AKP ភ្នំពេញ ថ្ងៃទី២៤ ខែកុម្ភៈ ឆ្នាំ២០២៦ -- ក្រសួងការពារជាតិអ៊ីស្រាអែលបានហាមឃាត់ជាផ្លូវការនូវវេទិកាប្រព័ន្ធផ្សព្វផ្សាយប៉ាឡេស្ទីនចំនួន៥ គឺសារព័ត៌មានAlasima News សារព័ត៌មាន M3raj Network សារព័ត៌មាន Al-Quds Albawsala Network សារព័ត៌មាន Maydan Al-Quds និងសារព័ត៌មាន Plus Quds Network ដោយបានកំណត់ពួកគេថាជាអង្គការភេរវកម្ម។ រដ្ឋមន្ត្រីក្រសួងការពារជាតិអ៊ីស្រាអែល លោក ខេតហ្ស៍ បានចុះហត្ថលេខាលើបទបញ្ជានេះដោយផ្អែកលើការចោទប្រកាន់ពីបទ«ញុះញង់» ទាក់ទងនឹងការផ្សាយព័ត៌មានរបស់ស្ថាប័នទាំងនេះអំពីវិហារអ៊ីស្លាមអាល់-អាកសា និងការអភិវឌ្ឍនៅក្នុងទីក្រុងយេរូសាឡឹមខាងកើតដែលត្រូវបានកាន់កាប់។

ជាការឆ្លើយតប សារព័ត៌មាន Alasima News បានប្រកាសផ្អាកសកម្មភាពរបស់ខ្លួន ខណៈដែលថ្កោលទោសការអនុវត្តនេះថាជាការប៉ុនប៉ង«បិទមាត់» នូវសំឡេងរបស់ប៉ាឡេស្ទីន និងញែកទីក្រុងយេរូសាឡឹមចេញពីការត្រួតពិនិត្យជាសកល។ បណ្តាញសារព័ត៌មាននេះបានអះអាងថា ខណៈដែលប្រតិបត្តិការរបស់ខ្លួនត្រូវបានបង្ខំឱ្យបញ្ឈប់ ការហាមឃាត់របស់អ៊ីស្រាអែលមិនអាចលាក់បាំងការពិត ឬបំបិទមាត់រឿងរ៉ាវរបស់ប៉ាឡេស្ទីនទាក់ទងនឹងទីក្រុង និងទីតាំងពិសិដ្ឋរបស់វាបានទេ។

ការបង្ក្រាបនេះកើតឡើងចំពេលដែឡមានភាពតានតឹងកាន់តែខ្លាំងឡើង និងការរឹតបន្តឹងរបស់អ៊ីស្រាអែលកាន់តែខ្លាំងឡើងនៅក្នុងតំបន់វេសប៊ែង និងទីក្រុងយេរូសាឡឹមខាងកើត បន្ទាប់ពីការចាប់ផ្តើមសង្គ្រាមនៅតំបន់ហ្គាហ្សា។ ជម្លោះនៅតែផ្តោតទៅលើតួនាទីនៃទីក្រុងយេរូសាឡឹមខាងកើត ដែលប្រជាជនប៉ាឡេស្ទីនអះអាងថាជារដ្ឋធានីនាពេលអនាគតរបស់ពួកគេ និងវិហារអ៊ីស្លាមអាល់-អាកសា ដែលជាទីតាំងដែលមានសារៈសំខាន់ខាងសាសនាយ៉ាងជ្រាលជ្រៅចំពោះទាំងអ្នកកាន់សាសនាឥស្លាម និងជនជាតិយូដា៕

ដោយ៖ យា ចិន្ដាខន្ដី (ប្រភព៖ AA-AKP)