EN 
FR 
AR
CNម៉ាឡេស៊ីបង្ក្រាបបារីអេឡិចត្រូនិក
AKP ភ្នំពេញ ថ្ងៃទី១៧ ខែកុម្ភៈ ឆ្នាំ២០២៦ -- មនុស្សសរុបចំនួន ៣៣នាក់ត្រូវបានចាប់ខ្លួន ខណៈដែលឧបករណ៍បារីអេឡិចត្រូនិច និងទំនិញដែលមានតម្លៃជាង ១,៧២លានរីងហ្គីត (៤០០.០០០ដុល្លារអាម៉េរិក) ត្រូវបានរឹបអូសនៅក្នុងប្រតិបត្តិការរួមគ្នាមួយ ដែលបានធ្វើឡើងក្នុងពេលដំណាលគ្នានៅទូទាំងស្រុកចំនួនប្រាំពីរនៅក្នុងរដ្ឋសាបារបស់ប្រទេសម៉ាឡេស៊ី។
ជំនួយការជាន់ខ្ពស់មេបញ្ជាការកងពលតូចប្រតិបត្តិការទូទៅនៃរដ្ឋសាបា លោក ណូ អូម៉ា សាបពី (Nor Omar Sappi) បាននិយាយថា បុរស២៤នាក់ និងស្ត្រី ០៩នាក់ ត្រូវបានចាប់ខ្លួនក្នុងអំឡុងពេលប្រតិបត្តិការក្នុងពេលដំណាលគ្នាមួយកាលពីពេលថ្មីៗនេះ។
ការឆ្មក់ចូលបង្រ្កាបនេះត្រូវបានធ្វើឡើងនៅស្រុកកូតា គីណាបាលូ ស្រុកតាវោ ស្រុកសាន់ដាកាន់ ស្រុកឡាហាដ ដាទូ ស្រុកបេលូរ៉ាន់ ស្រុកកេនីងហ្គោ និងស្រុកសេមប៉ូណា។
លោកបាននិយាយក្នុងសេចក្តីថ្លែងការណ៍មួយកាលពីពេលថ្មីៗនេះថា«យើងក៏បានរឹបអូសឧបករណ៍បារីអេឡិចត្រូនិក និងឧបករណ៍ជក់វេបចំនួន១៦.៩២៥គ្រឿង សារធាតុរាវអេឡិចត្រូនិកសម្រាប់ជក់ចំនួន ២១៩.៩៥៩លីត្រនិងរបស់របរចំនួន ៩៥មុខផ្សេងៗទៀត»។
ករណីនេះកំពុងត្រូវបានស៊ើបអង្កេតក្រោមមាត្រា១០ (១) នៃច្បាប់គ្រប់គ្រងផលិតផលជក់សម្រាប់សុខភាពសាធារណៈឆ្នាំ២០២៤ ដែលចែងអំពីការពិន័យរហូតដល់ ២០.០០០រីងហ្គីតសម្រាប់បទល្មើសលើកដំបូង ឬ៣០.០០០រីងហ្គីតសម្រាប់បទល្មើសជាបន្តបន្ទាប់ ឬជាប់ពន្ធនាគាររហូតដល់ពីរឆ្នាំ ឬទាំងពីរ។
លើសពីនេះ លោកបាននិយាយថា ការស៊ើបអង្កេតកំពុងត្រូវបានធ្វើឡើងក្រោមមាត្រា១៥ និងមាត្រា៨ នៃច្បាប់ដូចគ្នាទាក់ទងនឹងការហាមឃាត់ការផ្សាយពាណិជ្ជកម្ម ការផ្សព្វផ្សាយ និងការឧបត្ថម្ភផលិតផលថ្នាំជក់ ក៏ដូចជាមាត្រា៣ (១) នៃច្បាប់ស្តីពីអាជ្ញាប័ណ្ណពាណិជ្ជកម្មឆ្នាំ១៩៤៨៕
