AKP ភ្នំពេញ ថ្ងៃទី២៤ ខែកុម្ភៈ ឆ្នាំ២០២៦ -- រឿងភាគរបស់អ្នកដឹកនាំរឿងលោក ស្តេហ្វេន កូមែនដារ៉េវ (Stephan Komandarev) ដែលមានចំណងជើងថា Made in EU បានទទួលការវាយតម្លៃយ៉ាងខ្លាំងនៅក្នុងការចេញផ្សាយចំនួន១៧ របស់អាល្លឺម៉ង់ នៅពេលដែលវាត្រូវបានចាក់បញ្ចាំងនៅក្នុងរោងភាពយន្តទូទាំងប្រទេសអាល្លឺម៉ង់។ នេះបើយោងតាមក្រុមការងារផលិតកម្មរបស់ខ្សែភាពយន្តនេះបាននិយាយកាលពីចុងសប្តាហ៍មុន។

បន្ទាប់ពីការចាក់បញ្ចាំងលើកដំបូងនៅលើពិភពលោកនៅឯមហោស្រពភាពយន្ត Venice ក្នុងប្រទេសអ៊ីតាលី និងកម្មវិធីពានរង្វាន់ជាច្រើនទៀតនៃពិធីមហោស្រព ខ្សែភាពយន្តនេះបានទៅដល់ប្រទេសអាល្លឺម៉ង់ ដោយអ្នករិះគន់មួយចំនួនបានកោតសរសើរចំពោះការសម្តែងរបស់តារាសម្តែងស្រី ជើហ្កាណា ភ្លែតនីយ៉ូវ៉ា (Gergana Pletnyova) និងឯកអគ្គរដ្ឋទូតប៊ុលហ្គារី លោក ហ្រ្គីហ្គោរ ផូរ៉ូហ្សាណូវ (Grigor Porozhanov) បានចូលរួមការចាក់បញ្ចាំងជាលើកដំបូងនៅទីក្រុងប៊ែរឡាំង។

សារព័ត៌មាន INDIEKINO បានសរសេរថា ជាមួយនឹងរឿង Made in EU លោក កូមែនដារ៉េវ បានធ្វើការរិះគន់យ៉ាងខ្លាំងអំពីមូលធននិយម និងការពិតនៃសង្គមដែលរំលឹកដល់ខ្សែភាពយន្តរបស់លោក គែន ឡូច (Ken Loach)។

Cinema បានសរសេរថា ខ្សែភាពយន្តនេះបង្ហាញពីការបែកបាក់សង្គមនិងសេដ្ឋកិច្ចនៅក្នុង EU យ៉ាងឈឺចាប់ ហើយវាជាមេរៀនអំពីផ្នែកងងឹតនៃមូលធននិយម និងធម្មជាតិរបស់មនុស្ស។ សារព័ត៌មាន KNA បានណែនាំវាជារឿងភាគសង្គមដ៏រំជួលចិត្តមួយ ដែលមិនត្រឹមតែបង្ហាញពីលក្ខខណ្ឌការងារដែលមិនមានសុវត្ថិភាពនៅក្នុងតំបន់ខ្លះនៃសហភាពអឺរ៉ុបប៉ុណ្ណោះទេប៉ុន្តែថែមទាំងទាក់ទាញអ្នកទស្សនាជាមួយនឹងរឿងរ៉ាវដ៏រស់រវើក និងកំណាព្យផងដែរ ដោយបានបន្ថែមថា គ្មានអ្វីនៅក្នុងខ្សែភាពយន្តនេះស្តាប់ទៅដូចជាការអធិប្បាយ ឬសិប្បនិម្មិតនោះទេ ហើយកម្លាំងរបស់វាបានមកពីគ្រោងរឿង និងការសម្ដែងទាំងស្រុង។

ការសម្តែងដ៏ស្ងប់ស្ងាត់ និងទន់ភ្លន់របស់តារាសម្តែងស្រី ភ្លែតនីយ៉ូវ៉ាបានផ្តល់ឱ្យរឿងភាគសង្គមមួយនេះនូវអារម្មណ៍សោកនាដកម្មយ៉ាងជ្រាលជ្រៅ។ ដោយឡែក គេហទំព័រ Film-Rezensionen.de បានសរសេរថា ការសម្តែងតិចតួចបំផុត និងភាពបើកចំហដ៏គួរឱ្យចាប់អារម្មណ៍របស់នាងជំរុញឱ្យមានការយល់ចិត្តដោយមិនប្រែក្លាយខ្សែភាពយន្តនេះទៅជារឿងភាគនៃភាពជាជនរងគ្រោះ ឬការសងសឹកឡើយ ដោយបានបន្ថែមថា វារក្សានូវសេចក្តីថ្លៃថ្នូររបស់វីរនារី ដែលមានទាំងទុក្ខវេទនា និងភាពធន់ ហើយលោកអ្នកដឹកនាំរឿង កូមែនដារ៉េវ បានតាមដានវីរនារីដ៏ស្ងប់ស្ងាត់របស់លោកយ៉ាងដិតដល់។

គេហទំព័រ nochnfilm.de បានបន្ថែមថា តារាសម្តែងស្រី ភ្លែតនីយ៉ូវ៉ា កាន់ខ្សែភាពយន្តទាំងមូលនៅលើស្មារបស់នាងជាមួយនឹងការសម្តែងដ៏តឹងរ៉ឹង និងពិតប្រាកដ។

គេហទំព័រសារព័ត៌មាន artechock បានសរសេរថា ខ្សែភាពយន្ត Made in EU លេចឡើងនៅលើស្លាកដូចវាជាសញ្ញាសម្គាល់នៃគុណភាពហើយលោកអ្នកដឹកនាំរឿង កូមែនដារ៉េវ បានសួរដោយស្ងៀមស្ងាត់ ប៉ុន្តែមិនឈប់ឈរអំពីគុណភាពសម្រាប់អ្នកណា សុវត្ថិភាពសម្រាប់អ្នកណា និងសាមគ្គីភាពសម្រាប់អ្នកណា។ សារព័ត៌មាននេះបានបន្ថែមថា នៅទីបញ្ចប់គ្មានការលួងលោមទេ មានតែភាពច្បាស់លាស់ប៉ុណ្ណោះ ហើយប្រហែលច្រើនជាងអ្វីដែលអាចទាមទារបានពីខ្សែភាពយន្តមួយនេះ។

គេហទំព័រសារព័ត៌មាន filmdienst បានសរសេរថា ខ្សែភាពយន្តនេះគឺជាស្នាដៃដែលបង្ហាញពីការពិតដែលលាក់នៅពីក្រោយនៃស្លាកគុណភាពMade in EU។ លោក កូមែនដារ៉េវ បាននិយាយថា «ការវាយតម្លៃទាំងនេះធ្វើឱ្យយើងសប្បាយចិត្តយ៉ាងខ្លាំង។ ខ្សែភាពយន្តនេះ គឺជាការសហការផលិតជាមួយប្រទេសអាល្លឺម៉ង់ ដែលជាកិច្ចសហការដ៏អស្ចារ្យចំពោះភាពជាដៃគូរបស់យើងជាមួយផលិតកម្ម 42film ដែលជាអ្នកផលិតរួមគ្នាយូរអង្វែងរបស់យើង។ ខ្សែភាពយន្តនេះនឹងចាក់បញ្ចាំងនៅក្នុងរោងកុនរបស់ប្រទេសឆែកសម្រាប់រយៈពេលបីសប្តាហ៍៕

ដោយ៖ យា ចិន្ដាខន្ដី (ប្រភព៖ BTA)