AKP ភ្នំពេញ ថ្ងៃទី១៨ ខែកុម្ភៈ ឆ្នាំ២០២៦ -- កិច្ចចរចាត្រីភាគីរវាងអ៊ុយក្រែនរុស្ស៊ី និងសហរដ្ឋអាមេរិក បានចាប់ផ្តើមនៅទីក្រុងហ្សឺណែវ ដែលជាការប៉ុនប៉ងលើកទីបីដើម្បីបង្កើតបទឈប់បាញ់ ខណៈដែលសង្គ្រាមនៅអ៊ុយក្រែនជិតដល់ខួបបួនឆ្នាំហើយ។ កិច្ចចរចាជុំនេះមានការផ្លាស់ប្តូរភាពជាអ្នកដឹកនាំ ដោយមានជំនួយការប្រធានាធិបតីរុស្ស៊ី លោក វ្ល៉ាឌីមៀ ម៉េឌីនស្គី (Vladimir Medinsky) និងប្រធានសន្តិសុខអ៊ុយក្រែន លោក រូស្ទែម យូម៉េរ៉ូវ (Rustem Umerov) ដឹកនាំក្រុមការងាររៀងៗខ្លួន។ កិច្ចចរចានេះត្រូវបានគេរំពឹងថានឹងគ្របដណ្តប់លើវិសាលភាពទូលំទូលាយ ចាប់ពីជម្លោះទឹកដីរហូតដល់ក្របខ័ណ្ឌមនុស្សធម៌ និងសន្តិសុខ។

គណៈប្រតិភូអ៊ុយក្រែនផ្តោតសំខាន់ទៅលើការធានាបទឈប់បាញ់ថាមពល និងបង្កើតយន្តការត្រួតពិនិត្យមុខងារសម្រាប់បទឈប់បាញ់ដែលអាចកើតមាន។ ខណៈដែលលោក យូម៉េរ៉ូវ បានពិពណ៌នាអំពីវិធីសាស្រ្តនេះថា ជាការស្ថាបនា និងផ្តោតទៅលើសន្តិភាពប្រកបដោយចីរភាព។ លោកបានព្រមានថា សម្ពាធយោធាពីរុស្ស៊ីមិនទាន់ថយចុះនៅឡើយទេ ដោយបង្ហាញថា ការវាយប្រហារដ៏ធំអាចនឹងកើតឡើងភ្លាមៗ បើទោះបីជាមានកិច្ចខិតខំប្រឹងប្រែងផ្នែកការទូតក៏ដោយ។

កិច្ចពិភាក្សាកំពុងត្រូវបានធ្វើឡើងដោយបិទទ្វារជិត ដោយមន្ត្រីមកពីគ្រប់ភាគីទាំងអស់នៅតែមានការរំពឹងទុក។ បើទោះបីជាសហរដ្ឋអាមេរិកនៅតែបន្តដើរតួនាទីយ៉ាងសំខាន់ក្នុងដំណើរការសម្របសម្រួលក៏ដោយ ក៏អ្នកនាំពាក្យវិមានក្រឹមឡាំងបានបញ្ជាក់ថា មិនមានសេចក្តីថ្លែងការណ៍ជាសាធារណៈភ្លាមៗណាមួយត្រូវបានគេរំពឹងទុកនោះទេ។ គោលដៅចម្បងនៅតែជាការជំរុញដំណោះស្រាយដែលអាចកាត់បន្ថយជម្លោះប្រដាប់អាវុធដែលកំពុងតែបន្ត៕

ដោយ៖ យា ចិន្ដាខន្ដី (ប្រភព៖ AA-AKP)