AKP ភ្នំពេញ ថ្ងៃទី២៥ ខែកុម្ភៈ ឆ្នាំ២០២៦ -- ក្រសួងកិច្ចការសមុទ្រ និងនេសាទរបស់ប្រទេសឥណ្ឌូណេស៊ី បានពង្រីកការនាំចេញផលិតផលនេសាទរបស់ប្រទេសតាមរយៈកិច្ចព្រមព្រៀងជាមួយអាជ្ញាធរនៅក្នុងប្រទេសតួកគី និងប្រទេសចិន ដោយធានាបាននូវការអនុម័តនាំចេញសម្រាប់អង្គភាពកែច្នៃត្រីចំនួន៥៧។

ដូចដែលបានរាយការណ៍ដោយទីភ្នាក់ងារសារព័ត៌មានជាតិឥណ្ឌូណេស៊ី Antara បន្ទាប់ពីការចេញលេខអនុម័ត អាជីវកម្មនេសាទចំនួន៥៧ អាចនាំចេញត្រី និងផលិតផលនេសាទផ្សេងទៀតទៅកាន់ប្រទេសទាំងពីរខាងលើ។

ប្រធានទីភ្នាក់ងារត្រួតពិនិត្យគុណភាព និងត្រួតពិនិត្យផលិតផលសមុទ្រ និងនេសាទ លោកស្រី អ៊ីស្សាទីនី (Ishartini) បាននិយាយនៅក្នុងសេចក្តីប្រកាសព័ត៌មានជាផ្លូវការមួយនៅទីក្រុងហ្សាកាតា នៅថ្ងៃទី២៣ខែកុម្ភៈ ឆ្នាំ២០២៦ ថា ការស្នើឡើងនូវអង្គភាពកែច្នៃត្រី គឺច្រើនជាងការដាក់ស្នើបញ្ជី។ វាពាក់ព័ន្ធនឹងការផ្ទៀងផ្ទាត់បច្ចេកទេស និងការបំពេញកម្រងសំណួរដែលបំពេញតាមតម្រូវការជាក់លាក់របស់អាជ្ញាធរតួកគី និងចិន។

លោកស្រី​បាន​បន្ថែម​ថា អង្គភាព​ដែល​បាន​ស្នើ​ឡើង​ទាំងនេះ​កាន់​វិញ្ញាបនបត្រ​វិភាគ​គ្រោះថ្នាក់ និង​ចំណុច​ត្រួតពិនិត្យ​សំខាន់ (HACCP) និង​អនុវត្ត​យ៉ាង​តឹងរ៉ឹង​នូវ​ស្តង់ដារ​អនាម័យ និង​សុវត្ថិភាព​ចំណីអាហារ​ត្រី។

យោងតាមលោកស្រី បានឱ្យដឹងថា អង្គភាពចំនួន៥៦ ត្រូវបានដាក់ជូនសម្រាប់ការអនុម័តទៅកាន់ប្រទេសតួកគី ដែលក្នុងនោះ អង្គភាពចំនួន៥២បានទទួលលេខអនុម័ត។ អង្គភាពចំនួនបួនដែលនៅសល់ កំពុងស្ថិតក្រោមការផ្ទៀងផ្ទាត់។

ទន្ទឹមនឹងនេះ អង្គភាពទាំងប្រាំដែលបានស្នើឡើងទៅកាន់ប្រទេសចិនត្រូវបានអនុម័តភ្លាមៗដោយរដ្ឋបាលគយនៃសាធារណរដ្ឋប្រជាមានិតចិន(GACC)។

ប្រទេសតួកគីត្រូវបានចាត់ទុកថាជាទីផ្សារដ៏ជោគជ័យមួយសម្រាប់ផលិតផលនេសាទរបស់ឥណ្ឌូណេស៊ី។ ទិន្នន័យពីឆ្នាំ២០២៥ បានបង្ហាញថាទំនិញសំខាន់ៗចំនួនប្រាំពីរដែលនាំចេញទៅកាន់ប្រទេសនេះ រួមមាន ត្រីធូណាប្រភេទ Skipjack ត្រីធូណា និងស្លែ Carrageenan ដោយសម្រេចបានបរិមាណសរុប ២.៦០០តោន ដែលមានតម្លៃ ៤,៦លានដុល្លារអាម៉េរិក។

ប្រទេសចិននៅតែជាគោលដៅនាំចេញធំជាងគេរបស់ឥណ្ឌូណេស៊ីដោយមានទំនិញនេសាទចំនួន ១.០៨០ប្រភេទត្រូវបានដឹកជញ្ជូនទៅកាន់ប្រទេសនេះ។ កាលពីឆ្នាំមុន ការនាំចេញនេសាទរបស់ឥណ្ឌូណេស៊ីទៅកាន់ប្រទេសចិន បានឈានដល់ចំនួន ៤៩១.៥២៨តោន ដែលមានតម្លៃ ១,០៤ប៊ីលានដុល្លារអាម៉េរិក៕

ដោយ៖ យា ចិន្ដាខន្ដី (ប្រភព៖ VNA)