AKP ភ្នំពេញ ថ្ងៃទី១៣ ខែកុម្ភៈ ឆ្នាំ២០២៦ -- លោក ចូណាស់ ហ្គារ ស្ត័រ (Jonas Gahr Store) នាយករដ្ឋមន្ត្រីន័រវេស និងលោក អេស្ពេន បាត អ៊ីដ (Espen Barth Eide) រដ្ឋមន្ត្រីការបរទេស បានទទួលលោក ម៉ាហ៍មូដ អាប់បាស់ (Mahmoud Abbas) ប្រធានាធិបតីប៉ាឡេស្ទីន នៅទីក្រុងអូស្លូ កាលពីថ្ងៃពុធ ដោយបញ្ជាក់ជាថ្មីអំពីការគាំទ្ររបស់ប្រទេសនេះចំពោះដំណោះស្រាយរដ្ឋពីរពិតប្រាកដ។

នៅក្នុងសេចក្តីថ្លែងការណ៍មួយដែលចេញដោយរដ្ឋាភិបាលន័រវេសលោក ស្ត័រ បាននិយាយថា លោកមានការព្រួយបារម្ភយ៉ាងខ្លាំងអំពីការវិវត្តនៅក្នុងប្រទេសប៉ាឡេស្ទីន។

ខណៈពេលដែលដំណាក់កាលទីពីរនៃផែនការសន្តិភាពត្រូវបានគេសន្មត់ថាកំពុងដំណើរការ សេចក្តីថ្លែងការណ៍បានកត់សម្គាល់ថា ស្ថានភាពនៅតំបន់ហ្គាហ្សានៅតែធ្ងន់ធ្ងរខ្លាំងសម្រាប់ប្រជាជនប្រហែលពីរលាននាក់ដោយមានទំនិញ និងជំនួយសង្គ្រោះបន្ទាន់ចូលទៅក្នុងទឹកដីមិនគ្រប់គ្រាន់និងប្រហែល ៨០% នៃអគារត្រូវបានបំផ្លាញ ឬទុកចោលក្នុងគំនរបាក់បែក។

លោក ស្ដ័រ បាននិយាយថា ប្រទេសន័រវេសរំពឹងថានឹងមានការបញ្ចប់អរិភាព ការកាន់កាប់ និងដំណោះស្រាយនយោបាយយូរអង្វែង ដែលប៉ាឡេស្ទីន និងអ៊ីស្រាអែលអាចរស់នៅជាមួយគ្នាដោយសន្តិភាព និងសន្តិសុខ ដោយលោកបានបន្ថែមថា ដំណោះស្រាយរដ្ឋពីរពិតប្រាកដគឺមានសារៈសំខាន់សម្រាប់ស្ថិរភាពក្នុងតំបន់នៅតំបន់មជ្ឈិមបូព៌ា និងសម្រាប់សន្តិសុខរបស់សហភាពអឺរ៉ុប។

លោក អ៊ីដ បាននិយាយថា ប្រទេសន័រវេស រួមជាមួយប្រទេសដែលមានគំនិតដូចគ្នា នឹងបន្តធ្វើការដើម្បីដំណោះស្រាយរដ្ឋពីរ និងទប់ទល់នឹងកម្លាំងដែលជំរុញការអភិវឌ្ឍក្នុងទិសដៅអវិជ្ជមាន។

យោងតាមសេចក្តីថ្លែងការណ៍បានឱ្យដឹងថា នេះគឺជាដំណើរទស្សនកិច្ចលើកដំបូងរបស់លោក អាប់បាស់ ទៅកាន់ប្រទេសណ័រឌីកចាប់តាំងពីប្រទេសន័រវេសបានទទួលស្គាល់ជាផ្លូវការនូវប៉ាឡេស្ទីនជារដ្ឋមួយនៅក្នុងខែឧសភា ឆ្នាំ២០២៤។ នៅឆ្នាំ២០២៥ ប្រទេសន័រវេសបានផ្តល់ជំនួយចំនួន ២,១ប៊ីលានក្រូណ័រន័រវេស (២២១លានដុល្លារអាម៉េរិក) ដើម្បីគាំទ្រដល់ប៉ាឡេស្ទីន៕

ដោយ៖ មូល មិនា (ប្រភព៖ ស៊ីនហួ)