AKP ភ្នំពេញ ថ្ងៃទី២០ ខែកុម្ភៈ ឆ្នាំ២០២៦ -- លោក ដូណាល់ ធូសក៍ នាយករដ្ឋមន្ត្រីប៉ូឡូញ កាលពីថ្ងៃព្រហស្បតិ៍ បានចេញសេចក្តីអំពាវនាវជាបន្ទាន់មួយឱ្យពលរដ្ឋចាកចេញពីប្រទេសអ៊ីរ៉ង់ជាបន្ទាន់ និងបានព្រមានប្រឆាំងនឹងការធ្វើដំណើរទាំងអស់ទៅកាន់ប្រទេសនេះ ដោយលោកបានលើកឡើងពីហានិភ័យនៃការកើនឡើងនៃយោធាដែលជិតមកដល់។

លោក ធូសក៍ បានប្រាប់អ្នកសារព័ត៌មាននៅក្នុងទីក្រុងហ្ស៊ីឡុនកា នៅជិតទីក្រុងវ៉ារស្សាវ៉ាថា «សូមចាកចេញពីប្រទេសអ៊ីរ៉ង់ជាបន្ទាន់ ហើយកុំធ្វើដំណើរទៅកាន់ប្រទេសនេះទោះក្នុងកាលៈទេសៈណាក៏ដោយ។ ខ្ញុំមិនចង់ធ្វើឱ្យនរណាម្នាក់ភ្ញាក់ផ្អើលទេ ប៉ុន្តែយើងទាំងអស់គ្នាដឹងពីអ្វីដែលខ្ញុំកំពុងសំដៅទៅលើ។ លទ្ធភាពនៃជម្លោះ គឺពិតជាមានមែន»។

លោកនាយករដ្ឋមន្ត្រីបានព្រមានថា ឱកាសសម្រាប់ការជម្លៀសចេញអាចនឹងបិទយ៉ាងឆាប់រហ័ស។ លោកបាននិយាយថា «ក្នុងរយៈពេលពីរបីម៉ោង ដប់ពីរម៉ោង ឬច្រើនម៉ោងទៀត ការជម្លៀសចេញអាចនឹងលែងអាចធ្វើទៅបានទៀតហើយ» ដោយលោកបានជំរុញឱ្យប្រជាជនប៉ូឡូញយកចិត្តទុកដាក់ចំពោះការព្រមាននេះ។

រដ្ឋាភិបាលប៉ូឡូញមិនបានផ្តល់ព័ត៌មានលម្អិតអំពីចំនួនពលរដ្ឋប៉ូឡូញដែលកំពុងស្ថិតនៅក្នុងប្រទេសអ៊ីរ៉ង់នោះទេ។ ក្រសួងការបរទេសត្រូវបានគេរំពឹងថានឹងចេញសេចក្តីណែនាំបន្ថែម។

លោក ធូសក៍ បានកត់សម្គាល់ថា ការព្រមានជម្លៀសពីមុនត្រូវបានគេមិនអើពើកាលពីអតីតកាល ដែលមានផលវិបាកធ្ងន់ធ្ងរ។ លោកបាននិយាយថា «យើងធ្លាប់មានបទពិសោធន៍មិនល្អ។ មនុស្សមួយចំនួនមើលស្រាលចំពោះការអំពាវនាវបែបនេះ»។

ប្រភព និងរបាយការណ៍ប្រព័ន្ធផ្សព្វផ្សាយ បាននិយាយថា ទីក្រុងវ៉ាស៊ីនតោន និងទីក្រុងតែលអាវីវ ខិតជិតដល់ការប្រឈមមុខដាក់គ្នាផ្នែកយោធាមួយផ្សេងទៀតជាមួយអ៊ីរ៉ង់ បើទោះបីជាកិច្ចចរចាលើកម្មវិធីនុយក្លេអ៊ែររបស់ទីក្រុងតេអេរ៉ង់នៅតែបន្តក៏ដោយ។

អ៊ីស្រាអែល និងអ៊ីរ៉ង់មានសង្គ្រាមរយៈពេល ១២ថ្ងៃកាលពីក្នុងខែមិថុនាឆ្នាំ២០២៥ ដោយសហរដ្ឋអាមេរិកបានទម្លាក់គ្រាប់បែកទៅលើទីតាំងនុយក្លេអ៊ែរចំនួនបីរបស់អ៊ីរ៉ង់៕

ដោយ៖ យា ចិន្ដាខន្ដី (ប្រភព៖ AA-AKP)