AKP ភ្នំពេញ ថ្ងៃទី១៨ ខែកុម្ភៈ ឆ្នាំ២០២៦ -- បើទោះបីជាមានកិច្ចព្រមព្រៀងបទឈប់បាញ់ក៏ដោយ ក៏អង្គការសហប្រជាជាតិបានរាយការណ៍ថាអ៊ីស្រាអែលនៅតែបន្តរារាំង ឬបដិសេធចលនាជំនួយមនុស្សធម៌ខ្លះៗដែលសម្របសម្រួលនៅក្នុងតំបន់ហ្គាហ្សា។ យោងតាមអ្នកនាំពាក្យ លោក ស្តេហ្វេន ឌូចារិក (Stephane Dujarric) បានឱ្យដឹងថា មានតែប្រហែល ៥០% នៃបេសកកម្មមនុស្សធម៌ដែលបានគ្រោងទុកប៉ុណ្ណោះ ដែលត្រូវបានសម្របសម្រួលយ៉ាងពេញលេញក្នុងរយៈពេលប្រាំមួយថ្ងៃថ្មីៗនេះ។ ប្រតិបត្តិការដែលនៅសល់បានប្រឈមមុខនឹងការបដិសេធទាំងស្រុង ការពន្យារពេលយូរ ឬត្រូវបានបញ្ចប់ដោយផ្នែកដោយសារតែការរឹតបន្តឹង។

ឧបសគ្គផ្នែកភស្តុភារក៏ធ្វើឱ្យរារាំងដល់ជំនួយមនុស្សធម៌ចូលពីខាងក្រៅតំបន់ហ្គាហ្សាដែរ ដោយការដឹកជញ្ជូនពីហ្ស៊កដានីតម្រូវឱ្យមានចំណុចដឹកជញ្ជូនច្រើនកន្លែង និងពីប្រទេសអេហ្ស៊ីបប្រឈមមុខនឹងអត្រាត្រឡប់មកវិញខ្ពស់។ នៅច្រកឆ្លងកាត់ Kerem Shalom ការដឹកជញ្ជូនរបស់អេហ្ស៊ីបមានតិចជាង ៦០% ដែលត្រូវបានដឹកជញ្ជូនដោយជោគជ័យកាលពីដើមខែកុម្ភៈ។ ក្រុមការងារអង្គការសហប្រជាជាតិកំពុងពិភាក្សាជាមួយអាជ្ញាធរអ៊ីស្រាអែល ដើម្បីបញ្ជាក់ពីឧបសគ្គបច្ចេកទេសទាំងនោះ និងស្វែងរកដំណោះស្រាយចំពោះវិបត្តិមនុស្សធម៌ដែលកំពុងកើនឡើង។

ការរំខានដល់ជំនួយមនុស្សធម៌ត្រូវបានរាយការណ៍ថាបានកើតឡើងនៅក្នុងបរិបទនៃអំពើហិង្សាជាបន្តបន្ទាប់ បើទោះបីជាមានបទឈប់បាញ់ដែលគាំទ្រដោយសហរដ្ឋអាមេរិកដែលបានចាប់ផ្តើមនៅថ្ងៃទី១០ ខែតុលាឆ្នាំមុនក៏ដោយ។ ក្រសួងសុខាភិបាលតំបន់ហ្គាហ្សា បានអះអាងថាការរំលោភបំពានបទឈប់បាញ់រាប់រយលើក រួមទាំងការបាញ់ផ្លោង និងការបាញ់កាំភ្លើង បានបណ្តាលឱ្យមានមនុស្សស្លាប់ជាង ៦០០នាក់ និងរបួស១.៦០០នាក់ចាប់តាំងពីកិច្ចព្រមព្រៀងនេះបានចូលជាធរមាន ដែលកើតឡើងបន្ទាប់ពីជម្លោះរយៈពេលពីរឆ្នាំ ដែលបានឆក់យកជីវិតមនុស្សជាង៧២.០០០នាក់ និងបានធ្វើឱ្យតំបន់នេះត្រូវការជំនួយឥតសំណងជាបន្តបន្ទាប់៕

ដោយ៖ យា ចិន្ដាខន្ដី (ប្រភព៖ AA-AKP)