AKP ភ្នំពេញ ថ្ងៃទី១៣ ខែកុម្ភៈ ឆ្នាំ២០២៦ -- ប្រទេសចិនបានធ្វើការសាកល្បងហោះហើរដ៏សំខាន់មួយរបស់គ្រាប់រ៉ុក្កែតឡុងម៉ាច១០ និងយានអវកាសម៉េងចូវ ប្រកបដោយជោគជ័យកាលពីថ្ងៃពុធ ដោយខិតជិតដល់គោលដៅរបស់ខ្លួននៃបេសកកម្មនាំមនុស្សទៅកាន់ឋានព្រះច័ន្ទនៅត្រឹមឆ្នាំ២០៣០។ ដោយ​បាន​បាញ់​បង្ហោះ​ចេញពី​ទីតាំង​បង្ហោះ​អវកាសវេនឆាងបេសកកម្ម​នេះ​សម្រេចបាន​នូវ​ស្នាដៃ​ប្រវត្តិសាស្ត្រ​ដំបូង​ជាច្រើន រួមទាំង​ការ​វិលត្រឡប់​មក​ផែនដី​វិញប្រកប​ដោយ​ជោគជ័យជា​លើកដំបូង​របស់​ប្រទេស​ចិន និង​ការ​ទម្លាក់​គ្រាប់​រ៉ុក្កែត​អវកាសជា​លើកដំបូង​ផងដែរ។ ព្រឹត្តិការណ៍​សំខាន់ៗ​ទាំងនេះ បាន​បង្ហាញ​ពី​ការ​លោតផ្លោះ​ដ៏​សំខាន់​មួយ​នៅក្នុង​កិច្ចខិតខំ​ប្រឹងប្រែង​របស់​ប្រទេស​ចិន​ក្នុង​ការអភិវឌ្ឍ​បច្ចេកវិទ្យាគ្រាប់​រ៉ុក្កែត ​ដែល​អាច​ប្រើ​ឡើងវិញ​បាន ដែល​បច្ចុប្បន្ន​ឈានមុខគេដោយ​សហរដ្ឋអាមេរិក​។

ការធ្វើតេស្តសាកល្បងនេះផ្តោតសំខាន់ទៅលើសមយុទ្ធដែលមានហានិភ័យខ្ពស់ ជាពិសេសការធ្វើតេស្តសាកល្បងគេចចេញ «Max Q»ដែលយានអវកាសម៉េងចូវបានបំបែកចេញប្រកបដោយជោគជ័យនៅចំណុចសម្ពាធខ្យល់ជាអតិបរមា។ ខណៈដែលយានអវកាសបានចុះចតដោយសុវត្ថិភាពតាមរយៈឆ័ត្រយោងនៅសមុទ្រចិនខាងត្បូង គ្រាប់រ៉ុក្កែតឡុងម៉ាច១០ បានបន្តចូលទៅក្នុងគែមនៃលំហមុនពេលធ្វើការចុះចតដែលត្រូវបានគ្រប់គ្រង។ ដោយប្រើព្រុយក្រឡាចត្រង្គ និងការដំឡើងម៉ាស៊ីនឡើងវិញដើម្បីគ្រប់គ្រងល្បឿន និងគន្លង វាបានអនុវត្តសមយុទ្ធដ៏ទំនើបមួយដើម្បីសំកាំងខ្លួន និងបាញ់ទម្លាក់នៅក្នុងតំបន់ស្តារឡើងវិញដែលបានកំណត់។

ក្រុមវិស្វករបានបញ្ជាក់ថា បេសកកម្មនេះបានផ្ទៀងផ្ទាត់ប្រព័ន្ធសំខាន់ៗសម្រាប់ការរុករក ភាពធន់នឹងកំដៅ និងការរកឃើញនូវដំណើរការខុសប្រក្រតីក្រោមលក្ខខណ្ឌធ្ងន់ធ្ងរ។ ទាំងគ្រាប់រ៉ុក្កែតឡុងម៉ាច១០ និងយានអវកាសម៉េងចូវ សុទ្ធតែស្ថិតក្នុងដំណាក់កាលអភិវឌ្ឍន៍ចុងក្រោយរបស់ពួកគេនៅសាជីវកម្មវិទ្យាសាស្ត្រ និងបច្ចេកវិទ្យាអវកាសចិន។ នៅពេលដែលមានដំណើរការពេញលេញ យានអវកាសទាំងនេះនឹងក្លាយជាយានចម្បងសម្រាប់ដឹកជញ្ជូនអវកាសយានិកទៅកាន់ឋានព្រះច័ន្ទ និងដឹកទំនិញទៅកាន់ស្ថានីយ៍អវកាសទៀងកុង ដែលនៅទីបំផុតវានឹងជំនួសម៉ូដែលសិនចូវ ដែលជាម៉ូដែលចាស់៕

ដោយ៖ យា ចិន្ដាខន្ដី (ប្រភព៖ ឆាយណាដេលី)