AKP សៀមរាប ថ្ងៃទី២៣ ខែកុម្ភៈ ឆ្នាំ២០២៦

រូបតុក្កតាយក្សដែលជាប្រភេទសត្វចំនួន៨ បានបង្ហាញខ្លួននៅលើដងផ្លូវយ៉ាងស្រស់ត្រកាល អមដោយសំឡេងភ្លេង និងសំឡេងប្រជាពលរដ្ឋ និងភ្ញៀវទេសចរជាតិ អន្តរជាតិ ស្រែកអបអរសាទសើចសប្បាយរីករាយយ៉ាងច្រើនកុះករ ខណៈពួកគាត់បានចូលរួមដង្ហែ និងទស្សនាព្រឹត្តិការណ៍ដង្ហែក្បួនតុក្កតាយក្ស ឆ្នាំ២០២៦ នារាត្រីថ្ងៃទី២១ ខែកុម្ភៈ ឆ្នាំ២០២៦។ ចំពោះព្រឹត្តិការណ៍ដង្ហែក្បួនតុក្កតាយក្សនេះ គឺស្ថិតក្នុងសកម្មភាពរស់រវើនៅតាមដងផ្លូវចេញពីវត្តដំណាក់ ឆ្ពោះទៅសួនច្បារជិតព្រះរាជដំណាក់ ក្រុងសៀមរាប ខេត្ដសៀមរាប។ 

ព្រឹត្តិការណ៍នេះ បានប្រារព្ធឡើងក្រោមប្រធានបទ “ក្បួនដង្ហែព្រៃ” ដើម្បីអបអរសាទរសត្វព្រៃដ៏អស្ចារ្យរបស់ប្រទេសកម្ពុជា ចាប់ពីប្រភេទសត្វល្បីៗ រហូតដល់សត្វកម្រ និងជិតផុតពូជ។ 

បើតាមគណៈកម្មការរៀបចំព្រឹត្ដិការណ៍នេះបានឱ្យដឹងថា សម្រាប់ឆ្នាំ២០២៦នេះ មានប្រភេទសត្វដែលត្រូវបានជ្រើសរើសធ្វើជាតុក្កតានៅក្នុងព្រឹត្តិការណ៍ឆ្នាំនេះមាន ១- រមាំង ២- ព្រាប ស ៣- ភេរោមច្រមុះ  ៤-ដំរីអាស៊ី  ៥- ទោចថ្ពាល់លឿង ៦- អំពិលអំពែក ៧- តុកកែខ្លួនបង្កង់ភ្នំក្រវាញ និង៨- កេងកងធំ) ។

លោក អ៊ុន សាវ៉ាន់ អ្នកគ្រប់គ្រងទូទៅនៃគម្រោងតុក្កតាយក្សបានគូសបញ្ជាក់ថា គម្រោងនេះ មិនត្រឹមតែជាការកម្សាន្តប៉ុណ្ណោះទេ ប៉ុន្តែជាការបណ្តុះស្មារតីកុមារឱ្យចេះធ្វើការងារជាក្រុម ស្រឡាញ់វប្បធម៌ បរិស្ថាន និងយល់ដឹងពីតម្លៃសិល្បៈ។ លោកបានអះអាងថា៖ «នេះជាព្រឹត្តិការណ៍ដ៏ធំមួយក្នុងតំបន់អាស៊ីអាគ្នេយ៍។ យើងរៀបចំឡើងយ៉ាងហ្មត់ចត់ ដោយប្រើគ្រឿងផ្សំពីធម្មជាតិ និងសម្ភារៈសាមញ្ញៗដូចជា ឬស្សី រំពាក់ ក្រដាស និងកាវ រួមជាមួយការរចនាពន្លឺយ៉ាងប្រណីត ដើម្បីឱ្យរូបសត្វនីមួយៗលេចត្រដែតនាពេលរាត្រី»។  

ជាអ្នកគាំទ្រព្រឹត្ដិការណ៍នេះម្នាក់ដែរនោះ កញ្ញា និត ណាផា អ្នកចូលដង្ហែក្បួនតុក្កតាយក្សឆ្នាំ២០២៦ បានលើកឡើងថា ព្រឹត្តិការណ៍នេះ ពិតជាអស្ចារ្យ ក្នុងមួយឆ្នាំមានម្តង ហើយវាមិនត្រឹមតែជាការបង្ហាញស្នាដៃបង្កើនភាពច្នៃប្រឌិត ប៉ុណ្ណោះទេ ប៉ុន្តែវាគឺជាការរួមចំណែកយ៉ាងសំខាន់ក្នុងការលើកស្ទួយវិស័យទេសចរណ៍ និងផ្សព្វផ្សាយអត្តសញ្ញាណវប្បធម៌ខ្មែរទៅកាន់ពិភពលោក។ កញ្ញាបញ្ជាក់ដែរថា សម្រាប់ប្រធានបទ ក្នុងព្រឹត្តិការណ៍ដង្ហែក្បួនតុក្កតាយក្សឆ្នាំនេះ ពិតជាមានការចាប់អារម្មណ៍ ព្រោះវាមានការទាក់ទងទៅនឹងប្រភេទសត្វព្រៃ ដែលជាប្រធានបទដែលធ្វើឱ្យក្មេងជំនាន់ក្រោយបានស្គាល់ពីប្រភេទសត្វទាំងអស់នេះ។ 

ដោយកំពុងដើរផង និងដៃកំពុងរវល់ចុចទូរសព្ទថតរូបផង កញ្ញា និត ណាផា បានបន្ថែមថា៖ «សម្រាប់ឆ្នាំនេះ មានអារម្មណ៍ថា សប្បាយជាងឆ្នាំមុន ជាពិសេសពេលឃើញភ្ញៀវទេសចរបរទេសមានការចូលរួមច្រើន ហើយពួកគាត់បានលើកសរសើរពីព្រឹត្តិការណ៍នេះ ថាល្អ និងមានសារៈប្រយោជន៍សម្រាប់ក្មេងៗជំនាន់ក្រោយ ក៏ដូចជាការផ្សព្វផ្សាយពីវិស័យទេសចរណ៍កម្ពុជា»។

ជាមួយនឹងក្បួនដង្ហែដ៏រស់រវើកដែលរូបតុក្កតាយក្សដែលច្នៃឡើងយ៉ាងសម្រិតសម្រាំង នឹងត្រូវដាក់តាំងបង្ហាញនៅសួនច្បារជិតព្រះរាជដំណាក់ ក្រុងសៀមរាប រយៈពេល ៣ថ្ងៃ ដើម្បីផ្តល់ឱកាសឱ្យសាធារណជន ក៏ដូចជាភ្ញៀវទេសចរជាតិ-អន្ដរជាតិ បានទស្សនា និងថតរូបទុកជាអនុស្សាវរីយ៍។ 

សូមបញ្ជាក់ផងដែរថា ចាប់តាំងពីឆ្នាំ២០០៧មក គម្រោងតុក្កតាយក្ស បានបង្ហាញឱ្យកុមារ និងយុវជនយល់ថា សិល្បៈគឺលើសពីភាពច្នៃប្រឌិត វាជំរុញទំនុកចិត្ត ការបញ្ចេញមតិដោយខ្លួនឯង ការធ្វើការជាក្រុម និងមោទនភាពចំពោះបេតិកភណ្ឌវប្បធម៌ និងធម្មជាតិដ៏សម្បូរបែបរបស់កម្ពុជា។ ទន្ទឹមនេះ កុមាររាប់រយនាក់មកពីសាលារៀនក្នុងស្រុក និងអង្គការក្រៅរដ្ឋាភិបាល នឹងចំណាយពេលជាច្រើនសប្តាហ៍ក្នុងការរចនា និងដំឡើងតុក្កតាយក្ស ដ៏ធំសម្បើមក្រោមការណែនាំរបស់ក្រុមសិល្បករអាជីពរបស់គម្រោង។

សម្រាប់កិច្ចខិតខំប្រឹងប្រែងសហការរបស់ពួកគេបានបញ្ចប់ដោយក្បួនដង្ហែពេលយប់ដ៏រស់រវើក អមដោយតន្ត្រីករ និងអ្នកសម្ដែង ដែលត្រូវបានគេរំពឹងថានឹងទាក់ទាញអ្នកទស្សនារហូតដល់រាប់ពាន់នាក់។

ជាមួយគ្នានេះដែរ លោក អ៊ុន សាវ៉ាន់ អ្នកគ្រប់គ្រងទូទៅនៃគម្រោងតុក្កតាយក្សរូបនេះក៏បានអះអាងបន្ថែមថា៖ «ព្រឹត្តិការណ៍ដង្ហែតុក្កតាយក្ស បានរួមចំណែកមួយដ៏សំខាន់ក្នុងការស្រូបទាញភ្ញៀវទេសចរជាតិ និងអន្ដរជាតិ ឱ្យមកសម្រាកកម្សាន្តនៅខេត្តសៀមរាបកាន់តែច្រើន ព្រោះវាបង្ហាញពីភាពរឹងមាំនៃវិស័យសិល្បៈសហគមន៍ និងការរួមចំណែកយ៉ាងសកម្ម ក្នុងការផ្សព្វផ្សាយពីសត្វព្រៃកម្ពុជាទៅកាន់ពិភពលោក»៕

ដោយ៖ ឃុត សៅ