AKP ភ្នំពេញ ថ្ងៃទី២៤ ខែកុម្ភៈ ឆ្នាំ២០២៦ -- ក្រសួងកសិកម្មបាននិយាយថាប្រទេសអាហ្វ្រិកខាងត្បូងបានទទួលវ៉ាក់សាំងជំងឺជើង និងមាត់ (FMD) ចំនួនមួយលានដូស ដែលជាផ្នែកមួយនៃកិច្ចខិតខំប្រឹងប្រែងដើម្បីទប់ស្កាត់ការផ្ទុះឡើងនៃជំងឺនេះឡើងវិញ។

យោងតាមក្រសួងបានឱ្យដឹងថា វ៉ាក់សាំងទាំងនេះ ដែលមានប្រភពមកពីក្រុមហ៊ុនឱសថអាហ្សង់ទីន Biogenesis Bago គឺជាវ៉ាក់សាំងដំបូងនៃការដាក់ឱ្យប្រើប្រាស់ជាដំណាក់កាលទូទាំងប្រទេស ដោយមានការរំពឹងថានឹងមានដូសបន្ថែមចំនួនប្រាំលានដូសទៀតនៅក្នុងខែមីនា។

រដ្ឋមន្ត្រីក្រសួងកសិកម្ម លោក ចន ស្ទីនុយសេន (John Steenhuisen)បានមានប្រសាសន៍ក្នុងពេលទទួលការដឹកជញ្ជូនដូសវ៉ាក់សាំងជាផ្លូវការថា«ដបតូចមួយនេះនឹងក្លាយជាការចាប់ផ្តើមរបស់យើងក្នុងការនាំយកសាច់ក្រហមចូលទៅក្នុងទីផ្សារជុំវិញពិភពលោក»។

លោកបានកត់សម្គាល់ថា ការជំរុញការចាក់វ៉ាក់សាំងនឹងអនុញ្ញាតឱ្យអាជ្ញាធរផ្លាស់ប្តូរពីការឆ្លើយតបនៃការផ្ទុះឡើងដោយប្រតិកម្មទៅជាការគ្រប់គ្រងជំងឺដោយសកម្ម ហើយទំនុកចិត្តថា កម្មវិធីចាក់វ៉ាក់សាំងនឹងជួយទប់ស្កាត់ការផ្ទុះឡើងនៃជំងឺនេះនាពេលបច្ចុប្បន្ន។

ប្រទេសអាហ្វ្រិកខាងត្បូងបានប្រឈមមុខនឹងការផ្ទុះឡើងនៃជំងឺFMD ម្តងហើយម្តងទៀតក្នុងរយៈពេលប៉ុន្មានឆ្នាំចុងក្រោយនេះ ដែលបណ្តាលឱ្យមានការរឹតបន្តឹងការនាំចេញ និងសម្ពាធកាន់តែខ្លាំងឡើងលើកសិករចិញ្ចឹមសត្វ។

យោងតាមរបាយការណ៍ថ្មីៗនេះរបស់ការិយាល័យគោលនយោបាយស្បៀងអាហារ និងកសិកម្មបានឱ្យដឹងថា ករណីជំងឺ FMD ចំនួន២៤.៤០០ករណីត្រូវបានរាយការណ៍នៅក្នុងសត្វពាហនៈក្នុងស្រុកនៃឆ្នាំ២០២៥ ដែលលើសពីកម្រិតខ្ពស់បំផុតក្នុងរយៈពេល ២០ឆ្នាំមុនចំនួន៧.៧០០ករណីដែលត្រូវបានកត់ត្រាក្នុងឆ្នាំ២០២២។ ការផ្ទុះឡើងនៃជំងឺនេះបានជះឥទ្ធិពលយ៉ាងខ្លាំងដល់ការនាំចេញសាច់គោរបស់ប្រទេសដែលមានចំនួនសរុប ២៤.៧៧៣តោនក្នុងរយៈពេល ១១ខែដំបូងនៃឆ្នាំ២០២៥ បានធ្លាក់ចុះពី ៣៨.៦៧៧តោនក្នុងរយៈពេលដូចគ្នាក្នុងឆ្នាំ២០២៤៕

ដោយ៖ មូល មិនា (ប្រភព៖ ស៊ីនហួ)