AKP ភ្នំពេញ ថ្ងៃទី២៦ ខែកុម្ភៈ ឆ្នាំ២០២៦ -- អាកាសយានដ្ឋានប័រហ្គាស(Burgas) បានប្រកាសពីផ្លូវហោះហើរថ្មីសម្រាប់រដូវក្ដៅខាងមុខ ដែលជាផ្នែកមួយនៃការរៀបចំសម្រាប់ការបើកអាកាសយានដ្ឋានបន្ទាប់ពីការជួសជុលផ្លូវរត់ឡើងវិញទាំងស្រុង ដែលនឹងមានជើងហោះហើរត្រង់ទៅកាន់ទីក្រុងរ៉ូម ទីក្រុងឡុងដ៍ ទីក្រុងលីល ទីក្រុងវ៉ាសូវី និងទីក្រុងប៉ារីស។

​អាកាសយានដ្ឋានក៏បានប្រកាសផងដែរថា ចាប់ពីដើមខែឧសភាខាងមុខនេះ ក្រុមហ៊ុនអាកាសចរណ៍ Ryanair នឹងដំណើរការជើងហោះហើរត្រង់រវាងទីក្រុងប័រហ្គាស និងអាកាសយានដ្ឋានទីក្រុងរ៉ូមទីក្រុងហ្វីយូមីស៊ីណូ របស់ប្រទេសអ៊ីតាលី។ ជើងហោះហើរនឹងមានពីរដងក្នុងមួយសប្តាហ៍ គឺនៅថ្ងៃសុក្រ និងថ្ងៃអាទិត្យ ហើយសំបុត្រមានដាក់លក់រួចហើយ។

​ក្រុមហ៊ុនអាកាសចរណ៍អង់គ្លេស Jet2.com ក៏បានបញ្ជាក់ផងដែរថាខ្លួននឹងចាប់ផ្តើមប្រតិបត្តិការជើងហោះហើររវាងទីក្រុងឡុងដ៍ និងទីក្រុងប័រហ្គាស នៅថ្ងៃទី០២ ខែឧសភា។ ជើងហោះហើរលើផ្លូវនេះនឹងដំណើរការរៀងរាល់ថ្ងៃពុធ និងថ្ងៃសៅរ៍។

​ចាប់ពីថ្ងៃទី២៧ ខែឧសភា ក្រុមហ៊ុនអាកាសចរណ៍ Volotea របស់បារាំង នឹងបើកផ្លូវហោះហើរតាមរដូវកាលពីទីក្រុងលីល ទៅកាន់ទីក្រុងប័រហ្គាស។ ជើងហោះហើរទៅកាន់ទីក្រុងបារាំងនឹងមានម្តងក្នុងមួយសប្តាហ៍។

​ក្រុមហ៊ុនអាកាសចរណ៍ WizzAir​ របស់ហុងគ្រី កំពុងបន្ថែមផ្លូវហោះហើរថ្មីពីទីក្រុងប័រហ្គាសទៅកាន់ទីក្រុងវ៉ារស្សាវ៉ា។ ជើងហោះហើរដែលនឹងចាប់ផ្តើមដំណើរការនៅថ្ងៃទី២១ ខែកក្កដាខាងមុខនេះ នឹងមានពីរដងក្នុងមួយសប្តាហ៍ គឺរៀងរាល់ថ្ងៃអង្គារ និងថ្ងៃសៅរ៍។

​ក្រុមហ៊ុនអាកាសចរណ៍ Transavia France នឹងដំណើរការជើងហោះហើរជាប្រចាំលើផ្លូវហោះហើរពីទីក្រុងប៉ារីស (អាកាសយានដ្ឋានOrly) ទៅកាន់ទីក្រុងប័រហ្គាស ចាប់ពីថ្ងៃទី២៥ ខែឧសភា រៀងរាល់ថ្ងៃចន្ទ។

​គម្រោងជួសជុលផ្លូវរត់នៅអាកាសយានដ្ឋានប័រហ្គាស គ្រោងនឹងបញ្ចប់នៅថ្ងៃទី០១ ខែឧសភា។ ការវិនិយោគដែលមានតម្លៃជាង ៥០លានអឺរ៉ូនេះ កំពុងត្រូវបានអនុវត្តដោយក្រុមហ៊ុនសម្បទាន Fraport Twin Star Airport Management AD ហើយវា គឺជាការវិនិយោគដ៏ធំបំផុតនៅក្នុងប្រវត្តិសាស្ត្រអាកាសយានដ្ឋាន៕

ដោយ៖ យា ចិន្ដាខន្ដី (ប្រភព៖ BTA)