហភាពអឺរ៉ុបបានអនុវត្តតាមសេចក្តីសម្រេចរបស់អង្គការពាណិជ្ជកម្មពិភពលោក ដោយលុបបំបាត់ការរើសអើងប្រឆាំងនឹងផលិតផលប្រេងដូងឥណ្ឌូណេស៊ី។

រដ្ឋមន្ត្រីរូបនេះបានកត់សម្គាល់ថា សេចក្តីសម្រេចរបស់អង្គការពាណិជ្ជកម្មពិភពលោកទៅលើជម្លោះ DS593 ដែលបានចេញនៅថ្ងៃទី១០ខែមករា ឆ្នាំ២០២៥ បានរកឃើញថា គោលនយោបាយរបស់សហភាពអឺរ៉ុបបានរើសអើងប្រឆាំងនឹងផលិតផលជីវឥន្ធនៈដែលមានមូលដ្ឋានលើប្រេងដូងឥណ្ឌូណេស៊ី បើប្រៀបធៀបទៅនឹងផលិតផលស្រដៀងគ្នាពីសហភាពអឺរ៉ុប និងប្រទេសដទៃទៀត។

សេចក្តីសម្រេចនេះផ្តល់នូវភាពច្បាស់លាស់ផ្នែកច្បាប់ថា វិធានការរបស់សហភាពអឺរ៉ុបមិនស៊ីសង្វាក់គ្នានឹងគោលការណ៍មិនរើសអើងរបស់អង្គការពាណិជ្ជកម្មពិភពលោកទេ។

នៅក្នុងកិច្ចប្រជុំសាមញ្ញរបស់ស្ថាប័នដោះស្រាយវិវាទរបស់អង្គការពាណិជ្ជកម្មពិភពលោកកាលពីថ្ងៃទី២៧ ខែមករា ឆ្នាំ២០២៦ សហភាពអឺរ៉ុបបានរាយការណ៍ថា ការកែសម្រួលគោលនយោបាយរបស់ខ្លួន ដើម្បីអនុវត្តតាមសេចក្តីសម្រេចនេះនៅតែមិនទាន់ពេញលេញនៅឡើយទេ៕
ដោយ៖ យា ចិន្ដាខន្ដី (ប្រភព៖ VNA)