AKP ភ្នំពេញ ថ្ងៃទី១៩ ខែកុម្ភៈ ឆ្នាំ២០២៦ -- កិច្ចចរចាត្រីភាគីជុំទីបីរវាងអ៊ុយក្រែន រុស្ស៊ី និងសហរដ្ឋអាមេរិកបានបញ្ចប់នៅក្នុងសប្តាហ៍នេះដោយគ្មានការទម្លាយភាពទាល់ច្រកទៅលើបញ្ហាសំខាន់ៗនោះទេ។ បើទោះបីជាមានកិច្ចចរចាយ៉ាងស្វិតស្វាញអស់រយៈពេលជាច្រើនម៉ោងក៏ដោយ ក៏ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelensky) បានបញ្ជាក់ថា ភាពខុសគ្នាសំខាន់ៗនៅតែមានទាក់ទងនឹងបទឈប់បាញ់ តួនាទីនៃតំបន់ដុនបាស និងសន្តិសុខនៃរោងចក្រថាមពលនុយក្លេអ៊ែរហ្សាប៉ូរីសហ្សៀ។ មិនមានកិច្ចព្រមព្រៀងជាផ្លូវការណាមួយត្រូវបានចុះហត្ថលេខានោះទេ ទោះបីជាភាគីទាំងពីរទទួលស្គាល់ថាមានមូលដ្ឋានគ្រឹះមួយចំនួនត្រូវបានដាក់សម្រាប់ការពិភាក្សានាពេលអនាគតក៏ដោយ។

អ្នកចរចារុស្ស៊ីបានពិពណ៌នាអំពីកិច្ចប្រជុំនេះថា «ដូចជាអាជីវកម្ម»ហើយបានបង្ហាញថា កិច្ចចរចាជុំថ្មីនឹងត្រូវបានកំណត់ពេលឆាប់ៗនេះ។គណៈប្រតិភូរុស្ស៊ីបានដំណើរការក្រោមការណែនាំដែលទទួលបានពីកិច្ចប្រជុំកំពូលមុនរវាងលោក វ្ល៉ាឌីមៀ ពូទីន (Vladimir Putin) និងលោក ដូណាល់ ត្រាំ (Donald Trump) ខណៈដែលប្រធានអ្នកចរចារបស់អ៊ុយក្រែនលោក រូស្ទែម យូម៉េរ៉ូវ (Rustem Umerov) បានសង្កត់ធ្ងន់ថា គោលដៅចុងក្រោយនៅតែជាសន្តិភាពដ៏យុត្តិធម៌ និងប្រកបដោយចីរភាព។ កិច្ចប្រជុំដាច់ដោយឡែកក៏ត្រូវបានធ្វើឡើងជាមួយតំណាងមកពីបណ្តាប្រទេសនៅអឺរ៉ុបជាច្រើនដើម្បីពង្រីកកិច្ចខិតខំប្រឹងប្រែងផ្នែកការទូត។

អ្នកជំនាញបានលើកឡើងថា វគ្គការទូតទាំងនេះបច្ចុប្បន្នបម្រើជាឧបករណ៍សម្រាប់ការគ្រប់គ្រងជម្លោះជាជាងដំណោះស្រាយចុងក្រោយ។នៅពេលដែលជម្លោះខិតជិតដល់ខួបឆ្នាំទីបួនរបស់វា វាបានវិវត្តទៅជាសង្គ្រាមនៃការខាតបង់ដែលកំពុងបង្ហូរធនធានរបស់គ្រប់ភាគីពាក់ព័ន្ធយ៉ាងខ្លាំង។ ដោយសារភាគីទាំងពីរមិនអាចសម្រេចបានជ័យជម្នះផ្នែកយោធាដ៏ម៉ឺងម៉ាត់ ស្ថានការណ៍នៅតែស្ថិតក្នុងភាពជាប់គាំង ខណៈដែលសហគមន៍អន្តរជាតិកំពុងស្វែងរកផ្លូវឆ្ពោះទៅរកការឯកភាពគ្នា៕

ដោយ៖ យា ចិន្ដាខន្ដី (ប្រភព៖ ឆាយណាដេលី)