AKP ភ្នំពេញ ថ្ងៃទី១៦ ខែកុម្ភៈ ឆ្នាំ២០២៦ -- ថ្លែងនៅក្នុងសន្និសីទសន្តិសុខទីក្រុងមុយនិច រដ្ឋមន្ត្រីការបរទេសចិន លោក វ៉ាង យី (Wang Yi) បានគូសបញ្ជាក់ពីចក្ខុវិស័យរបស់ទីក្រុងប៉េកាំងមុនកិច្ចប្រជុំកំពូល ដែលបានគ្រោងទុករវាងប្រធានាធិបតីចិន លោក ស៊ី ជីនភីង (Xi Jinping) និងប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump)។

លោក វ៉ាង បានសង្កត់ធ្ងន់ថា ប្រទេសចិនខិតជិតទំនាក់ទំនងជាមួយសហរដ្ឋអាមេរិកដោយការគោរពគ្នាទៅវិញទៅមក ការរួមរស់ដោយសន្តិភាព និងកិច្ចសហប្រតិបត្តិការប្រកបដោយចីរភាព ដោយលោកបានបន្ថែមថា កិច្ចសន្ទនា និងកិច្ចពិគ្រោះយោបល់នៅតែជាផ្លូវមួយដ៏ត្រឹមត្រូវ។

លោកបាននិយាយថា មានទស្សនវិស័យពីរផ្សេងគ្នាសម្រាប់ទំនាក់ទំនងទ្វេភាគី ដែលមួយផ្អែកទៅលើគោលនយោបាយវិជ្ជមាន និងជាក់ស្តែងចំពោះប្រទេសចិន ដែលនឹងនាំយើងទៅរកកិច្ចសហប្រតិបត្តិការសម្រាប់លទ្ធផលល្អបំផុតសម្រាប់ប្រទេសទាំងពីរ និងពិភពលោក និងមួយទៀតមានឫសគល់នៅក្នុងការផ្ដាច់ខ្លួន និងការបោះជំហានលើខ្សែក្រហមរបស់ចិន ដែលទំនងជានឹងជំរុញឱ្យប្រទេសចិន និងសហរដ្ឋអាមេរិកឆ្ពោះទៅរកជម្លោះ។

លោក វ៉ាង បានសង្កត់ធ្ងន់ថា ប្រទេសចិននៅតែមានទំនុកចិត្តថា កិច្ចសហប្រតិបត្តិការ គឺ «ជាជម្រើសត្រឹមត្រូវតែមួយគត់ និងចៀសវាងការប្រឈមមុខដាក់គ្នា»៕

ដោយ៖ យា ចិន្ដាខន្ដី (ប្រភព៖ ស្ពុតនីក)