AKP ភ្នំពេញ ថ្ងៃទី១៣ ខែកុម្ភៈ ឆ្នាំ២០២៦ -- អ្នកនាំពាក្យវិមានក្រឹមឡាំងលោក ឌីមីទ្រី ប៉េសកូវ (Dmitry Peskov) បាននិយាយកាលពីថ្ងៃព្រហស្បតិ៍ថា ប្រទេសរុស្ស៊ីរំពឹងថា កិច្ចចរចាជុំបន្ទាប់ ស្តីពីបញ្ហាអ៊ុយក្រែននឹងកើតឡើងក្នុងពេលឆាប់ៗនេះ។

លោក ប៉េសកូវ បានប្រាប់អ្នកសារព័ត៌មានថា «មានការយោគយល់គ្នាជាក់លាក់មួយ។ ដូចដែលយើងបាននិយាយ យើងរំពឹងថា ជុំទីពីរនឹងកើតឡើងក្នុងពេលឆាប់ៗនេះ។ ផ្ទុយទៅវិញ នេះនឹងក្លាយជាជុំទីបី ហើយជុំបន្ទាប់នឹងកើតឡើងក្នុងពេលឆាប់ៗនេះ។ យើងក៏នឹងជូនដំណឹងដល់អ្នកនៅពេលដែលវាកើតឡើងផងដែរ»។

លោក ប៉េសកូវ ក៏បាននិយាយផងដែរថា គ្មានអ្វីថ្មីនៅក្នុងសេចក្តីថ្លែងការណ៍របស់លោក វ៉ូឡូឌីមៀ ហ្សេលេនស្គី (Volodymyr Zelensky)ដែលថា លោកនឹងមិនមកទីក្រុងម៉ូស្គូសម្រាប់កិច្ចចរចានោះទេ។

ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) បាននិយាយថា ប្រសិនបើលោក ហ្សេលេនស្គី ត្រៀមខ្លួនរួចរាល់សម្រាប់កិច្ចប្រជុំ នោះលោកអាចមកទីក្រុងម៉ូស្គូបាន។ លោក ហ្សេលេនស្គី បានបដិសេធចំពោះការផ្តល់ជូននេះ ហើយបាននិយាយថា លោកមិនទាន់ត្រៀមខ្លួនរួចរាល់នៅឡើយទេ ដើម្បីជួបគ្នានៅលើទឹកដីនៃប្រទេសរុស្ស៊ី ឬបេឡារុស្សនោះ៕

ដោយ៖ យា ចិន្ដាខន្ដី (ប្រភព៖ ស្ពុតនីក)