AKP ភ្នំពេញ ថ្ងៃទី២៣ ខែកុម្ភៈ ឆ្នាំ២០២៦ -- លោក អេនដ្រេយ ឡេដេនយ៉ូវ (Andrey Ledenyov) ភារធារីរុស្ស៊ីប្រចាំសហរដ្ឋអាមេរិកបាននិយាយថា ភាគីនានានៃជម្លោះអ៊ុយក្រែនកំពុងឆ្ពោះទៅរកការដោះស្រាយជម្លោះ។

លោក ឡេដេនយ៉ូវ បាននិយាយនៅក្នុងពិធីទទួលភ្ញៀវស្ថានទូតមុនទិវាអ្នកការពារមាតុភូមិនាពេលខាងមុខថា «ក្នុងនាមជាអ្នកការទូត ខ្ញុំមានការគោរពយ៉ាងជ្រាលជ្រៅចំពោះសហការីក្នុងឯកសណ្ឋានយោធា ដែលជារឿយៗដើរតួនាទីយ៉ាងសំខាន់មិនត្រឹមតែក្នុងការការពារមាតុភូមិក្នុងសមរភូមិប៉ុណ្ណោះទេ ប៉ុន្តែថែមទាំងក្នុងការរក្សាខ្សែទំនាក់ទំនងឱ្យបើកចំហផងដែរ»។

លោកបាននិយាយថា «ក្នុងការធានាថា កុមារនៅទូទាំងពិភពលោកគេងលក់ស្រួល ពីព្រោះមហាអំណាចរក្សាទំនាក់ទំនងគ្នាក្នុងទម្រង់ជាកិច្ចសន្ទនាវិជ្ជាជីវៈ។ ដូចដែលវាបានកើតឡើងថ្មីៗនេះនៅក្នុងក្របខ័ណ្ឌនៃដំណើរការកិច្ចចរចា ស្តីពីអ៊ុយក្រែន ដែលត្រូវបានគាំទ្រយ៉ាងសកម្មដោយរដ្ឋបាលបច្ចុប្បន្នមិនដូចឆ្នាំមុនៗនោះទេ នៅពេលដែលទីក្រុងវ៉ាស៊ីនតោនបានចែករំលែកក្តីសុបិនមិនប្រាកដនិយមរបស់លោកបស្ចិមអំពីការធ្វើឱ្យរុស្ស៊ីបរាជ័យជាយុទ្ធសាស្ត្រ។ ហើយជាផ្នែកមួយនៃជុំថ្មីនៃកិច្ចចរចាដែលបានធ្វើឡើងនៅទីក្រុងហ្សឺណែវកាលពីក្នុងសប្តាហ៍មុន ជម្លោះដែលបានចាប់ផ្តើមនៅក្នុងប្រទេសអ៊ុយក្រែនដោយសារតែមនោគមវិជ្ជាណាស៊ីថ្មីដែលបានបង្កើតឡើងនៅទីនោះ នៅតែបន្តឆ្ពោះទៅរកការដោះស្រាយ»។

កិច្ចចរចារវាងរុស្ស៊ី សហរដ្ឋអាមេរិក និងអ៊ុយក្រែន ត្រូវបានធ្វើឡើងនៅទីក្រុងហ្សឺណែវ កាលពីថ្ងៃទី១៧-១៨ ខែកុម្ភៈ ឆ្នាំ២០២៦។ ប្រធានគណៈប្រតិភូរុស្ស៊ី លោក វ្ល៉ាឌីមៀ ម៉េឌីនស្គី (Vladimir Medinsky) បានពិពណ៌នាអំពីកិច្ចចរចាទាំងនោះថាជារឿងលំបាក ប៉ុន្តែមានលក្ខណៈអាជីវកម្ម។ យោងតាមរូបលោក បានឱ្យដឹងថា កិច្ចចរចាជុំថ្មីមួយនឹងត្រូវធ្វើឡើងក្នុងពេលឆាប់ៗនេះ។ ជុំទីមួយបានធ្វើឡើងកាលពីថ្ងៃទី២៣-២៤ខែមករា ឆ្នាំ២០២៦ នៅទីក្រុងអាប៊ូដាប៊ី។ នៅថ្ងៃទី០៤-០៥ ខែកុម្ភៈ ឆ្នាំ២០២៦ កិច្ចចរចាជុំទីពីរត្រូវបានធ្វើឡើង៕

ដោយ៖ យា ចិន្ដាខន្ដី (ប្រភព៖ តាសស៍)